ئەمڕۆ لە بەردەم بینای پارێزگای دهۆک، بە بەشداریی ژمارەیەک لە نوێنەرانی حزب و لایەنە سیاسییەکان، کەنیسەیی و ڕێکخراوەکانی کۆمەڵگەی مەسیحی (کلدان، سریان و ئاشووری)، گردبوونەوەیەکی ناڕەزایی دژی "داگیرکردنی زەوییەکانیان" ئەنجامدا.
دوو شەممە، ٦ تەمووز ٢٠٢٦، لە کاتی گردبوونەوەکەدا راگەیاندراوی حیزبەکان (بزووتنەوەی دیموکراتی ئاشووری، حزبی نەهرەین و حزبی نیشتمانیی ئاشووری) خوێندرایەوە و تیایدا رەخنەیان لە ڕێگرییەکان گرت و ئاماژەیان بەوەکرد، ئەمڕۆ لە بازگەکانی دهۆک، ڕێگری لە هاتنی ئەو هاووڵاتییە مەسیحییانە کراوە، کە ویستوویانە لە شار و ناوچەکانی دیکەوە خۆیان بگەیەننە دهۆک و بەشداری لەم گردبوونەوەیەدا بکەن.
لە راگەیاندراوەکەدا هاتووە کە "سەرەڕای ئەوەی ماوەی زیاتر لە سێ ساڵە بڕیاری کۆتایی و یەکلاکەرەوەی دادگا بۆ لابردنی سەرپێچییەکان و گێڕانەوەی زەوییەکان بۆ خاوەنە ڕەسەنەکانیان دەرچووە، بەڵام تا ئێستا ئەو بڕیارانە جێبەجێ نەکراون و بەپێچەوانەوە پڕۆسەی داگیرکاری و دەستدرێژیکردنە سەر موڵک و ماڵی هاوڵاتییانی مەسیحی بەردەوامە".
لە کۆتایی راگەیاندراوەکەدا هاوڵاتیان دوایانکرد کە "یاسا سەروەر بێت، کۆتاییهێنان بە دەستدرێژییەکان بۆ سەر موڵکی تایبەت و پاراستنی ئاشتیی کۆمەڵایەتی لە هەرێمی کوردستان دەکەینەوە و داوا لە حکومەتی هەرێم دەکەین، کە دەستبەجێ بڕیارە دادوەرییەکان جێبەجێ بکات و ڕێز لە مافی ڕەسەنی دانیشتووانی ناوچەکە بگرێت".
ئەم گردبوونەوەیە لە کاتێکدایە کە دەستدرێژییەکان بۆ سەر زەوییە کشتوکاڵییەکانی گوندی کشکاوای سەر بە شارۆچکەی ئاکرێ و ناوچەکانی دیکەی وەکو دەشتی نەهلە، سنووری چەمانکێ، ئامێدی، بەرواری باڵا و زاخۆ لەلایەن بەرپرسانەوە بەردەوامە کە خاوەنەکانیان مەسیحین.