بۆ گەلی كوردیش لەڕۆژهەڵاتی كوردستان هەڵبژاردن هیچی بۆ بەرهەم ناهێنێت، لەهەڵبژاردنی رۆحانیدا، كورد بە ئاستێكی باش دەنگیان پێدا، چونكە ڕۆحانی بەڵێنی زۆری بۆ دەستەبەركردنی مافەكانی گەلی كورد لەڕۆژهەڵات پێدابون، كە تا ئێستایش هیچ یەكێك لەو بەڵێنانە جێبەجێ نەكراون، بگرە سزا و ئەشكەنجە و لەسێدارە دانی كورد و بن پێكردنی ماف و ئازادیەكانی زیاتر بون.

وێڕای ئەوەی لایەنە سیاسیەكانی ڕۆژهەڵاتی كوردستان داوایان لەگەل كرد، بایكۆت بكەن و دەنگ نەدەن، بەڵام ئەم داوایەیش هیچ لەپرسی كورد ناگۆڕێت، ئەوە ڕێژەی دەنگدان بو لەهەمو ئێران كەم بو، نەك كورد نەچون بۆ دەنگدان وەك لایەنە سیاسەكانی ڕۆژهەڵات بانگەشەی بۆ دەكەن، كە گوایە خەڵكی ڕۆژهەڵات پەیڕەوی داخوازیەكەی ئەوانیان كردوە و نەچون بۆ دەنگدان.

هۆكارێكی سەرەكی سەرپێچی داخوازی لایەنە سیاسیەكان لەلایەن كوردانی ڕۆژهەڵاتەوە، كە ئەمجارەیش وەك هەڵبژاردنی سەرۆك كۆماری ئێران بایكۆتیان نەكرد و دەنگیاندا، بۆ نا تەبایی و نەبونی یەكگوتاری و ناڕونی ڕۆژەڤ و بەرنامە و ئامانجی حزبەكانی وەك دیموكرات و كۆمەڵەكان دەگەڕێتەوە، كە تا ئێستایش بەرنامەیان بە گوێرەی پێویستی پێواژۆ و ڕەوشی ڕۆژهەڵات نیە، ستراتیژ و تاكتیكیان وەك خۆیان كلاسیك و ناڕونە.

باڵەكەی پەكەكەیش لەڕۆژهەڵات بە هەمان جۆری پەكەكەیە، لەڕەوش و پێویستی و باری سایكۆلۆژی خەڵكی ڕۆژهەڵات، بە هەمان شێوەی باشور تێناگەن و ئەم دو پارچەیە جێگەی بایەخیان نین و لاوەكین، بۆیە ئەوانیش ناتوانن وەڵامی خواستی گەلی ڕۆژهەڵات بن و ناڕۆشنن.

ڕاستە كۆماری ئیسلامی كۆمەڵكوژی زۆری لەنمونەی قاڕنێ و سنە و سەقز و بۆكان و بانە و تیرۆری سەركردەی وەك شەرەفكەندی و قاسملۆ و لەسێدارەدانی 59 لاوی لەمهاباد لەیەك ڕۆژ دا ئەنجامداوە و تا ئەم ساتە ڕۆژانە گەنجانی كورد لەسێدارە دەدات و ڕۆژهەڵات كۆمەڵكوژ و جینۆساید دەكات، كە نیشانەی خەبات و تێكۆشانی ئەو پارچەیەن، لێ لایەنە سیاسیەكان و ڕۆشنبیرانی ڕۆژهەڵات، وەك هەردو لایەنی پارتی و یەكێتی و دام و دەزگاكان لەباشور نەیانتوانیوە ئەو مێژوە خوێناوی و جینۆسایدانە، وەربگێڕنە سەر زەمینی واقیع و بە تاكی كورد و ڕای گشتی جیهانی بناسێنن و ستەمی ڕژێم نیشانبدەن، بۆ ئەوەی دۆزی كوردی پێ ببنە پێشەوە و ڕاستی ڕژێم چی لەباشور و چ لەڕۆژهەڵات باش دەربخەن و كورد بە باشی دوژمنەكەی بناسێت.

چونکە توانای ڕێكخستنی خەڵكیان نەبوە، كە بیانكەنە هێزی فشار لەسەر ڕژێمی سێدارەی ئێران، لەناوخۆدا هێزێكی سیاسی و یاسایی و بەرچاو ڕون لەماف و ئازادی نەتەوەیی و ئامادە بۆ كاتی هەڵبژاردنیان دروست نەكردوە، كە توانای ڕەوانەكردنی نوێنەری ڕاستەقینە و داكۆكیكار لەپرسی كوردی بۆ پەرلەمان هەبێت.

بۆیە خەڵك لەڕۆژهەڵات بەرچاویان ڕون نیە و لەنێوان بەرداشی ڕژێم و لایەنە كوردیەكاندا گیریانخواردوە، حزب و ڕۆشنبیر و سیاسیەكانی ڕۆژهەڵات ئەوانەیشی لەباشورن، تا ئەم ساتە زمانی كوردیان ناتەواوە و بە ئەركیان نەزانیوە پەرە بە زمان و ناسنامەی كوردی نەتەوەییان بدەن، ئیتر چۆن دەتوانن خەڵك ڕێكبخەن؟، یان كۆمەڵێك حزبۆكە و باڵی پەرتوبڵاوی چەپڕەوی كلاسیك و توندیان هەن، كە بۆ خەڵكی ڕۆژهەڵات سودیان نیە، بۆیە دەبێت خەڵكی شۆڕشگێڕ و ڕۆشنبیرانی ڕاستەقینەی ڕۆژهەڵات خۆیان ڕێكبخەن و ئامادەی هەر گۆڕانكاریەك لەئێران بن، چونكە حزبەكان وەڵامدەرەوەی پێداویستی و خواستەكانیان نین.

لەباشوریش ئەمڕۆ هێندەی خەریكی ڕیكلامكردن، بۆ خۆپیشاندانە مەزهەبی و ئاینیەكەی بەغدا و شیعە بوین، بە نیوەی ئەوە ئاگاداری هەڵبژاردنەكانی ئێران و ڕەوشی گەلی كورد لەو پارچەیە نەبوین، كە پێویست بو هاوكاریان بوینایە، بە داخەوە هێشتا پێواژۆی عێراقێكی شێوا و مەزهەبی و دواكەوتومان بە لاوە گرنگە، كە بە پەیامی مەزهەبی و ئاینی حزبی دەجوڵێنرێن و خۆپیشاندانیان پێدەكرێت.