وەزارەتی ناوخۆی عێراق رایگەیاند، دوو تیرۆریست کە پشتوێنی بۆمبڕێژکراویان بەستووە، لەلایەن هێزە ئەمنییەکانەوە کوژراون.
میقداد میری، وتەبێژی وەزارەتی ناوخۆی عێراق ئەمشۆ یەکشەممە ١٥ی ئەیلوول لە راگەیەندراوێکدا دەڵێت "لە هەوڵێکی هەواڵگری و لە ئۆپەراسیۆنێکی جۆریدا، تیمەکانی هەواڵگری دوای دوو تیرۆریست کەوتوون و گەمارۆیان داون لە گەڕەکی پەنجا عەلی لە شاری کەرکوک".
دەشڵێت "دوای ئەوەی تەقەیان لێکراوە، دەرکەوتووە پشتێنی بۆمبڕێژکراویان بەستووە و بەهۆی ئەو تەقانەی لێیانکراوە، پشتێنەکانیان تەقیوەتەوە و گیانیان لەدەستداوە".
پێشتر میدیاکان بڵاویانکردبووەوە، لە شاری کەرکوک هێزە ئەمنییەکان دوای دوو کەس کەوتوون کە ماتۆرسکیلێکیان پێبووە و ئامادەنەبوون خۆیان رادەستبکەن، هێزە ئەمنییەکان تەقەیان لێکردوون و یەکێک لەو کەسانە کوژراوە و ئەوی دیکەیان خۆی تەقاندووەتەوە.