سەرۆکایەتی دادگای تێهەڵچونەوەی ناوچەی کەرکوک/ گەرمیان، دەڵێت" ڕێکاری یاسایی دژی ئەو کەسانە دەگرێتە بەر کە باڵندەی شاهینیان ڕاوکردوە"

ئەمڕۆ، ١٩ تشرینی یەکەم ٢٠٢٥، سەرۆكایەتی دادگای تێهەڵچونەوەی ناوچەی كەركوك/گەرمیان، سەبارەت بە ڕاوکردنی باڵندەیەکی شاهین لە گەرمیان، ڕایگەیاند "دوای بڵاوبونەوەی گرتە ڤیدیۆیەك لەتۆڕە كۆمەڵایەتییەكان كەتیایدا باسی ڕاوكردنی باڵندەیەك كراوە، پەڕاوی لێكۆڵینەوە بۆ تۆمەتبارانی ئەو ڕووداوە كراوەتەوە و رێكاری یاسایی پێویست لەدژیان دەگیرێتەبەر".

دوێنێ، ١٨ تشرینی یەکەم پارتی سەوزی کوردستان ڕاگەیاندراوێکی بڵاوکردەوە، لە بارەی گرتە ڤیدیۆیەک کە لە تۆڕە کۆمەڵایەتیەکان کە پێنج کەس دەردەکەون و باڵندەیەکی شاهینیان گرتوە.

لە لێدوانێکدا بۆ (سپی)، سەرۆکی پارتی سەوزی کوردستان، ملکۆ بازیانی وتی "ئێمە تەنیا بەو ڕاگەیاندراوە ناوەستین و سکاڵا لەسەر ئەو کەسانە تۆمار دەکەین تا دەگەن بە سزای خۆیان، چونکە ئەو باڵندەیەی گرتویانە لە جیهاندا کەمە و نرخەکەی بە ملیۆن دۆلارە، و لە وڵاتانی عەرەبی دەفرۆشرێتەوە، لە کوردستاندا ژمارەیەک لەم باڵندە هەیە، کە ئێمە لەبەر پاراستنیان ژمارەکە ئاشکرا ناکەین".

ئەو باڵندەیە لە جۆری شاهینە، کە بە یەکێک لە باڵندە دەگمەنە ڕاوکەرەکانی جیهان دادەنرێت، و خێراترین باڵندەی جیهانە، کە خێرایەکەی ٤٠٠ کیلۆمەترە بۆ هەر کاتژمێرێک، و نرخەکەی دەگاتە ملیۆنێک دۆلار لە وڵاتانی وەک ئیمارات و سعودیە و قەتەر.