لە کەرکوک، بە هۆی لافاوەوە کە چوەتە ماڵێکەوە ژنێکی بەتەمەن کارەبا گرتویەتی و گیانی لە دەستدا و کارمەندێکی شارەوانیش لە کاتی کارکردن لە گەڕەکی ڕەحیماوە کارەبا گرتویەتی و بریندار بوە.
چوار شەممە، ١٠ کانوونی یەکەم ٢٠٢٥، بە هۆی کۆبونەوەی ئاوی باران و دروستبوونی لافاو لە چەند گەڕەکێکی شاری کەرکوک، ژنێکی بەتەمەنی دانیشتووی گەڕەکی شۆڕاو لە ماڵەکەی خۆیدا و لە کاتی چونەژورەوەی ئاو بۆ ماڵەکەی تەزووی کارەبا لێیداوە و گیانی لە دەستدا، کارمەندێکی شارەوانیش لە کاتی بەردانی مەنهۆڵیکدا لە گەڕەکی ڕەحیماوە، بە هۆی تەزووی کارەباوە بریندار بوو.
عەدنان شکور، بەرپرسی ڕاگەیاندنی شارەوانی کەرکوک بە میدیاکانی ڕاگەیاندوە " کارمەندەکەیان سەرقاڵی پاککردنەوەی مەنهۆڵ بووە بۆ ئەوەی ئاوی لافاو کۆنەبێتەوە، بەڵام کارەبا گرتوویەتی و بریندار بووە"، بە پێی زانیارییەکان ئەو کرێکارە تەمەنی ٢٣ ساڵە.
پارێزگاری کەرکوک، ڕێبوار تەها ڕایگەیاند، بە هۆی ناسەقامگیری کەش و هەوا و بۆ سەلامەتی گیانی هەموان سبەی پێنج شەممە لەسەرجەم ناوەندە حکومیەکانی پارێزگاکە پشووە.