لەچەند مانگی ڕابردودا وڵاتانی رٍۆژئاوامان بینی، چۆن سنورەكانیان لەپەنابەران قایمكرد و  مەترسیان لەهاتنی ئەو لێشاوە زۆرەی پەنابەرانی ڕۆژهەڵاتی ناوین و عەرەب بە تایبەتی بۆ سەر ناسنامە مەسیحیەكەیان نیشاندا، ئاستی دەنگەكانی مێركل چۆن هاتە خوارە وە، چونكە پشتگیری لەپەنابەرانكرد و سەرزەنشت كرا، دوای ئەوەیش چۆن پەنابەرانیان پاكساز كرد و ئەو ڕێژەییەیان لێ هەڵبژاردن، كە بۆ كەڵكی ئابوری و هێزی كاریان پێویستیان بون، ئەوانیتریشیان لەكەمپەكاندا ناچاركرد، ئارەزومەندانە بۆ وڵاتانی خۆیان بگەڕێنەوە، هێشتا ڕاگەیاندنەكانیشیان ڕۆژانە مەترسی ئەو لێشاوە بۆ هاوڵاتیانیان ڕوماڵ دەكەن.

كوردستان زیاتر لەدو ملیۆن بە ناو ئاوارەی عەرەب، جگە لەو ژمارە زۆرەی پەنابەر ڕوی تێكردوە، نە ڕاگەیاندنەكانمان هێندە هوشیارن مەترسیە ئایندەییەكانیان بۆ ڕای گشتی بگوێزنەوە، نە تاك هێندە بە ئاگایە بیكاتە ڕۆژەڤ و بۆ چارەسەركردنی بگەڕێت، دەسەڵاتی حكومی و حزبەكانیش لەبەر ناردنی كەمە پارە و هاوكاریەكی ڕیسوای وڵاتان و قازانج لێكردنیان، نەك ڕێگریان لێ ناكەن، وێڕای ئەوەی كورد مارانگەزی دەستی عەرەبە، دەروازەكانیان بۆ كردونەتەوە و بێ ئەندێشە پیلانی وڵاتانی ناوچەكە لەسەر كورد جێبەجێ دەكەن و نیشتەجێیان دەكەن.

زۆرینەی ڕێكخراوەكانی كۆمەڵگەی مەدەنی و توێژەران و بە ناو دەستەبژێر، بە پەرلەمانتار و سیاسی و ڕۆژنامەنوسانیشەوە، وەك دەسەڵات و حكومەت چینێكی خۆشباوەڕ و بێ زانیاری و بێ ئاگان لەم هەمو پیلانەی لەسەر كورد هەیە، یان بە مەبەست خۆیان داوە بە دەم شەپۆلەكەوە و كوردستان بۆ وەرگرتنی پەنابەر بە ئەوروپا بەراورد دەكەن!!.

ڕەوشی كەركوك و خانەقین نمونەیە، كە بە پێی نەخشەی ساڵی1975كورد بون و ئێستا لەچی ڕەوشێكی سەختی داگیركاریدان، پرسیارەكە ئەوەیە لەشارەكانی كوردستان عەرەب و توركمان نین، یان ئەگەر لەهەندێك دەڤەر هەبن، ڕێژەكەیان زۆر كەمە، بۆچی كورد ڕێگە بە زیادبون و نیشتەجێبونیان دەدات و ئیرادەی ڕوبەڕوبونەوەیان نیە؟، بۆچی ئەزمون لەمەرگەساتەكان وەرناگرن، بۆچی كۆمەڵێك كوردی كاڵفام دژی ناسنامەكەی خۆی گرنگیان پێدەدەن و زەمینە بۆ تیرۆر و توندوتیژیەكانیان خۆشدەكەن؟.

بە پلەی یەكەم پەیوەندی بە عەقڵیەت و ئەدای دەسەڵاتدارانەوە هەیە، تاكێكیان بەرهەمهێناوە، كە لەدەرەوە بۆ حوكمڕانیەكی سەقامگیر بگەڕێت، چونكە لەناوخۆدا حوكمڕانی شكستیهێناوە.

دەسەڵاتی كوردی لەئەنجامی خۆ بە كەمزانی و ئیرادە شكاوی و بێ ناسنامەییەوە، بۆ سۆز و عەتف لەدەرەوەی خۆیان دەگەڕێن، ئەم لێگەڕە هەرزانەیش لەسەر ژمێرەی ناسنامەی كوردە، بۆ پڕكردنەوەی ئەو بۆشایی و شكستەی ناخیان، بەسەر گەلەكەی خۆیانەوە دەبنە ستەمكار و ئارەزومەندانەیش دەبن، بە ژێر هەژمونی هێز و داخوازی و فشاری وڵاتانی دەرەكیەوە.

لەم پێواژۆیەدا ڕۆژهەڵاتی ناوین لەبەردەم گۆڕینی نەخشەی نوێدایە، جەنگێكی زۆر نامرۆییانەی مەزهەبی و تائیفی بۆ گۆڕینی دیمۆگرافیا و نەخشەی دانیشتوان لەم ناوچەیە بە ڕێوە دەبرێت، دەیانەوێت دیمۆگرافیای كوردستان بە جۆرێك بگۆڕن، كە بارتەقای ڕێككەوتننامەی سایكس پیكۆ كۆمەڵكوژی و جینۆسایدی بۆ كورد هەڵگرتبێت، هەرگیز نەهێڵن كورد وەك نەتەوە خاوەن پێگە و ناسنامەی خۆی بێت و وەك هەمو نەتەوەكانی جیهان ئارام بژی، بۆیە پێویستە خەڵك و دەسەڵاتی كوردی بەرهەڵستی ئەم پیلان و نەخشانە بكەن، نەك بە ئاسانی پەسندی بكەن و جێبەجێی بكەن.

هێنانی زیاتر لەدو ملیۆن بە ناو ئاوارەی عەرەب بێ مەرام نیە، زیادكردنی مەزهەب و نەتەوەیی جیاوازە و لاوازكردنی ناسنامەی كوردی و نانەوەی جەنگی مەزهەبیە لەكوردستان.