هەنووکە هەواڵی راگەیاندنی دەوڵەتی کوردی بۆتە فاکتەرێک بۆ گێڕانەوەی حیکایەتە پاڵنەرە عاتیفییە کۆمەڵایەتییەکان و بزواندنی هەستی نەتەوایەتی تاکی کورد، سڕکردنی دۆخی سیاسی ئێستای هەرێمی کوردستان، سڕکردنی عەقڵە وشیارو بەئاگاکان، سڕکردنی ڕای گشتییە لەسەر بارودۆخی سیاسی ناوخۆی هەرێم.
هەر کات دەسەڵاتی سیاسی لەهەرێمی کوردستان، کەوتبێتە ژێر فشارێکی ناوخۆیی بۆ ئاڵوگۆڕی دەسەڵات و چاکسازی لەسیستەمی حکومڕانی هەرێمدا، ئەوا بەردەوام پاساوێک هەیە بۆ سڕکردنی بارودۆخی سیاسی ناوخۆ . ئەو پاساوەش راگەیاندنی دەوڵەتێکە بۆ کورد. لەهەموو قۆناغەکاندا بۆ مانەوەو درێژەدان بەم دەسەڵاتە سیاسیانە ئەم پاساوە زۆر زیرەکانە بەکار هاتووە.
دەوڵەتێک بۆ کورد ئامانج و هیوایەکی نوێ نییە، بەدرێژایی مێژوو و قۆناغە جیاوازەکانی شۆڕشی کورد و خەبات و قوربانیدان بۆ ئەم ئامانجە بووە. ( بەدەستهێنانی کیانێک و بونیادنانی دەوڵەتێک)، ئەم ئامانجە سەرەتایەکی مێژووی هەیە. لەماوەی 23 ساڵی حکومڕانی کوردیدا، زۆرجار ئەم باسە هێنراوەتەوە ناو کایەیی سیاسی، بەڵام هەموو جارەکان کورد نائومێد بووە هیچی سەوز نەکردوە.
هەمیشە دژەکان و هێزه دەرەکییەکان بەربەستبوون و دوژمنی سەرسەختی خەونی هێنانەدی دەوڵەتێک بوون بۆ کورد.ئەمە هۆکارێک، هۆکارێکیتر دەسەڵاتی سیاسی کوردە لەسیاسەتکردن و خەبات و هەوڵەکانیدا بۆ بەرجەستەکردنی ئەم ئامانجە گەلێک هەژاربووە. هیچ كاتێك زوونییه بۆ راگه‌یاندنی ده‌وڵه‌تی كوردی، ته‌نانه‌ت له‌هه‌ندێك قۆناغدا دواكه‌وتوین بۆ راگه‌یاندنی ده‌وڵه‌ته‌كه‌مانه‌وه، ئه‌وه‌ش به‌هۆی ناموئه‌سه‌ساتی و حزبیی كاركردنی سیاسییه‌كانی كوردستانه‌وه، هەنگاوەکانی بۆ پێکهێنانی دەوڵەت هەنگاوی سەرەتایی و پەراگەندەو بەڕبڵاو بووە.
وەک هەنووکە دەبینرێت بانگەشەی راگەیاندنی دەوڵەتی کوردی، بەدیهێنانی خەونی هەموو تاکێکی کورد. لەکاتێکدایە کە هەرێمی کوردستان بەبارودۆخێکی خراپی سیاسی و ئابووریدا تێ دەپەڕێت، قەیرانەکان هێندە زۆرن کەناتوانرێت حکومەتی هەرێم خۆی قوتاربکات لەو بازنە پڕ قەیران و کێشانە رزگاری ببێت.
تا ئێستا حکومەتی هەرێم نەیتوانیوە سیستەمی بەڕێوەبردنی وڵات بەدامەزراوەیی بکات، کە ئەمە یەکێکە لەتیۆرەکانی پێش راگەیاندنی دەوڵەت، دەسەڵاتی سیاسی دەیەوێت بەتیۆرێکی تر کاربکات و دەوڵەت رابگەیەنێت بەپێچەوانەی تیۆری یەکەمەوە، کە ئەمەش بۆ ئێستا حکومەتێکی شکستخواردی لێ بەرهەم هاتووە جا بۆ دەوڵەت دەبێت چ کارەساتێک بێت.
تەنها باوەڕبوون و هەستی نەتەوایەتی و گوتارەکان نابێت ئەژمار بکرێن و ببنە پێوەر بۆ بونیادی دەوڵەتێک، بەڵکو ئامادەسازی و میکانیزمە بنەڕەتییەکانی پێویستە، کە تا هەنووکە دەسەڵاتی سیاسی کورد ئەو ئامادەسازییەی نییە بۆ بەڕێوەبردنی هەرێمێک نەک دەوڵەت.
رەخنەگرتن لەبونیادنانی دەوڵەتی کوردی، رەخنەگرتنێکی بێ بنەمایە، بەڵام لەبارودۆخێکی وەهادا رەخنەگرتن و قسەکردن بەرچاو روونییە و رەخنەی دۆستانەیە، چونکە لەئێستادا دەزانرێت هەوڵی راگەیاندنی دەوڵەت، جگە لەپاساو بۆ سڕکردنی بارودۆخی سیاسی هەرێمی کوردستان، هەوڵی درێژەدانە بەدەسەڵاتەکان . بێ گومان دەوڵەتی کوردی تەنها خەونی لایەنێک و کەسێک نییە لەکوردستاندا . دەوڵەتی کوردی ( خەونی هەمووانە و بۆ هەمووانە) لەئایندەدا.