پارێزگاری سلێمانی فەرمانی ژمارە(6448)ی لەڕۆژی6/6/2016،
بە ئامانجی گوایە گەشەپێدانی بواری گەشتیاری و بوژاندنەوەی ئابوری پارێزگای سلێمانی
و دەربازكردنی قەیرانە كەڵەكەبوەكانی ئەم شارە دەركرد، فەرمانەكە لەسەر پێشنیاری ژوری
بازرگانی و یەك دو باڵی حزبەكەی و توێژێك لەبازرگانی حزبی و كۆمپانیا و سەرمایەدار
بە پەلە لەڕۆژی 3/6، كە ڕۆژی هەینی بو دەركرد و ڕۆژی 6/6 خێرا كرا بە فەرمان, تایبەتە
بە "تۆماركردنی شوقە و خانو و موڵك بە ناوی هاوڵاتیانی عەرەبی عێراقی و بیانی،
وەك هاوڵاتیانی سلێمانی مافی كڕین و تاپۆكردنی موڵكیان هەبێت، دوای پارێزگار ڕایگەیاند،
بە مەرجی ئاسایش و ڕەزامەندی ئەوان ڕێگە بە تۆماركردنی خانو و تاپۆكردن دەدەن، وەك
ئەوەی نەزانین ئاسایش چۆن بەڕێوە دەبرێن.
جارێ قەیرانە دەستكردەكانی ئەم شارە دەرەنجامی ململانێ
و ناكۆكیە حزبیەكانی ئێوەن و خەڵك مەجبور نیە باجی ناكۆكیەكانی ئێوەی لایەنە حزبیەكان
بدات و ناسنامە و دیمۆگرافیاكەیشی لەدەست بدات و بیكاتە قوربانی گیرفان و گەدەی كۆمەڵێك
بازرگانی حزبی و چاوچنۆكی كۆمپانیای نیشتەجێبون و سەرمایەدار.
فەرمانەكەی پارێزگار بە مەبەستی گەشەپێدانی بواری
گەشتیاری و ئابورییە، كەچی لەناوەڕۆكیدا باس لەتاپۆكردنی خانو و شوقە لەسەر عەرەب و
بیانی كردوە، ڕون دەبێتەوە ئامانجی فەرمانەكەی پارێزگار گەشەپێدانی ئابوری نیە، بەڵكو
فەرمانەكە پێشنیارێكی دەمامكداری ژوری بازرگانی و ئەو كۆمەڵەیە، كە هەوڵیانداوە بە
ناوی بوژاندنەوەی ئابوری و گەشتیاریەوە، ڕێگە بۆ تاپۆكردنی خانو و شوقە بكەنەوە، تا
پڕۆژەكانی خۆیان بفرۆشن و لەو شكستەی تێیكەوتون ڕزگاریان بێت، گەشەپێدانی بواری گەشتیاری
پەیوەندی بە تاپۆكردن و فرۆشتنی خانو و شوقەوە چیە؟، ئەگەر بۆ پڕكردنی گیرفانی كۆمەڵێك
مافیا و بازرگان نەبێت، گەشتیار بۆ گەشتكردن و كات بەسەربردن و بینینی شوێنی گەشتیاری
و مێژوی و ئاینی و هتد.. دێت، یان بۆ كڕینی خانو و شوقە؟.
فەرمانەكە نابێتە هۆی بوژاندنەوەی ئابوری و بواری
گەشتیاری، تەنیا مەرامی شاراوەی ئەو كۆمەڵە سەرمایەدار و خاوەن كۆمپانیا و بازرگانە
حزبیانە مەیسەر دەكات، كە بونەتە هۆی دەركردنی فەرمانەكە و پارێزگاری سلێمانیش وەك
دەڵێن (كەوتۆتە ناو پاقلەكەوە)، هەردو ڕاگەیاندنی گۆڕان و یەكێتیش لەدوای دەرچونیەوە
بەردەوام كار لەسەر جێبەجێكردنی فەرمانەكە و ڕاهێنانی خەڵك لەگەڵ ئەم فەرمانە شومە
دەكەن، كە جێگەی داخە و نەدەبوایە خەڵكیان تەنیا لەسەر تێركردنی بواری ئابوری و گیرفان
و گەدە ڕابهێنایە، بۆچی بە نیازن تاكەی قەیرانی ئابوری لەكوردستان و سلێمانی بە تایبەتی
بەردەوام بێت، وا ناچار بون پەنا بۆ ئەم فەرمانە بەرن؟، ئایا ئاگاداری مەترسییە زەوەندەكانی
فەرمانەكە لەڕوی سیاسی و دیمۆگرافی و نەتەوەییەوە هەن؟، لەكاتێكدا فەرمانەكە تەنیا
خزمەتی عەرەب دەكات و كورد هێندەی تر پەراوێز و بۆ هەتایە دەبێت هەر خۆی بە كەم و بچوك
تەماشا بكات.
