ئەو نائومێدیە قوڵەی ئێستا لە هەناوی کۆمەڵگەی کوردیدا دەژیت ؛ بە تەنها بێهیوابون نیە لە سەرکردەیەکی سیاسی یا عائیلەیەکی سیاسی یا حزبێکی سیاسی بەڵکو بێ ئومێد بونە لە بەشی هەرە زۆری ئەو دەستەبژێرەی بریار بەدەستی ناو حیزبەکانن ؛ کە جومگەکانی دەسەڵاتی ناو حیزب و ناو حکومەت و کۆی بریاری سیاسییان لە ڕاپەرینەوە تا ئێستا قورغکردوە ؛ بێزاریە لە هەمو پۆستێکی ناشەرعی ناو حزب و حکومەت نەک تەنها پۆستێ ؛ بێزاریە لە هەموو جۆرە بنەماڵەیەکی سیاسی نەک تەنها یەکێ .
بێزاری خەڵک لە سیاسەت لە بارە هەره دیارەکەیدا کۆتایی هاتنی چانسە یەک لە دوای یەکەکانی کومەڵگەی کوردستانە بەو کاستە سیاسیەی هێشتا شەرعیەتی شاخی کردۆتە پاڵتۆی بەری و جگە لەو شەرعیەتەش بایەخی بۆ هیچ شەرعیەتێکی تر نیە ؛ خەڵک زیاد لە ۲۵ ساڵە چانسی باشکردنی ژیانی خۆی داوەتە دەستیان هەتا دێت ئەوان خۆیان دەوڵەمەندتر و بێباکتر و خەڵکیش وێرانتر و بێ ئومێد تر دەبن.
ئەم مۆدێلەی سیاسەت کە لە ۲۵ ساڵی رابردوودا کراوەتە عورف و خەڵکی لەسەر گۆشکراوە کایەی سیاسەتی کردوتە گۆمێکی مردوی ئەوتۆ جگە لە (حەرەسی قەدیم) کەسی تر توانای مەلەکردنی تێدا نیە؛بڕوانن خۆرایی نیە بە درێژایی دوای راپەرێن کاستێکی سیاسی دیاریکراون و دوبارە دەبنەوە.
بەشێکی ئەو نەوەیە خاوەن پیشەیەکن کە ناوی (مەکتەبی سیاسی) یا (سەرکردایەتیە) جا شەرعیەتی گونکرەی مابێت یا نا ؛ تەنانەت حیزبەکەی جێهێشتبێت یان نا ؛ هندێکیان بوبنە بازرگانی عەلەنیش ئەم عینوانەی مەکتەب سیاسی و سەرکردایەتی لە خۆی ناکاتەوە؛ زیاتر لە نیو سەدەیە بەم جۆرە کایەی سیاسەت لەسەر هەندێ دەموچاو تاپۆکراوە.
ئەوانە کایەی سیاسەتیان لە زیاد لە رویەکەوە شێواند بە تایبەت لە پەیوەست بە دروستکردنی هەرێمێکی دامەزراوەیی ؛ ئەو کاستە نابێتە بەشێک لە پەرلەمان نابێتە بەشێک لە حکومەت نا چیتە ناو ژیانی دامەزراوەیی و عنوانە حزبیەکە و پلە حزبیەکە بەرزتر و باڵاتر رادەگرێ؛ئەوەی کە مەکتەب سیاسی حزبێک پەرلەمان پەک دەخات لە بارێکیا بەرهەمی عەقڵی ئەم گروپەیە.
لە هەرچی پیشەی دونیادا هەیە شتێک هەیە ناوی (ئیعتیزال) (دانیشتن و وازهێنان)ە ؛ لای ئەوان کاسبی سیاسەت تا کۆتایی تەمەنە و تانەخرێنە گۆرەوە وازناهێنن.
