دوای گەڕانەوەی بۆ کوردستان خەڵکانێکی زۆر لە بەرپرسانی لایەنە سیاسیەکان ، خەلکی ئاسایی ، لە کۆی چین و توێژەکان سەردانی نەوشیروان مستەفا دەکەن ،بەرفراوانی سەردانەکان و بە تایبەتیش هی خەڵکانی یەکێتی پرسیاری دروستکردوە و هەریەکە و تەفسیرێكی بۆ دەکات ، ئەو سەردانانە هەر ئیعتباری کۆمەڵایەتیان نیە بە تەنها کوردان گوت بۆتە رێی کانی مالەکەی ئەو ، بۆیە لام گرنگە هەندێ خاڵ یاداشت بکەم ؛
یەک : مێژوی سیاسی نەوشیروان مستەفا لەگەڵ ئەوەی پیاوێکی راشکاو و قسە رەق و رێک و ڕەوان بوە بەڵام مێژوی دروستکردنی علاقاتی بەرفراوانی جیا جیاشە لە هەمان کاتدا ،لە ماوەی رابردودا شایەتی بەرفراوانی ئەو پەیوەندیەم لەگەڵ جۆرەها کەس، دانیشتوانی شار ، هی لادێ ، مامۆستا ، حاجی ، کاسبکار ، لەهەموو ئاستە جیاکان ، لەگەڵ ئەوەی ئەو خۆی کۆمەڵایەتی نیە بەوەی هەندێ ئیلتیزاماتی کۆمەلایەتی جێبەجێبکات ، بەڵام مایەی هەڵوەستەیە ئەو هەموو دلسۆزیەی خەلک بۆی سیحرەکەی چیە هەر هی پاکی و بێ نیازیەکەیەتی لە پۆست و پارە یا هۆکاری تریش هەن .!
دوو: بۆ یەکێتیەکان تا رادەیەکی زۆر ئاسایی دەیبینم مێژوی نەوشیروان مستەفا لە ناو ئەو حیزبەدا بە رادەیەک جێگەی تقدیرە کە تەنانەت دوای دروستکردنی گۆڕانیش و بە چەند مانگێک پێش نەخۆشکەوتنی مام جەلال لە چەندین بۆنەدا خۆشەویستی و رێزی خۆی بۆ کاک نەوشیروان دەربری و تەنانەت هەندێ یادەوەری گێرانەوە کە بگاتە رادەی ئەوەی مام خۆی بە قەرزاری هەندێ هەڵویستی دیاری نەوشیروان مستەفا بزانێت .
لەوە گرنگتر کاک نەوشیروان تاکە یەکجاریش پاکانەی لە مێژوی خۆی لە ناو یەکێتیدا نەکردوە و دەیان جار وتویەتی تا لە ناویا بەرپرس بوم مەسئولیەتی هەموو باشی و خراپیەک هەڵدەگرم .
ئەوە جیا لەوەی نەوەی ئێستا کە ئاوڕ لە مێژوی سەروەریەکانی یەکێتی ئەدەنەوە دەزانن کێ لەو لاپەرانەدا دیارە و مێژووی قۆناغەکانی تریشیان لەبەرچاوە .
سێ : کاک نەوشیروان ئێستا وەک خۆی پێگە و مەسئولیەتە مێژوییەکەی وای لێدەخوازێت هەم خۆی گەورەتر لە رێکخەری گشتی گۆڕان تەسەروف بکات ، هەم گۆڕانخوازان وا بۆی بڕوانن چونکە هاوکێشە سیاسیەکانی هەرێم و لاسەنگی باڵانسی هێز لە ململانێکاندا ئەوە دەخوازێت پێگە مەعنەویەکەی کاک نەوشیروان رۆڵی خۆی بگێرێت ، هەڵبەتە بۆ دژایەتی و جەمسەرگیری حزبی نا ، لە پێناو دروستکردنی سەرەتایەکی نوێی جوڵەی سیاسی و پەرلەمانی و حکومەتی و ئیداری و خزمەتگوزاری، دوای ئەوەی لە رابردودا تا رادەی بێئومێدی توشی چەقبەستن بوو .
چوار : من لە دڵەوە تەمەننام دەکرد لە کوردستان وەک بەشێک لە کلتوری شەرق دامەزراوە گرنگ بێت ، دامەزراوەکان چەق و محوەری گۆڕانکاری و جوڵەکان بن ، بەڵام هێشتا لە بەشێکی دونیا و بە تایبەت رۆژهەلاتی ناوەراست و کوردستانیش تایبەتتر کەسەکان رۆڵیان لە ئاراستەکردنەکان زۆر زۆرە .