هەندێك بەرپرسی بازرگانی گیرفان پێیانوایە، ئاساییە
ئەگەر نزیكەی دە هەزار عەرەب بێنە سلێمانیەوە ببنە خاوەنی موڵك، وەك ئەوەی هەر ئەم
دە هەزارە بن و زیاد نەكەن، بێ ئاگا لەوەی عەرەب كلتوری فرە ژنی و منداڵی زۆر و هەمەجیەتیان
هەیە و لەماوەی ساڵێكدا توانای زیادبونیان لەكورد گەشەكردو ترە و كلتوری خێڵ و تایەفەگەری
و كوشتن لەسەر ناوی عەلی و عومەر و ژن كوشتن و سەلەفیەت و نیقاب و حیجاب و دسداشە و
نەعل و عەقڵی بیابانمان بە دیاری بۆ دێنن، تێناگەم بۆچی عاشقی ئەم كلتورەن؟.
ئێمەی كورد تا ئێستا دۆزی نەتەوەییمان لەگەڵ ئەو
عەرەبە هەیە، كە تا ئێستا لەكەركوك و خورماتو و زومار جینۆسایدمان دەكەن و لەسلێمانی
و هەولێریش، كە بە ناوی ئاوارەوە هاتون، بە چاوی دو تەماشاممان دەكەن و ڤایرۆسی ئاژاوە
و تایەفەگەری و مەزهەبگەری بڵاو دەكەنەوە، ئەم كۆمەڵە سەرمایەدارە چەماوەیە، بۆچی ئەو
هەمو كارەساتەی ڕۆژانە كەركوك و ناوچەكانی ماددەی 140بە دەست عەرەبەوە دەیچێژن، نایانجوڵێنێت
و خوازیارن ئەو كارەساتانە بۆ سلێمانیش بهێنن؟.
فەرمانەكە تەنیا بەرژەوەندی ئەو توێژە دیاریكراوەی
تێدایە و شوقەی كۆمپانیاكانی نیشتەجێبونیان ساغ دەكەنەوە و دەبێتە هۆی بەرزبونەوەی
كرێی خانو و زەوی و شوقە و ئیتر چینی كەمدەرامەت توانای كڕینی خانو و زەویان هەر نامێنێت،
ئایا پارێزگار و بەرپرسان بەرپرسیارێتی ئایندەی ئەم میللەتە دەگرنە ئەستۆ، عەرەب تێكەڵ
بە كورد بكەن و پێكدادان و كوشت و بڕی نەتەوەیی و مەزهەبی ڕونەدات و كورد جارێكیتر
لەلایەن عەرەبەوە جینۆساید نەكرێتەوە؟.
پارێزگاری سلێمانی وتویەتی، لەدەركردنی فەرمانەكەدا
پشتی بە دەستوری عێراق بەستوە، زۆرێك لەمافەكانی كورد لەدەستوری هەمیشەیی عێراقدا چەسپێنراون،
بەڵام جێبەجێ ناكرێن و بە پلەی یەكەم عەرەب دەستوری پێشێلكردوە، بۆچی پارێزگار و بەرپرسانی
كورد داوای جێبەجێكردنی ئەو ماددە دەستوریانە و كێشە هەڵپەستراوەكان ناكەن، لەوێنەی
بودجەی پێشمەرگە و ماددەی 140 و سنوری كوردستان و نەوت و غاز و زمانی كوردی؟، بۆچی
لەوەها فەرمانێكی شومدا دەستوری عێراق دەكەنە پاڵپشت و كورد دەبێتە پارێزەری دەستور؟،
لەكاتێكدا لەهیچ شوێنێكی ئەم عێراقە وێرانەدا، یاسا و دەستور كاری پێناكرێـت، تەنیا
كوردە باسی دەستوری عێراق دەكات.
