سەرچاوەیەک لە وەزارەتی دارایی هەرێم ئاشکرایدەکات ئەگەری زۆر هەیە رۆژی چوارشەممە لیستی موچەی مانگی حوزەیرانی فەرمانبەرانی هەرێمی کوردستان رەوانەی بەغدا بکرێت.

رۆژی دووشەممە، ١٥ی حوزیرانی ٢٠٢٦، سەرچاوەیەک لە وەزارەتی دارایی و ئابووریی هەرێمی کوردستان راگەیاندوە "ئەگەری زۆرە رۆژی چوارشەممە لیستی موچەی مانگی حوزەیران و تەرازووی پێداچوونەوەی مانگی ئایار بنێردرێتە بەغدا".

سەرچاوەکەی وەزارەتی دارایی بە کەناڵی رووداوی وتوە، بەهۆی ئەوەی سبەی پشووی فەرمییە، رۆژی چوارشەممە لیستەکە لەلایەن شاندێکەوە دەبرێتە بەغدا و رادەستی وەزارەتی دارایی فیدراڵ دەکرێ، ئەمەش وەک بەجێگەیاندنی رێکارەکان بۆ ناردنی موچەی فەرمانبەرانی هەرێمی کوردستان.

سەرچاوەکە هەروەها دەڵێت "لە مانگەکانی رابردوودا لە رۆژانی ٢٠ و ٢٥ی مانگ لیستەکانمان دەنارد، بەڵام بڕیاردراوە لەمەودوا زووتر رەوانە بکرێن."