رۆژ نیە نەبینین و نەبیستین لێرەو لەوێ فلانە سەنتەر و ناوەندی رۆشەنبیری كۆنفراسێك بۆ پرسی ریفراندۆم و سەربەخۆیی كوردستان ئەنجام دەدات، جا ئەوەی جێگای تێبینی جدیە ئەوەیە هەمیشە كۆنفراسەكە بۆ چەند كەسێك و دەموچاوێكی دووبارە سازدەكرێت، ئەوانەشی كە لەوێ ئامادەدەبن و گوێكری ئەو كۆنفراس و دیبەیتانەن زیاتر خەڵكی دووبارەی گوێڕایەڵی دیبەیتچیەكانن، كەمترین جار رێگا بە خەڵكی تر دەدرێت لەو كۆنفراسانە ئامادەبێت، چونكە خواستی ئەوانەی كۆنفراسەكان سازدەكەن ئەویە كە دەبێت میوانەكانیش قسەی ئەو بەرێزانە بڵێنەوە كە دیبەتیان بۆ سازكراوە.
كەسانی تر بۆیە ناگەنە ئەو كۆنفراسانە، چونكە كۆنفڕاسەكان لە هوتێلە چوار ئەستێرەو و پێنج ئەستێرەكان دەبەسترێن زۆرێك لەو شوێنانە خەلكی ئاسایی هەر پێشیان نازانن یان ئەگەر شارەزاش بن بۆیان نیە نزیكی ببنەوە.
هەموومان دەزانیت كە دەنگدەری ریفراندۆم بەتەنیا ئەو كەسانە نین كە قسەی ناو دیبەیتەكان دەكەن، ئەوانەش نین كە لەوێ گوێگریانن، بگرە لە ریفراندۆم دەنگی بەرپرسێك و كرێكاری سەهۆڵەكە یەك دەنگە، دەنگی جوتیارێكی دەشتی هەولێر و خاوەن دیوەخانێكی دەسەڵات یەك دەنگە، هاوڕێیەكی نووسەرم لەو بارەیەوە جوانی نووسیوە كە دەڵێت:
(دەنگدەری ریفراندم تەنیا ئەو دەستبژێرە سیاسیە نیە كە سەری زمان و بنی زمانی ریفراندۆمە، بگرە دەنگدەری ریفراندۆم ئەو دەنگدەرەیە كە لە بەیانی تا ئێوارە بەدیار عارەبانەی شیخەڵای شاری هەولێر و بەردەم مزگەوتی گەورەی شاری سلێمانی و سەر پردی حەسیرەكەی كەركووكە)
بەرێزینە.... ئەو پارە زۆرەی ئێوە لە هوتێلە خۆش و راقیەكان بۆ كۆنفراسەكانتان بەهەدەری دەدەن، بڕۆن بیدەنە خەلكانێك كە پارەی كڕینی دەرمانی نیەبۆ نەخۆشەكانیان، بڕۆن بیبەخشنە نەخۆشخانەی هیوا و سەنتەری نانەكەڵی تا ئەوانیش دەرمان بۆ نەخۆشە درێژخایەنەكان بكڕن.
وەرن بچن لە شوێنە گشتیەكانی كوردستان گوێ لە چین و توێژەكانی كۆمەلگا بگرن، لەوێ كۆنفراس و دیبەیت ببەستنن، ئەگەر ئەو شوێنانەش شك نابەن و شارەزا نین چونكە دەزانین ئێوە لە بیست و شەش ساڵی رابردوو لەو خەڵكانە دابڕاون و ئەو شوێنانە بەلەد نین، لێرە ناوی چەند شوێنێكتان بۆ دەنووسین تا بچن لەوێ دیدار لەگەل ئەو خەلكانە ئەنجام بدەن، كە دەنگیان كاریگەری لەسەر ریفراندۆم دەبێت، بچن لە شاری هەولێر لە ناو باغی شار لەگەل خانەنیشنان كۆبوونەوە سازبدەن كە سەدان مامۆستا و فەرمانبەری بە ئەزموون رۆژانە لەوێ لەسەر ئەو دۆخە دەردەدڵی خۆیان بۆ یەكتری باس دەكەن، بچن ئەو مامە پیرانەی بن دیواری مزگەوتەكانی كوردستان بدوێنن بزانن چەندە پرۆشن كە كورد ببێتە خاونی دەوڵەتی خۆی بەڵام متمانەیان بە ئێوە لاواز بووە.
برۆن لە باغی شاری سلێمانی گوێ لەو مامۆستا بەتەمەنانە بگرن كە هەندێكیان هی سەردەمی حزبی هیوا و كاژیكن، بزانن بۆچی قسەی (شاسوارعەبدوالواحد)یان پێ لە ئێوەی تێكۆشەری شاخ و شار پێ درووست ترە و پشتیوانی لە كەمپینی نەخێر دەكەن، باش گووێیان لێبگرن بزانن ئەوانە حەز بە دامەزراندنی دەوڵەتی سەربەخۆیی كوردستان ناكەن یان هەڵوێستیان لە خرابەكاریەكانی ئێوە وەگرتووە؟
دەی تۆزێكیش كاتی خۆتان بۆ خەلكی خێر لە خۆنەدیوی گەرمیان و زێدی ئەنفال تەرخان بكەن بزانن ئەوان بۆ جیابوونەوە لە دەوڵەتی ئەنفالچی رایان چیە؟
بزانن دەیانەوێت لەگەڵ یادگاریەكانی عەرعەر و نوگرە سەلمان بمێنەوە یان پشتیوانیتان دەكەن بۆ دەنگدان بە بەڵێ بۆ سەربەخۆیی كوردستان؟
تكایە واز لە كۆنفراسی هۆڵە فێنكەكانی ئەو هوتێلانە بێنن، بچن لە مۆنمێنتی شەهیدانی هەڵەبجە ریكلام بۆ سەربەخۆیی كوردستان بكەن، برۆن لەوێ بەو خەلك بڵێن دەمانەوێت برینەكانی هەلەبجە سارێژبكەین لەسایەی دەوڵەتی كوردستان هەلەبجە بكەینە پایتەختی ئاشتی، ئەگەر جورئەتان دایە بەرخۆتان ئەوسا دەزانن لەو شارەی زۆر موزایەدەی بەناوی و قوربانیەكانی دەكرێت، خەڵك رای لەسەر ئەو دەسەلاتە چیە .
ئیتر بەسە كۆنفراسی هۆڵەداخراوەكان، برۆن لە بادینان سەكۆیەكی ئازاد درووست بكەن لەوێ بانگەشەی ریفراندۆم بكەن، لەوێ دڵتان گەورە بێت و جیكڵدانەی دیموكراسیتان فراون بكەن، لێگەڕێن با خەڵك دەردەدڵی خۆتان بۆباس بكات، تا ئێوەش بتوانن ئەو خەڵكە قەناعەت پێبكەن بۆ دەنگدان بە بەڵێ لە بیست و پێنجی ئەیلوول .
بروا بكەن كۆنفراسەكانتان خزمەت بە دەنگی بەڵێ ناكات ئەگەر بەتەمای دەنگی خەڵكن دەنگی خەڵك لەو شوێنانە و زۆر شوێنی تریشە، ئەگەر دەنگی بەڵێی خەڵكتان دەوێت ئەویە دەنگ ئەگەریش وەك هەلبژاردنەكانی كوردستانیش دەكەن، لە جیاتی هەموومان دەنگ دەدەن، لە دیبەیتەكانتان بەردەوام بن، دیار ئێوە راست و ئێمەش هەڵەین .