لەچەند ساڵی ڕابردودا بەڕێز(عەبدولڕەحمان سدیق)
پێشنیاری دەركردنی یاسای پاراستنی زمانی كوردی لەپەرلەمان كرد، هیچ لایەنێكی حزبی ئاوڕی
لێنەدایەوە، بۆ ئەوەی زمانی كوردی نەبێت بە ژێر هەژمونی وەبەرهێنانی بیانی و ئابورییەوە
و بپارێزرێت؟، نابێت سلێمانی ئەم فەرمانە بەعسیانەیە پەسند بكات، سلێمانی لەساڵی1924وە
عێراقچێتی ڕەتكردۆتەوە و داوای سەربەخۆیی ژیانیكردوە.
فەرمانەكە جیا لەوەی دەبێتە هۆی بەرزكردنەوەی نرخی
شوقە و خانو و زەوی، هۆكارێكیشە بۆ سپیكردنەوەی پارەی ڕەشی عەرەب و بیانی لەشاری سلێمانی،
كە چەندین كارەسات بە دوای خۆیدا دەهێنێت و دیسانەوە چینێكی زۆر هەژار و زۆر دەوڵەمەند
تۆخ دەبنەوە و ناچار گەنجەكانمان بەهۆی نەبونی هەلی كار و بێكاری و بێ پارەیی و گرانی
بازاڕ و بە پارەكردنی تەواوی بوارەكان، دەبێت ڕێگەی كۆچ بگرنەوە بەر و ببنەوە بە خۆراكی
دەریاكان.
لەجیاتی پەنابردن بۆ عەرەب و تاپۆكردنی كوردستان
لەسەریان، حزب و بەرپرسانی ئەم شارە دەتوانن داوا لەچەند كۆمپانیایەكی نێودەوڵەتی متمانەپێكراوی
نا گەندەڵ بكەن، كەرتی گەشتیاری و ئابوری كوردستان ببوژێنەوە، تا ئەو كاتەی وەبەرهێنەر
و سەرمایەی كوردی دەكەوێتە سەر پێ و ئەوانیش بۆ شوێنی خۆیان دەگەڕێنەوە.
ژوری بازرگانی و كۆمپانیاكانی نیشتەجێبون دەتوانن
نرخی شوقەی كۆمپانیاكانیان دابەزێنن و كوالیتی كەرەستەی پڕۆژەكانیان باش و پێشبخەن
و خزمەتگوزاری بۆ بەشدارەكانیان دابین بكەن و ڕاستگۆ بن لەگەڵیاندا و هەوڵی فرۆشتن
و هەراجكردنی سلێمانی نەدەن.
دەركردنی فەرمانەکە پەیوەندی بە پیلانە ناوچەیەكان
و زیادبونی ناكۆكی سوننە و شیعەوە هەیە، كە لەدوای شەڕی داعشەوە دەیانەوێت سوننە بەهێز
بكەن و كوردستانیان بۆ بكەنە وڵاتی دوهەم و كورد وەك ماری سڕ گەورەیان بكات، تا ئەو
ڕۆژەی پێوەی دەدات.
دەڵێن لەهەولێر چەند ساڵە ئەم فەرمانە جێبەجێ دەكرێت
و كاریگەری خراپی نەكردوە، پشتگیری بڕیارەكەی پارتی دەكەن، كە هەمو كوردستانی كردۆتە
قوربانی كورسیەكەی بارزانی!!!، بێ ئاگا لەوەی دیمۆگرافیای پارێزگای هەولێر هێندە خراپ
گۆڕاوە، كە بەغیلی پێنابرێت.
نمونەی ژمارەیەك وڵاتی وەك ویلایەتە یەكگرتەوەكانی
ئەمریكا و ئەڵمانیا و توركیا دەهێننەوە و بە باشوری كوردستانی بەراورد دەكەن، یان لەكاتی
گفتوگۆدا بە ناو توێژی دەستەبژێر دەڵێن، ئاساییە با عەرەب بێن، خۆ لەبەرینانیا و ئەمریكایش
وایە، هێندە ئینتیما و هەستی نەتەوەییان لاوازە و هەر دروست نەبوە، كە وا هەست دەكەن،
كورد و عەرەب هەمیشە برا بون، نازانن كورد شەڕی دۆزی نەتەوەیی لەگەڵ عەرەب بەردەوامە
و جینۆساید و كۆمەڵكوژ و كیمیابارانیكردوە و لەستەمی عەرەب و عێراق تێنەگەیشتون.
