سبەی یەکشەممە سەڕەرای ئەوەی پشووی فەرمیە دەست بە دابەشکردنی بەشێک لە تەمویلی مووچەی مانگی حوزەیرانی چەند توێژێک دەکرێت.
بەڕێوەبەرایەتیی گشتیی بانکە بازرگانییەکان سەر بە وەزارەتی دارایی و ئابووریی هەرێمی کوردستان رایگەیاند" لەگەڵ ئەوەی سبەی یەکشەممە ٧ی تەمموزی ٢٠٢٤ پشووی فەرمییە لە سەرجەم دامودەزگا حکومییەکان، بەڵام بە بڕیاری وەزیری دارایی و ئابووری دەوامی سەرجەم ئەو بانکانە ئاسایی دەبێت کە ئەرکی دابەشکردنی مووچەیان لەئەستۆدایە".
ئاماژەی بەوەشداوە کە دابەشکردنی مووچە بەپێی ئەو خشتەیەی راگەیێندراوە، وەکو خۆی بەردەوام دەبێت.
رۆژی ٤ی تەمموز وەزارەتی دارایی و ئابوری هەرێمی کوردستان ڕایگەیاند" بەشێک لە تەمویلی مووچەی مانگی حوزەیران خرایە سەر هەژماری بانکی وەزارەتی دارایی هەرێم لە لقی بانکی هەولێر".
ئاماژەی بەوەکرد، ئەو پاڕەیە بڕەکەی ( ٢٣١،٦٠٥،٥٣١،٠٠٠ ) وەک تەمویلی شایستەی مانگی حوزەیرانی کەسوکاری شەهیدان و ئەنفالکراوان و زیندانیانی سیاسی و خاوەن پێداویستیە تایبەتەکان و خانەنشینانی شارستانی و سەربازی خرایە سەر هەژماری بانکی وەزارەتی دارایی و ئابوری لە لقی هەولێری بانکی ناوەندی عێراق.