aso
دیكتاتۆریەتی مێدیایی !
د.یەحیا عومەر رێشاوی
لە نێو كایەی مێدیاییدا شێوازێك لە شێوازەكانی قۆرخكاریی و داگیركردنی مەیدانەكە هەست پێ دەكەیت، كە هەندێ جار سەردەكێشێت بۆ خودپەرستی و تەنها خۆ بەراست زانین تا رادەی دیكتاتۆریەت ! هەندێك پێیان وایە كە كایەی مێدیایی تەنها لەسەر ئەوان تاپۆ كراوە و كەسانی دی بۆیان نیە قسە لەسەر كایەی مێدیایی بكەن و هەندێ‌ جار ئەگەر بۆیان بلوێت رەنگە رێگە نەدەن بە كەسانی دی تەنانەت كاری مێدیاییش ئەنجام بدەن و بە زمانە عەرەبیەكە (ئیعتراف) یان پێ ناكەن ! 

هەندێ‌ جار  كەسێك كە هەڵگری بروانامەیەكی ئەكادیمیە و پسپۆرێتی لە بواری مێدیادا هەیە، پێی وایە تەنها ئەوەی ئەو ئەنجامی دەدات كاری مێدیاییە و رۆحی كاری مێدیایی لە توێژینەوەی ئەكادیمیی و قوڵبونەوە لە نێو سەرچاوەكان و ئەنجامدانی كاری زانستیدا خۆی دەبینێتەوە، پێی وایە شێوازەكانی دیكەی كاری مێدیایی كاری پەراوێزین و تەنها حەزو و ئارەزون و هیچی دیكە و ئەگەر بە فلتەری ئەكادیمی بون و بروانامەی زانستیدا تێپەر نەبن، ئەوا پێناسەی كارێكی مێدیایی كامڵ وەرناگرن.

لە بەرامبەردا مێدیاكارێكی سەر شاشە و رۆژنامەنوسێكی سەر لاپەرەی گۆڤارێك و كامێرەمانێك رەنگە پێیان وابێت مێدیا تەنها ئەوەیە كە بە پراكتیكی ئەنجام دەدرێت و رۆژانە ئەوانی سەرقاڵ كردووە، ئیدی ئەكادیمیەك لە بواری مێدیادا بۆی نیە بە خۆی بڵێت كاری مێدیایی دەكەم و بەشێك لە گۆرەپانەكەش بۆ منە !

 ئەم حاڵەتە هەندێ جار لە كۆنفراس و كۆبونەوەكانی تایبەت بە كاری مێدیایی و رەوشی رۆژنامەگەریی بە رونی هەستی پێ دەكەین، دەبینی هەر لایەنە و بە جیا باس لە پرسەكانی تایبەت بە مێدیا دەكات و ئەو خەمە مێدیاییانەی كە بریارە خەمی هاوبەش بن و هەموان قسەی لەسەر بكەن و ئەو چالاكی و ڤێستیڤالانەی بۆنەی مێدیایی هاوبەشن، دەبێتە جێ باس و قسەی لایەنێكی دیاریكراو و دواجار ئامانجەكەی خۆی بە باشی ناپێكێت .
  
زۆرجار ئەم قۆرخكاریە لە نێو خودی مێدیاكار و رۆژنامەنوسەكانیشدا هەست پێ دەكەیت، ئەوەی لە بورای مێدیای بینراودا دەردەكەوێت رەنگە بە چاوێكی كەمتر بروانێتە كاری مێدیایی نوسراو و پێی وایە بواری كاركردنی ئەم زرق و باقی زیاتر و كاریگەریی فراوانترە، هەر بۆیە (ئەم) لە (ئەو) (موهیم) ترە ! ئەم تێگەیشتنە زۆر جار خۆی دەگەیەنێتە خوێندنە ئەكادیمیەكە و دەبینیت بۆ جیا كردنەوە و دابەشكردنی خوێندكاران بەسەر لقەكانی (تەلەفزیۆن) و (رۆژنامە) دا، شەر لە سەر بژاردەی (یەكەم) دروست دەبێت و(دووەم) دەبێتە بژاردەیەكی ناچاریی و نائارەزومەندانە .

پێموایە ئەم جۆرە تێروانینانە بێماناییەكی زۆری لە خۆگرتوە و جۆرێكە لە (دیكتاتۆریەتی مێدیایی)، چون بورای مێدیا زۆر لەوە فراوانترە كە كەسێك بە موڵكی خۆی بزانێت و لەسەر توێژ  و كەسانێكی دیاریكراو تاپۆ بكرێت، ئەمرۆ مێدیا پانتاییەكی بەرفراوانی داگیركردووە و پەیدابونی رۆژنامەنوسی هاوڵاتی و سۆشیالمێدیا زۆرێك لە تێگەشتنە كۆن و باوەكانی ئاوەژوو كردۆتەوە، هەر بۆیە ئەوە گفتوگۆیەكی بێهودەیە كە هەندێ جار لە ناوەندە جیاجیاكاندا دروست دەبێت و دەوترێت داخۆ مێدیاكار پێویستە خاوەنی بروانامەیەكی ئەكادیمی بێت یان نا ؟!

كاری مێدیایی هەم توێژینەوە و راپرسی مەیدانیی و شیكردنەوەی ناوەرۆكی دەزگا مێدیاییەكانە، هەم كاری پراكتیكی و بێژەی بەرنامە و سەرنوسەری گۆڤار و كاری مۆنتاژ و دەرهێنانە، هەم كاركردنە لە بواری كاریگەری سۆشیالمێدیا و بلۆگەرە كەسیەكان، بگرە تەنها ئەمانەش نیە و زۆر بواری دیكە لە خۆی دەگرێت و پێكەوە دیمەنە مێدیاییەكە تەواو دەكەن، هەر بۆیە مافی هیچ كەسێك نیە خۆی بكاتە میراتگریی كاری مێدیایی و بێویژدانانە لەوانی دی زەوت بكات.

AM:11:29:14/10/2015
زیاتر ...