سەرۆکی پارتی کاری تورکیا (EMEP)، هەڵوێستی پارتەکەی سەبارەت بە ڕاپۆرتی لیژنەی "هاوکاری و برایەتی" ڕاگەیاند کە لە پەرلەمان پەسەند کراوە.
سەیت ئەسڵان ئاماژەی بەوە کرد کە ئەم ڕاپۆرتە بە هیچ شێوەیەک گوزارشت لە داواکارییە ڕاستەقینەکانی گەلی کورد ناکات و وەک پارتەکەیان دەنگ بە ڕەتکردنەوەی دەدەن، چونکە پێیان وایە مافە دیموکراتییەکان بنەمای نەگۆڕن و نابێت بکرێنە کەرەستەی دانوستان و سازشی سیاسی.
لە بەشێکی تری قسەکانیدا، سەرۆکی EMEP جەختی لەوە کردەوە، هەر هەوڵێک بۆ چارەسەری دەبێت لە جێبەجێکردنی بڕیارەکانی دادگای دەستووری و دادگای مافی مرۆڤی ئەوروپاوە دەست پێ بکات.
داوای کرد دەستبەجێ کۆتایی بە زیندانی کردنی سیاسەتمەدارانی دۆسیەی کۆبانێ بهێنرێت و سەڵاحەدین دەمیرتاش، فیگەن یوکسەکداغ، جان ئاتالای و چالاکوانانی پارکی گەزی ئازاد بکرێن، چونکە بەبێ ئازادکردنی دەنگە ناڕازییەکان و ڕۆژنامەنووسان و ڕۆشنبیران، هیچ هەنگاوێکی دیموکراتی متمانەی پێ ناکرێت.
دەقی داواکاری پارتەکە:
١. دەبێت بڕیارەکانی دادگای دەستووری و دادگای مافی مرۆڤی ئەوروپا دەستبەجێ جێبەجێ بکرێن.
٢. دەبێت سیاسەتمەدارە کوردە زیندانیکراوەکانی دۆسیەی کۆبانێ، بەتایبەتی سەڵاحەدین دەمیرتاش و فیگەن یوکسەکداغ، هەروەها جان ئاتالای و تەیفون قەهرەمان و خۆپیشاندەرانی پارکی گەزی ئازاد بکرێن.
٣. دەبێت کۆتایی بە سیاسەتی سەپاندنی تاک زمانیی دەوڵەت بهێنرێت، مافی خوێندن بە زمانی دایک و پێشکەشکردنی خزمەتگوزارییە گشتییەکان بە زمانی دایک دانی پێدا بنرێت.
٤. دەبێت کۆتایی بەو پرۆسە دادوەریانە بهێنرێت کە ئۆپۆزسیۆن دەکەنە ئامانج، و دەبێت سەرۆک شارەوانییەکان، سیاسەتمەداران، ڕۆژنامەنووسان، ڕۆشنبیران و هونەرمەندە زیندانیکراوەکان ئازاد بکرێن.
٥. دەبێت سیاسەتی دانانی قەیوم (بەزۆر سەپاندنی بەڕێوەبەر) دەستبەجێ کۆتایی پێبێت و سەرۆک شارەوانییە دوورخراوەکان بۆ پۆستەکانیان بگەڕێندرێنەوە.
٦. دەبێت ئەو ئاستەنگانە لاببرێن کە لە بەردەم ئازادیی ڕۆژنامەگەری و ڕادەربڕیندان، و دەبێت دۆسیە یاساییەکان دژی ڕۆژنامەنووسان هەڵبوەشێندرێنەوە.
٧. دەبێت بەربەستەکانی هەڵبژاردن (بەندی هەڵبژاردن)، مەرجەکانی ئەندامێتی لە سەندیکاکان، قەدەغەی مانگرتن و کۆت و بەندەکانی سەر دانوستانی بە کۆمەڵ هەڵبوەشێندرێنەوە.