بارەگای (حەمزەی سەیدولشوهەدا) سەر بە سوپای پاسداران رایدەگەیەنێت دەستیان بە سەر بڕێکی زۆر چەک و تەقەمەنیدا گرتووە کە گوایە لەلایەن یەکێک لە حیزبەکانی رۆژهەڵات و لە هەرێمی کوردستانەوە بۆ ئێران ئاودیوکراوە.

لە راگەیەنراوێکدا بارەگای (حەمزەی سەیدولشوهەدا) سەربە سوپای پاسداران دەڵێت، ئەو گرووپە تیرۆریستییانەی دژبەری شۆڕش کە لە باکووری عێراق نیشتەجێن و وەک بریکاری ئەمریکا و ڕژێمی زایۆنیستی کاردەکەن، کە مه‌به‌ستیان بوو بارێکی گەورە لە چەک و تەقەمەنیی نوێ و بەکارنەهاتووی ئەمریکی بگوازنەوە بۆ ناوەوەی وڵات، لە ناوچەی بانەی سەر بە پارێزگای کوردستان گورزیان لێدرا و بڕێکی زۆر چەک و تەقەمەنییان لێ دۆزرایەوە و دەستی بەسەردا گیرا".

راگەیەنراوەکە ناوی هیچ یەک لە حیزبەکانی رۆژهەڵات ناهێنێت.

بە پێی راگەیەنراوەکە هەوڵەکانی سوپای پاسداران بۆ دۆزینەوە و دەستگیرکردنی سەرجەم ئەندامانی ئەو گرووپە بەردەوامە.

لە کۆتایی راگەیەنراوەکە قەرارگاکە هەڕەشەی وەڵامی توند دەکات و دەنوسێت "چاوەڕێی وەڵامێکی پەشیمانکەرانە بن".

تا ئێستا هیچ کام لە حیزبەکانی رۆژهەڵات لەمبارەیەوە روونکردنەوەی نەداوە.

لەمبارەوە ئەمجەد حسین پەناهی ئەندامی سەرکردایەتی و وتەبێژی کۆمەڵەی زەحمتکێشانی کوردستان دەڵێت "هەرکاتێک ڕژێمی ئێران تووشی قەیران بووبێت، بۆ ئازارو ئەشکەنجەدانی خەڵک و لە سێدارەدانی ناڕازییەکانی ڕژێمەکەی کە ئێستا بوو بە کاری رۆژانەی ، لەماوەی ئەو ٤٧ ساڵەی رابرددودا هەمیشە کوردستانی بە جێگایەکی نا ئارام و دژەخۆی ناوزەد کردووە، ئامانجی ئەم سیاسیەتەش بۆ زیاتر سەرکوتکردنی خەڵکی ڕۆژهەڵاتی کوردستان بووە، ئەم هەواڵانەی ئەمڕۆش بڵاویکردۆتەوە دوورە لە ڕاستەیەوەو زیاتر بۆ درێژەدانە بەهێرشکردنە سەر هەرێمی کوردستان بە درۆن و موشەکەکانی، هەموو ئەم هەواڵانە بیانوو هێناوەیە بۆ ئەوەی هێرشە تاوانکارەکانی بکاتە سەر هەرێمی کوردستان".

سەرەڕای ئەوەی چەندین جار لەلایەن سوپای پاسداران و بەرپرسانی ئێران هەرێمی کوردستان بەوە تۆمەتبار دەکرێت لە خاکی هەرێمەوە چەک ئاودیوی ئێران و رۆژهەڵاتی کوردستان دەکرێت، بەڵام بەرپرسانی هەرێمی کوردستان تا ئێستا هیچ روونکردنەوەیەکیان لەم بارەیەوە نەداوە.