سه‌رۆكایه‌تی‌ په‌رله‌مانی‌ كوردستان راگه‌یه‌ندراوێك بڵاوده‌كاته‌وه‌، كه‌ تیایدا  سەبارەت بە دۆخی کۆبانی، رایده‌گه‌یه‌نێت "ماوەیەکە ناوچه‌ی‌ کۆبانی لە رۆژئاوای کوردستان لە لایەن گروپه‌ چەکداره‌كان روبەڕوی پەلامارێکی رێکخراوی رۆژانە بوەتەوە و بەهۆیەوە هەڕەشەی جیدی لە سەر خەڵکی سڤیل و خۆراگری ئەو ناوچەیە دروست بوە".


ده‌قی‌ راگه‌یەندراوه‌كه‌:

 سەبارەت بە دۆخی کۆبانی ماوەیەکە ناوچه‌ی‌ کۆبانی لە رۆژئاوای کوردستان لە لایەن گروپه‌ چەکداره‌كان روبەڕوی پەلامارێکی رێکخراوی رۆژانە بوەتەوە و بەهۆیەوە هەڕەشەی جیدی لە سەر خەڵکی سڤیل و خۆراگری ئەو ناوچەیە دروست بوەو و ئەو ئارامی و ئازادیەی کە لە ماوەی رابردودا لەو ناوچەیەدا بەرقەرار بوە روبەڕوی مەترسی بوەتەوە.

ئەوەی جێگەی مەترسیە ئەو پەلامارانە بەوردی نەخشەی بۆ داڕێژراوەو بە چەکی قورس و ئەو جبەخانە زۆروزەبەندە ئەنجام دەدرێت کە گروپه‌ چەکداره‌كان لە عێراق دەستیان کەوتوە.

سەرۆکایەتی پەرلەمای کوردستان وێڕای دەست خۆشی لەو بەرخۆدان و خۆڕاگریه‌ی کچان و کوڕانی گەلەکەمان لەو بەشەی کوردستان کە بونەتە قەڵغان بۆ پاراستنی ئەو دەسکەوت و ئازادیه‌ی کە بە خوێنی خۆیان بە دەستیان هێناوە، لە هەمانکاتدا داوا لە هەمو هێزە سیاسیەکانی رۆژئاوای کوردستان دەکەین هەرچی زوە ناکۆکی و ململانێکانیان بەلاوە بنێن، و لەو هەلومەرجە دژوار و ناسکەدا کە هەڕەشە لە ئایندەی گەلەکەمان دەکرێت، یەک دەست و یەک هەڵوێست روبەڕوی مەترسیەکان ببنەوە و رێگە به‌دوژمنانی کورد نەدەن مەرامەکانیان بێنەدی.

هاوکات داوا لە رێکخراوی نەتەوە یەکگرتوەکان و یەکێتی ئه‌وروپا و کۆمکاری عەرەبی دەکەین بە بەرپرسیارێتیەوە بڕواننە دۆخی کوردانی رۆژئاوا و هەڕچی زوە دەرگای هاوکاری و یارمەتیە مرۆییەکان بەڕوی خەڵکی کۆبانیدا بکەنه‌وە، و رێگە لە رودانی کارەساتێکی مرۆیی و کۆمەڵکوژی له‌دژی‌ کوردانی‌ ئه‌و ناوچەیە بگرن.

 هەروەها داوا لە حکومەتی هەرێمی کوردستان وهێزە سیاسییەکانی پارچەکانی کوردستان و رێکخراوەکانی کۆمەڵی مەدەنی دەکەین هەستیاری دۆخەکە لەبەرچاو بگرن، و بەهەرشێوەیەک کە بە گونجاوی دەزانن، و پێیان دەکرێت پشتیوانی لە برا کوردەکانیان بکەن به‌سه‌رجه‌م بیروبۆچون و هێزه‌ جیاوازه‌كانیانه‌وه‌ لە رۆژئاوای کوردستان، بە زوترین کات بە هانایانەوە بچن و لەم کاتەدا ببنە پشت و پەنا بۆیان .
نه‌مری‌ بۆ شه‌هیدان، سه‌ركه‌وتن بۆ خه‌باتی‌ ره‌وای‌ گه‌لی‌ كوردستان
سەرۆکایەتی پەرلەمانی کوردستان
 13-7-2014