من ھەندە عاشقی تۆپی پێ نیم ، تەنھا سەیری دوا یاریەکانی جامی جیھانی دەکەم و ، حەتمەن سەیرکردنی تۆپی پێ جۆرە بەختەوەری و خۆشیەک دەبەخشێتە جەماوەرەکەی و، ئەستێرەکانی تۆپی پێ زۆر خۆشەویستن لای جەماوەرەکەیان، کە ئەگەر یەکێکیان بمرێت ، وەک ئەوە وایە کە کەسێکی خۆشەویستیان مردبێت ، بەلام خۆشەویستی مارادۆنا ، ھەر تەنھا لە چوارچێوەی جەماوەری تۆپی پێ نیە ، بەلکە لەو جوغزەدا تێپەریوە.
مارادۆنا خەلکی ئەرجەنتینی ئەمەریکای لاتینە ، گەلانی ئەمەریکای لاتین بە زۆربەی گەلانی خۆرھەلاتی ناوەراست ، لەنێویاندا کوردستان دەچن ، جوھەری ئەو لێکچوونە لە « شەیداییان بۆ بیری پالەوانی نەتەوەیی» ئێمە سەردەمانێک زۆر سەرسام بووین بە« گیڤارا» و«کاسترۆ» و کتێبە شورشگێریەکانی« ریجێ دۆبرێ» لەسەر ئەمەریکای لاتین و شاعێر و ئەدیبانی ئەوێ ، جیھان بەگشتی لە سیاسەتمەدا و شاعێر و ھونەرمەند و بزنسمان و ھەژار و مندالانی سەرشەقام و پیاوانی ئایینی و پیاوانی مافیا!! بە خەمەوە پێشوازیان لە مردنی مارادۆنا کرد ، ئەم پێشوازیە بۆ ھیچ وەرزشوانێک نەکراوە ، من چەندان لێدوانی ئەو ئەستێرەیەم گوێ لێبووە ، کە بەرگری زۆری لە کێشەی گەلانی ستەملێکراو بندەست کردووە و، داکۆکی لە ھەژار و خەلکی پەراوێزکراوی ولاتەکەی و جیھان دەکرد ، خەلکە ساکار و ھەژارەکەی ئەرجەنتین مارۆدۆنەیان بە عەرشی تۆپی پێی جیھان دادەنا و ، ئەمیرێک بوو لەناو دلیان ، کە داوای ژیانێکی سەربازانەی بۆ دەکردن ، ئەو داوایە نەک ھەر بۆ خەلکی ھەژاری ولاتەکەی دەکرد ، بەلکو بۆ تەواوی جیھان ، گەلانی ئەمەریکای لاتین وەکو ئێمەن لە پالەوانی نەتەوەیی دەگەرێن ، کە لە دەوریان بالە فرکێ بکات ، ئەوان وەکو ئێمەن ، توانای ھەلدانەوەی ھەموو ھەلە و کێماسیەکی ئەو پالەوانەی خۆشیان دەوێت ھەیە ، ھەروەک لەگەل مارادۆنا ئەوەیان کرد.
لە تەلەفزیۆن لە کەنالی«ناشنال جوگرافیک» فیلمێکی دیکۆمنتاری- م لەسەر ژیان و کوژرانی« پاپلۆ ئسکۆپار» گەوەرە بازرگانی تلیاک لە کۆلۆمبیا بینی، بینیم ئەو خەلکە چۆن تەمجیدی ئەو گەورە بازرگانە تلیاک فرۆشە دەکەن و ، چ خۆشەویستیەکیان بۆی ھەبوو! ئسکۆپار کاری خێرخوازی دەستبلاوانەی بۆ ھەژار و لێقەوماوانی کۆلۆمبیا دەکرد و، پارێزەری گەرەکە ھەژار نشینەکانی ئەو ولاتە بوو.
جیا لە مارادۆنا ، کە بە بیری سیاسی و مرۆیی بانگەوازی دەکرد ، لە میانی گەشتەکانی بۆ سەرانسەری جیھان ، بابلۆ تێکەلی جیھانی سیاسەت بە شێوەیەکی واقیعی و پراکتیکی بوبووەوە و ، توانی کورسیەک لەناو ئەنجوومەنی نوێنەران بەدەست بھێنێت و ، پاشان دەریانکرد ، بەلام ئەمە رێگەی لێنەگرت ، بۆ بەردەوامی یارمەتیدانی ئەو ھەموو ھەژارەی لەدەوروبەری بوون ، تاوایلێھات بوونە ھاوسۆز و ھاوکار لەگەل باندەکەیدا ، ئەو باندەی ھەژاران بەرگریان لە « ئسکۆپار» ھەر لە ماوەی ژیانیەوە تا کوژرانی ، بە ھەول و کۆششی« سی، ئای، ئەی» و سوپاو پۆلیسی ئەمەریکا و بە ھاوکاری سوپاو ھێزە ئەمنیەکانی کۆلۆمبیا ، لەگەل بلاوبوونەوەی کوژرانی ئسکۆپار ، ماتەمینی زۆربەی گەرەکە ھەژارنشینەکانی کۆلۆمبیای گرتەوە... تا ئێستاش ئسکۆپاری« ئیمراتۆریەتی ماددە ھۆشبەرەکان» پادشای سەر دلی خەلکە ساکار و ھەژارانی ئەمەریکای لاتینە ، ھی ئەو دلانەی کە ئەگەر لە دونیای سیاسەتدا پالەوانێک نەدۆزنەوە بتوانێت لە دەورایان بێت، بەرەو جیھانی موخەدەرات و تۆپی پێ دەرۆن.
«ئیدوارد گالیانۆ» ی گەورە رۆمانووسی ئۆرگوایی ، چەپرەو و جەنگاوەرە توورەکەی سەرمایەداری رۆژئاوا بەم شێوەیە باسی مارادۆنا دەکات :جادووگەرێک بوو تەحەدای لۆژیکی زانست و ئەگەرەکانی دەکرد ، فەیلەسوفێک بوو مانای راستەقینەی یاری دەزانی ، ھەر تەنھا کەرەکەی لە سنووری گۆرەپانی یاری نەبوو ، بەلکە شۆرشگێرێک بوو ملیۆنەھا کەسی بێناو و بێروخسار عاشقی بوون ، بەلام لەھەمان کاتدا ، ئەو پیاوە مەشخەلی رووناکەرەوەی ھیوای خەلکە پەراوێزکراوەکانی ھەموو جیھان و ھەژاران و بەشخوراوان و قوربانیانی کەلەگاکان بوو.