نەوشیروان مستەفا بە ئیعترافی نەیارانی یەکێکە لەو کارەکتەرانەی هەم زمانی سیاسی بەردەوام نوێدەکاتەوە هەم مامۆستای گۆڕینی چەمک و مانا سیاسیە نوخبەویەکانە بۆ زمانی سادەی هاوڵاتیان، ئەو تەنها خۆی جیا لەو نەوەیەی کە هاوخەباتی بوون لە جوڵەی سیاسی دروستکردنی گۆڕاندا دەرفەت و فرسەتی بۆ دەیان گەنج کردەوە کە دەرفەت وەربگرن کە مومکین نەبو بێ دەعمی ئەو ئەو دەلاقانە بۆ ئەم نەوەیە بکریتەوە ، هەر بۆیە بەشێکی تر لە سیحری ئەو پیاوە ئەوەیە (مارکیز)وتەنی، باڵت دەداتێ بەڵام لێدەگەڕێ خۆت فێری فڕین بیت،لە کاتێکا لە دوای راپەرینەوە نەوەیەک بە هۆی قرتاندنی باڵی تواناکانیانەوە لە لایەن شۆڕشگێرانەوە پیر بوو.
پێنچ : ئاستێکی تر کە وایکردوە خەڵکێکی زۆر هەست بکەن ماڵی کاک نەوشیروان و خودی خۆی ئامێزێکی کراوەیە ئەوەیە ئەو پیاوە توانایەکی ئێجگار جوانی مرۆڤانەی لە هەڵدانەوەی لاپەرەی نوێ هەیە، نەک تەنها بەوەی خۆی لێبوردە بێت ، نەخێر بەوەش کە داوای لێبوردن دەکات و شایەتی حاڵەتی زۆری لەو شیوەیەم ، کینەی سیاسی و ململانێی کەسی و نەفەسی رقهەڵگرتنی تێدا نیە کام سەرکردە و لایەن پێیان وایە لەگەڵ نەوشیروان مستەفا خراپ تێکیان داوە ئەو ئاسان لاپەرەی نوێ دەکاتەوە .
لە سەرەتاوە قەناعەتێکی هەبوە کە مرۆڤەکان گرفت نین سستمی خراپ گرفتە و کاتێک سیستم باش دەکەیت مرۆڤەکانیش باش دەبن ، بەو سیاسەتەش وەبەرهێنانی لە توانا مرۆییەکاندا کردوە بە هەردوو نەوەی شاخ و نەوەی شار ، ئەوانەی پێش گۆڕان خاوەنی ئینتیمای سیاسی جیا بون ، قەت شعورێکی نەداوە بە کەس کە زیادە لای یا لێی بێمنەتە .
شەش: رون و ئاشکرایە و قسەی منی ناوێت کە کاک نەوشیروان کێوێکە لە بەهای مەعنەوی لە رابردودا هەموو ئەوانەی لە گۆڕاندا بوون بەشێک لەو لایەنە مەعنەویەی ژیانی سیاسیان پێ تێر کردوە ، بەڵام ئەوە هەر بۆ گۆڕانەکان راست نیە بۆ لایەنەکانی تریش و بەتایبەتیش یەکێتی راستە، لە بارێکیا ئەو سەردانانە ئەو لایەنە مەعنەویەیە.
ئەوەی گرنگە یەک شتە دەبێت قاعیدەی یەکێتی و گۆڕان لە سیاقی تایبەتی خۆیدا ئەو پێگە مەعنەویەی کاک نەوشیروان بەسەر هەردولادا بخوێینەوە چونکە خۆ ئیتیفاقی سیاسی نێوان ئەو دوو لایەنە ئەگەر شۆڕ نەبێتەوە بۆ خوارەوە سودێکی نابێت .
تەبعەن ئیتیفاقی سیاسی لە پێناو چاکەی گشتی و گۆڕینی دۆخی چەقبەستوی سیاسی و ئیداری و دارایی هەرێم بۆ دۆخێک کە خەڵکی کوردستان هەستبکات دەسەڵاتێکی هەیە خزمەتی دەکات و ئەویش متمانەی پێدەکات ، خەڵکێکی زۆر ئەو ئومێدەی بە گۆڕان و یەکێتی هەیە و پێشیان وایە کاک نەوشیروان دەتوانێت رۆلی گەورە لەو بارەیەوە بگێڕێت، هەڵبەتە گرفت لە رێگەدا هەن و هەن دەیانەوێت رێکەوتنەکە بێ رۆح بێت ، بەڵام گرنگە هاوکار بین بەو ئاراستەیدا خۆ ئەگەر ئیتیفاقەکە لایدا بە ئاراستەی تر رەخنەبارانی بکەین .
بە فعلی رێی کانیە ماڵەکەی ئەو ، کانیەک کە هەن ئەوکیان تەڕ دەکەن و تێنوێتیان بە دیدار و وتەکانی دەشکێت ، هەن سەرلەنوێ روخساریان دەشۆن و هەن لەسەر ئەو کانیە دەیانەوێت هەست بە ئومێد و ئاوەدانی بکەن .