وەزیری ناوخۆی حکومەتی هەرێم پیرۆزبای لە بەڕێوەبەری نوێی پۆلیسی سلێمانی د. ئارام محەمەد ساڵح دەکات بەبۆنەی دەستبەکاربوونیەوەو، بەم پێیە ناوبراو لە جێگای عەمید ئاسۆ شێخ تەها دادەنرێت .
لە هەژماری کۆمەڵایەتی تۆڕی X رێبەر ئەحمەد وەزیری ناوخۆی ( ماوە بەسەرچووی ) هەرێم لە پۆستێکدا دەڵێت " پیرۆزبایی لە عەمید. د.ئارام محمد ساڵح دەکەم بەبۆنەی دەستبەکاربوونییەوە وەک بەڕێوەبەری پۆلیسی سلێمانی".
لە درێژەی پۆستەکەیدا کە وەزیری ناوخۆ وێنەیەکی خۆی و بەڕێوەبەرە نوێکەشی بڵاوکردۆتەوە، دەڵێت" هیوای بەختی باش و سەرکەوتنی بۆ دەخوازین لەم پۆستە گرنگەدا".
رێبەر ئەحمەد لە کۆتایی پۆستەکەیدا جەخت دەکاتەوە " هیوادارین ڕۆڵە نوێیەکەی سەلامەتی و خۆشگوزەرانی کۆمەڵگا بەرز بکاتەوە".
عەمیدی د. ئارام محەمەد ساڵح دانیشتووی سلێمانییە، بڕوانامەی دکتۆرای هەیە لە بواری ( قانون خاص)و کەسێکی ئەکادیمی و یاساییە، پێش وەرگرتنی ئەم پۆستە نوێیە داواکاری گشتی بووە لە دادگای هێزەکانی ناوخۆ.
برازای د. عەلی سەعید سەرۆکی پێشووتری زانکۆی سلێمانی یە، برای پزیشکی ناسراو ئەریوان محەد ساڵحە.