جێگری بەڕێوەبەری نەخۆشخانەی شار لە سلێمانی ڕایدەگەیەنێت" دوای سێ ڕۆژ لە وەرگرتنی چارەسەری پزیشکی، باری تەندروستی مانگرتووان جێگیرە و لە ئەمڕۆوە دەستدەکرێت بە پێدانی خواردن پێیان".
د.ئومێد هیدایەت جێگری بەڕێوەبەری نەخۆشخانەی شار لە سلێمانی، ئەمڕۆ پێنج شەممە لە کۆنگرەیەکی ڕۆژنامەوانیدا ڕایگەیاند" هەر ١٣ مانگرتووەکە پشکنین و شیکاری وردیان بۆ کراوە بە سەرپەرشتی ستافی پزیشکی پسپۆڕ، و ئەنجامەکان سەلماندیان کە باری تەندروستیان جێگیرە و هیچ مەترسییەک بۆ سەر ژیانیان نییە".
جێگری بەڕێوەبەری نەخۆشخانەی شار ڕوونیشیکردەوە: لە ڕۆژی یەکەمدا مانگرتوان ڤیتامینیان پێدەدرا، دواتر لە ڕۆژی دووەمدا کەمێک شلەمەنیان پێدەدرا، بڕیارە لە نیوەڕۆی ئەمڕۆوە وردە وردە دەست بە وەرگرتنی خۆراک بکەن، بەپێی ڕێنماییە پزیشکییەکان.
ئومێد هیدایەت ئاماژەی بەوەشکرد: دوای هەر ژەمێک پشکنینی پزیشکی ئەنجامدەدرێت بۆ دڵنیابوون لەوەی کە مانگرتووەکان وەڵامی چارەسەر دەدەنەوە.
جەختیشیکردەوە: کوالیتی ئەو خۆراکانەی کە پێشکەش دەکرێن بەپێی بارودۆخی تەندروستی هەر کەسێکیان دەگۆڕێت.
لەبارەی دەرچوونیان لە نەخۆشخانە، د. ئومێد باسی لەوەکرد: لە دوو ڕۆژی داهاتوودا باری تەندروستییان ڕوونتر دەبێتەوە، دوای ئەوە دیاریدەکرێت کێ لە نەخۆشخانە دەمێنێتەوە بۆ تەواوکردنی چارەسەرکردن و کێ دەتوانێت ڕەوانەی ماڵەوە بکرێت.