بەرپرسیارێتی یەكێكە لەپێوەرەكانی كاری ڕۆژنامەوانی
دروست و سەركەوتو، ڕۆژنامەنوس و دەزگای ڕاگەیاندن دەبێت بەرامبەر بە پاراستنی ئاشتی
و ئاسایشی كۆمەڵایەتی ئەو ژینگەیەی لێی دەژین و هاوڵاتیانی كۆمەڵگەكەی، هێندە هەستیار
و خۆی بە بەرپرسیار ببینێت، كە هەمو هەنگاوێكی بە پلان و بیركەوتنەوەی ئەو بەرپرسیارێتیە
بێت، كە لەئەستۆیدایە.
ڕاگەیاندنی كوردی لەسەر ئاستی هەر چوار پارچەی كوردستان،
بارگاوییە بە ئیدیۆلۆژی و دروشمی حزب، هەمویان لەدەوری بازنەی ڕامیاری و ستراتیژی حزبەكانیان
و بە پێوەری ئەو تاكتیكانە دەخولێنەوە، كە خزمەت بە ئیدیۆلۆژی و ستراتیژ و پەیامی حزبەكەیان
دەكەن، ئەوەی لەتەواوی ڕاگەیاندنی كوردیدا بزرە، لەهەمو ئاستەكاندا خزمەتی دۆز و پرسی
نەتەوەیە، بە جیاوازی بیروڕای حزبی و ڕامیاری، لەپارچەكانی وەك باكور و ڕۆژئاوایش،
كە هێشتا لەخەباتی ڕزگاریدان، ڕاگەیاندن لەجەوهەردا دیسانەوە خزمەتی بە ئیدیۆلۆژی حزبی
دیاریكراو كردوە و پرسی نەتەوەیی بۆ ڕاژەی تەسكی حزبی بەكارهاتوە و بەكار دێت.
وەلێ لەهەموی مەترسیدارتر ئەو كەناڵی ڕاگەیاندن
و ڕۆژنامەنوسانەن، كە خزمەتی ئەجێندای وڵاتانی دوژمن و نەیارانی گەلی كورد دەكەن و
بازرگانی و موزایەدەی هەرزانیان بە پرسی كورد و نەتەوە وە كردوە، لەوێنەی كەناڵە چەواشەكار
و ئاست نزمەكانی پارتی و دەسەڵات، كە وێنەی تەواوی كایەكانیتری ئەم وڵاتە ڕاگەیاندنیان
لەڕێگەی قۆرخكاری و میدیای زەرد و سێبەرە وە ناشیرین و بێزراو كردوە.
بۆیە بونی كەناڵی ئەهلی و پیشەیی یەكێكە لەپێویستیەكانی
ئێستای ڕاگەیاندنی كوردی، كە پابەندی ئیتیك و پێوەرە پیشەییەكانی كاری ڕاگەیاندن بێت
و توانای پڕكردنەوە یان ببێتە كەناڵی نیشتیمانی، ئەگەر ئەم دەستەواژە یان تێگەیە ڕاست
بێت.
كەناڵی"ئێن ئاڕتی"یەكێكە لەو كەناڵانەی
ناوی ئەهلی هەڵگرتوە و وا پیشاندەدات، بە پێوەرەكانی ڕاستگۆیی و بێلایەنی و هتدد..كار
دەكات، بەڵام زۆر جار پێوەرە پیشەییەكانی پێشێل كردوە، ئاساییە كەناڵی كەرتی تایبەت
یان وەبەرهێنێك بێت، بەڵام دیارە ئەم پاڵپشتیە گرفتی بۆ كەناڵەكە دروستكردوە.
لەبەرئەوەی كەناڵی كۆمپانیایەكی قازانج ویستە و
سیستەمی سەرمایەداریش تەنیا ئامانجی قازانجی دارایی كۆكردنەوەیە، ئەمە فاكتەرێكە زۆرجار
كەناڵەكە مامەڵەیەكی بازرگانی بە تەواوی پرسی نەتەوەوە بكات، بۆ پەیداكردنی ڕەواجی
پڕۆژە وەبەرهێنەرەكانی.
لەمژارێكمدا داكۆكیم لەكەناڵەكە و چاڤیكرد، بە هۆی
ئەو هێرشە ناڕەواییەی مانگی نەورۆز كرایە سەری، وەلێ بەو مانایە نایەت ڕەخنە و تێبینیم
لەسەر پڕۆژەكانی نەبێت، لەدوای كودەتاكەی 12ی ئەیلولی2015وە، بۆ سەر سەرۆك و ئەندامانی
پەرلەمانی كوردستان و دەركردنی كەناڵەكانی كەی ئێن ئێن و ئێن ئاڕتی لەهەولێر، پێوەری
هاوسەنگی تا ڕادەیەك كەوتە ژێر پرسیارەوە.