نائومێدی لای خەڵک لە داگیرکردنی تەنها پۆستێک و کورسیەکەوە دروست نەبوە کۆی کایەی سیاسەت لە رابردوو داگیرکراو بوە و ئێستا لە هەموو کات زیاتر داگیر کراوه؛ بۆئایندەش بنەماڵە و کوڕ و وەچەی هەندێکیان ئامادەکراوە و لە ئێستاشەوە پرۆڤەکردن بۆ بە ویراسیکردنی کۆی کایەی سیاسەت لە کوردستان زۆر تۆخ و رون و ئاشکرایە .
ئەو دێڕانە هەرگیز بە مانای ئەوە نیە بمەوێت هێڵێکی راست و چەپی نەرێنی بەسەر هەموو ئەو نەوە دەسەڵاتدارەدا بێنم یا بەشێک لە دەنگ و رەنگە جیاوازەکانیان نەبینم بەڵام ئەزمونی ئەو نەوەیە ئەنجامەکەی و زۆرێنە بەدکارەکەی وێنەی پێدەبەخشێت؛ خەڵک ئێستا بەهۆی ئەو کاستەوە بێزاربوە لە بازرگانیکردن بە شۆرشەوە .
ئەو هەوڵەی نەوشیروان مستەفا و (بەشێک لە هاورێکانی) لە دروستکردنی بزوتنەوەی گۆران لە بارێکیا بۆ کۆتایی هێنان یان راگرتنی ئەو شەرعیەتە شۆرشگێریە یا لانیکەم تێکەڵکردنی دوو نەوە بوو ؛ کە بێگومان جێگەی تقدیرە و ئەو دەمێکە باوەری خۆی لە سەر گرنگی کۆتایی هێنان بە شەرعیەتی شورشگیری راگەیاندوە و باجی ئەوەشی داوە و زور جاریش لەو کەسانەی متمانەی سەردەم و قۆناغی نوێی پێکردون دەرفەتی داونەتێ بێئومێدی چنیوەتەوە؛ بەڵام راستیەکی بێ چەندوچونە جارێکی تر هەمان مۆدێل لەناوخۆی ئەم بزوتنەوەیەش خەریکی سەرپێ کەوتنەوەیە؛ چونکە ئەم شەرعیەتە بە جۆرێک بوە بە مۆدێل کە لە نێوان حزبەکاندا یەکتری ئاو ئەدەن و دەست بە باڵای یەکەوە ئەگرن و هەرچەند نەیاری سیاسی بن وەک کاستە سیاسیەکە باوەش ئەکەن بەیەکا .
قسەکردن لە ئازادکردنی سیاسەت و کردنەوەی دیالۆگ لەسەر ئەو باسە لە بەرژەوەندی کۆمەڵگە و ئایندەی هەموانە تەنانەت لە بەرژەوەندی ئەو نەوەشۆڕشگێڕەکەشە؛ ئاخر گروپێکی بچوک هەموو سەروەری شۆرشیان بۆ خۆیان کردۆتە کەرەسەی بازرگانی لە کاتێکا زۆرینە شۆرشگێرەکە پێشمەرگە راستەقینەکەی دوێنێ هەرگیز بۆ ئەم مۆدێلە ناشیرینەی ئێستا شۆرشی نەکردوە؛ بینیشمان ئەو پێشمەرگە و شۆرشگێرانە لە چ کولەمەرگیەکی ژیاندان و موچەیەکی ئاسایی بۆتە داواکاریان.
ئومێد کاتێک دروست دەبێت سیاسەت لەبەردەم هەموو هاوڵاتیەک ئازاد بکرێت و دەرفەتی وەک یەک بۆ هەموان بێتە ئاراوە ؛ بۆ ئەوەش دەبێت ئەو کایەیە بە شەرعیەتی شار و هەڵبژاردن نوێ بکرێتەوە ؛ بۆ ئەوەی مێژو و جۆری ململانێ و ئامانجی سیاسەت لە کوردستان بۆ سەردەمێکی نوێ و جیاواز بگۆرین دەبێ سیاسەت لە کایەیەکی داگیرکراوە ئازاد بکەین ؛ بێ ئازاد کردنی سیاسەت نە هیچ شتێک لە کۆمەڵگە ئازادە و نە هیچیش بەرەو باشی دەگۆڕێت.