دەستەی گەشتوگوزاری هەرێم ڕایدەگەیەنێت" لە ماوەی ئەمساڵدا زیاتر لە چوار ملیۆن گەشتیار سەردانی شارەکانی هەرێمی کوردستانیان کردووە".
دەستەی گەشتوگوزاری هەرێمی کوردستان لە راگەیەندراوێکدا بڵاویکردەوە، لە سەرەتای ئەمساڵەوە چوار ملیۆن و ٩٣ هەزار و ٨٨٨ گەشتیار روویان لە هەرێمی کوردستان کردووە و زۆربەیان لە ناوچەکانی خواری عێراقەوە هاتوون.
ئەوەشی خستووەتەڕوو، لەو ماوەیەدا یەک ملیۆن و ٩٧٥ هەزار گەشتیار روویان لە پارێزگای هەولێر کردووە و رێژەی ٤٨٪ گەشتیارانی پێکهێناوە، بەوەش لە ریزبەندی یەکەمی سەردانی گەشتیاران بووە.
باسی لەوەشکردووە، هەریەک لە پارێزگاکانی سلێمانی و هەڵەبجە لە پلەی دووەمدان و رێژەی ٣٤٪ گەشتیارانی هاتوو سەردانیان کردووە، کە ژمارەیان یەک ملیۆن و ٣٧٥ هەزار گەشتیار بووە.
لە بەشێکی تری بڵاوکراوەکەدا دەستەی گەشتوگوزاری هەرێم روونیشیکردەوە، پارێزگای دهۆک لە ریزبەندی سێیەمدایە و رێژەی ١٨٪ گەشتیاران سەردانیان کردووە، کە دەکاتە ٧٥٤ هەزار گەشتیار.