هێزەكانی ئەمریكا دیدارەكانیان لەگەڵ سەرۆك هۆزەكانی سوریا چڕتر كردوەتەوە، پسپۆڕێكی ئەمنی دەڵێت"ئەمریكا دەیەوێت ئەزمونی دروستكردنی چەكداری هۆزەكان لە سوریا تاقی بكەنەوە.
ئەحمەد تەمیمی، پسپۆڕی ئەمنی ڕایگەیاند"سەركردە سەربازییەكانی ئەمریكا لەگەڵ كەسایەتی و سەرۆك هۆزەكانی ناوچە سنورییەكانی سوریا لەگەڵ عێراق کۆبوونەتەوە، کە ئامانج لێی، كۆپیكردنی ئەزمونی چەكداری هۆزەكانە لە عێراق و گواستنەوەیەتی بۆ بیابانی سوریا".
وتیشی: ئەمریكا هەوڵی پشتیوانی كردنی هۆزەكانی ئەو ناوچانەی سوریا دەدات لە ڕێگەی پڕچەككردن و مەشقپێكردن و كۆكردنەوەی زانیاری و دروستكردنی كەناڵی لێكتێگەیشتن لەپێناو بەرەنگاربونەوەی گروپە توندڕەو و تیرۆریستییەكان لەناوچە چۆڵ و سەختەكاندا.
ئەحمەد تەمیمی دەشڵێت"ئەمریكا هەست بە نیگەرانی دەكات لە دەركەوتنی ڕێكخراوی تیرۆریستی تر لە سوریا، هەر بۆیە گرنگی دەدات بە دۆسێی هۆزەكان لەپێناو پێكهێنانی چەكداری هۆزەكان بۆ یارمەتیدان لەڕاوەدونانی تیرۆریستان و پاراستنی بنكە سەربازییەكانی".