جگە لەوە دەرفەت بۆ ئەو كەس و لایەنانە لەكەناڵەكە
نائافرێنن، كە ڕەخنەیان لەسەر هاتنی عەرەب و بیانی بۆ هەرێم و گۆڕینی دیمۆگرافیاكەی
هەیە و دەترسن، چونكە كۆمپانیاكە شوقەیەكی زۆری بە عەرەب و بیانی فرۆشتوە، یان ئامادەن
بۆ فرۆشتن و لەوانەیە ئەو دەرفەتانە زیانی مادیان پێ بگەیەنێت، بۆیە ئامادەن هەتا ناوی
جۆراو جۆر لەو كەسانە بنێن، كە دژایەتی ئەو پڕۆژانەیان دەكەن، بۆ ئەوەی خۆیان زیانی
مادی نەكەن، نەك بە پێچەوانەوە كەواتە پێوەرەكانی پیشەیبونی كەناڵەكە دەكەوێتەوە ژێر
پرسیارە وە.
ئێن ئاڕتی 2 كەناڵی سەرقاڵكردن و گەمژەكردنی خەڵكە،
بەرنامەی ئێوارانیان بە پرسیاری سادە و بێ ناوەڕۆك و هێنانی كەسی بیانی و نەناسراوی
وا پڕ دەكەنەوە، وا هەست دەكەیت دەیانەوێت ناوبانگ بۆ كۆمەڵێك كەس پەیدا بكەن، نەك
بە ئامانجی هوشیاری و زانیاری دانە بینەر.
دنیایەك ناڕەزایی لەسەر دوبلاژە توركی و بیانیەكانیان
هەیە و دەزانن خەڵك لەو بەرنامە و دۆبلاژانە ناڕازییە و ئاسایشی پەروەردەیی و كۆمەڵایەتی
كۆمەڵگە دەخەنە مەترسیەوە و هەر ئەم بەرنامە بێسەر و بەرانەی خۆیان هۆكارێكبون، بۆ
پەلامارەكەی چاڤی لەجەژنی نەورۆزی ئەمساڵدا، كەچی هەر بەردەوامن لەسەر پەخشكردنیان.
وەك ئەوەی كورد هەرگیز مۆزیك و هونەری كلاسیكی نەبێت،
لەكاتێكدا كورد ئەگەر لەهیچدا دەوڵەمەند نەبێت، لەمۆزیكی كلاسیكدا زۆر دەوڵەمەندە و
هیچی لەوڵاتانی پێشكەوتو كەمتر نیە، كەچی كەناڵی دوی ئێن ئاڕتی و ئەوانیتریان نیوەڕۆیانی
هەمو ڕۆژێك گوێی گەنج و خەڵك بە مۆزیكی عەرەبی و میسری و توركی زاخاو دەدەن و تەعریب
دەكەن، بێ ئەوەی ڕەچاوی ئاسایشی نەتەوەیی و فەرهەنگی كۆمەڵگەی كوردی بكەن، ئەمانە گرفتی
زۆرێك لەكەناڵی ڕاگەیاندنە، بەڵام چاوەڕێی زۆر باشتر لەوان لەئێن ئاڕتی دەكەین، بۆیە
بەم جۆرە ڕەقە ڕەخنەی لێدەگرین.
ڕاگەیاندن بە گشتی لەم پێواژۆی قەیران و گرفتانەی
كوردی پێدا تێدەپەڕێت، هەلێكی زۆری لەبەردەمدا بوە، كە جیا لەگەیاندنی زانیاری و ڕوماڵی
ڕوداو و هەواڵ، دنیایەك كاری لەسەر هوشیاری ڕامیاری و كۆمەڵایەتی و پەروەردەیی و هوشیاری
و فەرهەنگی بكردایە و بە ئەركی پیشەیی خۆی هەستایە، ئێستا كەناڵە حزبیەكان هێندەی دەم
و چاوی بەرپرسەكانیان، خۆیان لای بینەر و گوێگر و خوێنەر ناشیرینكردوە و بە باكگراوندێكی
حزبیەوە كاریان كردوە.
هیچ یەكێك لەپێوەرەكانی ڕۆژنامەوانی كەناڵەكانمان
ناگرێتەوە و توانای تێپەڕاندنی سنوری حزب و كۆمەڵگەیان نەبوە، هەروەكو چۆن ڕێكخراوەكانی
كۆمەڵگەی مەدەنی و ژنان و تۆڕ و گروپەكانیش بە هەمانجۆرن.
كورد پێویستی بە كەناڵی ئەهلی و سەربەخۆ و بابەتی
هەیە، كە پیشەی ڕۆژنامەگەری خۆی باش ڕابهێزێت و بەرپرسیار بێت، تەنیا ئاسایشی نەتەوەیی
و كۆمەڵایەتی و پەروەردەیی كۆمەڵگە هەژمونداری بكات و بیپارێزێت، ئەگەر نا تێنەپەڕاندنی
ئەم قەیرانەی ڕاگەیاندنی تێدایە و لەجیاتی كاری پیشەیی، بونەتە دەزگای سانسۆر كار و
كۆپیكردنەوەی بیری حزب و دابەشكردنی كۆمەڵگە بە پێوەرەكانی خێڵ و نابەرپرسیار مەترسیدارە
و دەرەنجام كۆمەڵگە و تاكێكی نابەرپرسیار و شەڕانگێز و دەبەنگ و ناهوشیار و شپرزە بەرهەم
دەهێنن، كە پێویستە لایەنە پەیوەندیدارەكان ڕێگریان لێ بكەن.