سیدەکان، سپی میدیا

سەرلەبەیانی ئەمڕۆ یەکشەممە ٧ی حوزەیران، لە ڕووداوێکدا لە دەڤەری برادۆست، کاسبکارێکی ناوچەکە بەهۆی تەقینەوەی ماددەی تی ئێن تی (TNT) بەسەختی بریندار بوو و گەیەنرایە نەخۆشخانە.

کاروان قادر، مامی بریندارەکە، ڕایگەیاند: "برازایەکم بەناوی (حەکیم مامند قادر) تەمەن ٣١ ساڵ، کە دانیشتووی گوندی شیوەگەرمکە، لە کاتی کارکردنیاندا لە کوێستانی خوار لە دەڤەری برادۆست، ئۆتۆمبێلەکەیان بەسەر مادەیەکی تەقەمەنی لە جۆری تی ئێن تی-دا ڕۆیشتووە و پێیاندا تەقیوەتەوە."

سەبارەت بە دۆخی تەندروستی بریندارەکە، مامی حەکیم ئاماژەی بەوە کرد کە بەهۆی بەهێزی تەقینەوەکەوە جەستەی بەسەختی بریندار بووە، بەتایبەتی زیانێکی زۆر بەر قاچەکانی کەوتووە و مەترسی لەدەستدانی پەنجەکانی قاچی هەیە.

له‌ دوای ڕووداوەکە، دەستبەجێ بریندارەکە گەیەنراوەتە بنکەی تەندروستی سیدەکان و چارەسەری سەرەتایی بۆ کراوە، بەڵام بەهۆی سەختی برینەکەیەوە، ڕەوانەی نەخۆشخانەی فریاکەوتنی ئاشتی لە شاری سۆران کراوە بە مەبەستی وەرگرتنی چارەسەری پێویست.