توركیا دەوڵەتی ئەوەیە بە ئاسانی و بێ بەرامبەر
زەوی بە وەبەرهێنەرانی بیانی بدات، فرۆشتنی زۆر شوقەی لەئەستەمبوڵ و شارە توركیەكان
بە كوردانی باشور و پارچەكانیتر بە مەبەستی دورخستنەوەیانە لەكوردبون و سڕینەوەی ناسنامە،
لەتەواوی ئەو وڵاتانە زمانی ستانداری فەرمی و دام و دەزگای پتەوی سیاسی و ئاسایشی نەتەوەییان
هەیە و بەهێزن، كە ڕێگە بە سڕینەوەی ناسنامەی نەتەوەیان نادات، بۆیە ئاساییە وەبەرهێنی
بیانی ڕویان تێبكەن، ئوردون و مالیزیا و ئەندەنوسیا چی مەترسیەكی دوژمنكاری و سڕینەوەی
ناسنامەیان لەسەرە؟، ئەم بەراورد كردنانە تەنیا بۆ چەواشەكاری خەڵكە.
چونكە ئامانجیان بوژاندنەوەی ئابوری و گەشتیاری
نیە، بۆیە بەردەوام قسە لەسەر پەرەسەندنی خواست لەسەر خانوبەرە دەكەن، كە دەبێتە هۆی
بوژاندنەوەی بێ بازاڕی و ئەمریكا بە نمونە دێننەوە، بە پێچەوانەیشەوە بێ بازاڕی ڕودەدات،
هەر وڵاتێك یاسای پاراستنی دیمۆگرافیا و ناسنامەی نەتەوەییان هەیە و ئامادە نین، داگیركار
و جەللادەكەیان بكەن بە هاوبەشی ژیانیان، هەمویان مەرجی قورسیان بۆ فرۆشتنی موڵك هەتا
بۆ هاوڵاتیانی خۆیشیان هەیە، وڵاتانی وەك ئەڵمانیا و ئەمریكا و بەریتانیا و توركیا
و ئوردون و ئەوانیتر، سیستەمی بانكیان پێشكەوتو و كارایە و باجیان بە شێوەیەكی سیستەماتیك
كار دەكات و وەبەرهێنی بیانی ناچار بە باجدان بەو وڵاتە و بە سیستەمێكی ڕێكوپێكی بانكیەوە
خزمەتی وڵاتەكەی خۆیانیان پێدەكەن، ئایا ئەم سیستەمە لەكوردستان هەیە؟.
سلێمانی بە دەست كۆمەڵێك قەیرانی جگە لەئابوری و
دارایی، بە ناكۆكی حزبی و باڵ باڵێنەوە دەناڵێنێت و بانك و دارایی و بڕیارە گرنگەكان
قۆرخكراون، وەبەرهێنی بیانی چۆن پابەندی خزمەتكردنی سلێمانی و كوردستان دەكەن؟، لەساڵانی
ڕابرد و تا ئێستایش وەبەرهێنی بیانی بە چڕی لەهەرێم كاریانكردوە و قازانج دەكەن، كام
پڕۆژەی گرنگیان ئەنجامداوە و كوا سەرمایەی بیانی و وەبەرهێنانەكانیان بۆ كورد؟، هەر
وەبەرهێنەرانی بیانی و تورك و عەرەب نەبون، بە هۆی سیستەمی داتەپیوی سیاسی و ئابوری
هەرێمەوە، بە جانتای پڕ لەپارە و سەرمایەی كوردستانەوە پڕۆژەكانیان لەنیوەیدا بەجێهێشت
و ڕایانكرد، لەوانە پرسرایەوە و سەرمایەكە بۆ كورد گەڕێنراوەتەوە؟، بۆیە لەمە زیاتر
خەڵك چەواشە مەكەن و دەبێت فەرمانەكە هەڵبوەشێننەوە، ئەگەر نا خەڵك پێتان هەڵدەوەشێنێتەوە.