فەرمانەکەی پارێزگار پێچەوانەی بڕیارەکەی ڕۆژی١١/٨/٢٠١٥ی ئەنجومەنی پارێزگای سلێمانیە، هەرچەندە ئەم بڕیارەیش کاتی بو و بەنیازن هەمواری بکەنەوە، نازانرێت ئەنجومەنیش لەسودی خەڵک هەمواری دەکەنەوە یان فەرمانەکەی پارێزگار تەواو دەکات، نازانم پارێزگار بۆچی پەلەی بو فەرمانی تاپۆکردنی زەوی و خانوی کورد لەسەر ئەو عەرەب و بیانیانە دەربکات، کە جگە لەپێۆژۆی ڕژێم کۆمەڵکوژ و گوللەباران و کیمیابارانیانکردین، ئێستایش بودجە و موچەی خەڵکی کورد و پێشمەرگەیان بڕیوە و لە١٧% ئاسایی بەشە دەرمانی کورد نانێرن، زۆرترین بەشە دەرمانی نەخۆشخانەکانی کوردستانیش بۆ عەرەبی بە ناو ئاوارە بەکاردەهێنرێت.
ئەوانەی ئەو فەرمانەیان دەکردوە، با بچن فشار لەبەغدا و کوردانی پەرلەمانتاری ئەوێ بکەن، زمانی کوردی لەپەرلەمانی عێراق بەکار بێنن و بودجەی پەرەپێدانی پارێزگاکان و بودجە و دەرمانی کورد ڕەوانە بکەن، کە لەدەستوری عێراقدا پەسند کراوە و بەغدا جێبەجێی ناکەن، حزب و حکومەتی هەرێم با بچن زەوی و خانو و موڵکی کەرکوک و ماددەی١٤٠ لەعەرەب و تورکمان بکڕنەوە و سیمای کورد بونیان بۆ بگەڕێننەوە، نەک بە بیانوی دەستوری عێراقەوە سەرقاڵی دۆڕاندنی ناسنامەی سلێمانیش بن.
کورد مافی خۆیەتی بە ئاسانی جێگەی عەرەب و بیانی لەکوردستان نەکاتەوە، سەد ساڵە بە تایبەتیش باشوری کوردستان قوربانی ڕاگواستن و کوشتن و لەسێدارەدان و جینۆساید و کۆمەڵکوژی و ئەنفال و سڕینەوەی زمان و فەرهەنگی کوردیە، بەردەوام مەترسی لەسەر گۆڕینی دیمۆگرافیاکەی هەبوە و هەنوکەیش هاتنی بە لێشاوی عەرەب و تاپۆکردنی خانو و زەوی کورد لەسەریان، بە پێی فەرمانەکەی پارێزگار ئاسانکاری بۆ گۆڕینی دیمۆگرافیای کوردستان و جەنگی خوێناوی دەکات.
کۆچی بە لێشاوی جولەکە بۆ فەلەستین لەمیسرەوە و تورکی عوسمانی بۆ قوبرس و باڵکان هتد..نمونەی دیاری گۆڕینی دیمۆگرافیان و کوردیش لەم تاوانە بێبەش نەبوە، لەپشت فەرمانەکەی پارێزگارە وە کۆمەڵێک بازرگانی حزبی و وەبەرهێنەری نا نیشتیمانی سەرانسەر و بێ بیری نەتەوەیی و هەرزە خۆیان مەڵاس داوە، بە تەنیا پرسی ئابوری و گیرفان و غەریزەی گەدە خستونیەتە جوڵە و بە نیازن بە کورتترین ماوە و کەمترین کات تەواوی جومگە نەتەوەیی و نیشتیمانیەکان لێکهەڵبوەشێنن و بیفرۆشن.
لەدوای ڕاپەڕینەوە نرخ و بەهای هیچ دەستکەوت و تێکۆشان و شەهید و پێشمەرگە و زیندان و یاسا و سەروەت وسامانی سروشتی کوردستان و منداڵ و ژن و گەنج و فیداکاری خەڵک و ئابوری و فەرهەنگ و زمان و ئاین و جوگرافیای ئەم وڵاتە، هەتا نرخی ئاسمان و زەوی و هەوا و پیشە و پلە و خوێندن و بازاڕ و هاونیشتیمانی و ڕێز و حورمەتە نەتانهێشت، شکۆی کوردتان شکاند، دڵ و ڕۆحی تاک بە تاکی ئەم گەلەتان ورد کرد، قەیران و نەهامەتی نەما بەسەرمان نەهێنن.
ئەم گەلە چالاکی و خۆپیشاندان و ناڕەزایی نەما دژتان نەیکات و دادگا و شەقامتان لێنەگرێت، ئێوەی ناو دەسەڵات و حزب و حکومەت و سەرۆکی هەرێم یان وەڵامیان نادەنەوە و برسیان دەکەن، یان بە گوللە گیانیان دەکێشن.
هەر ناسنامەکەمان لەدەست نەداوە، بە نیازن ئەویش بفرۆشن بۆ گیرفانتان؟، ئەوانەی پاساو بۆ ئەم فەرمانی بە عەرەبکردنەی کوردستان دەهێننەوە و دەڵێن پارێزگای سلێمانی قەیرانی ئابوری خنکاندویەتی و پێویستە خانو و موڵکی کورد لەسەرعەرەب و بێگانە تاپۆ بکرێت، هەر بۆ ئەوەی جموجۆڵێکی ئابوری بخەنە بازاڕە وە، یان بازرگانی گیرفانن، یان کاڵفام و ناهوشیارن و بون بە ژێر هەژمونی لێشاوەکەوە، ئەگەر نا مرۆڤی شەرافەتمەند و مەرد و هوشیار پەسندی ناکات.
ئێن ئاڕتیش لەپێناو فرۆشتی شوقەکانیان و برەوستاندنی کاری بازرگانی کۆمپانیا و وەبەرهێنانە نانیشتیمانیەکەیان، ناتوانێت بە حیکایەتێکی بێکەڵکی شێخی ئیمارات و عەرەب پێمان بڵێت، با عەرەب بێت هەر کاتێک هەڵەیان کرد، دەریان دەکەین و لێیاندەپرسینەوە، لەکوردستانێکی بێخەمخۆر و بێ یاسا و دام و دەزگا و دەستور و حزب و تاکی هوشیار لەکێ دەپرسیتەوە، ئەو پەیامە چەواشەکاریە سود بە کێ دەگەیەنێت؟.
چاوەڕێ بوین لەئەنجامی نەناردنی بودجە و موچەی کوردستان و بێباکیان لەئاست گیانفیدایی پێشمەرگە، ئەو دو ملیۆن بە ناو ئاوارە عەرەبە بگەڕێننەوە و هەڵوێست نیشانی بەغدا بدەن، لێ فەرمان بۆ سەر لەنوێ دروستکردنەوەی عێراقی عەرەبی دەردەکەن، نابێت ڕێگە بەم تاقمە بدرێت لەڕێگەی جوڵاندنی پارێزگارێکی بێدەسەڵاتەوە سلێمانی هەراج بکەن، دەبێت ئەنجومەنی پارێزگا پەسندی نەکەن و گۆڕان و یەکێتیش ڕێگە بەم تاقمە نەدەن، ئەم فەرمانە بەعسیانەیە بکەنە یەکەم دەستە گوڵی ڕێکەوتنەکەی ئەوان و زەمینەی بە عەرەبکردنی پارێزگای سلێمانی و هەمو کوردستان کوێر بکەنەوە.