بەڕێوەبەرایەتی پۆلیسی پارێزگای سلێمانی لە راگەیەنراوێکدا دەستگیرکردنی ٤ تۆمەتباری راگەیاند کە تۆمەتی ئەوەیان لەسەرە لە دۆسیەی کوشتنی هاوڵاتییەک دەستیان هەیە.

لە راگەیەنراوی بەڕێوەبەرایەتی پۆلیسی پارێزگای سلێمانیدا هاتووە:

دوای ئەوەی شەوی ڕابردوو لەسەر کێشەیەکی کۆمەڵایەتی شەڕ لەنێوان دوو خێزاندا لەگەرەکی زەرگەتەی کۆن لەشاری سلێمانی دروستبوو، لە ئەنجامدا کەسێک کوژرا و کەسێکی تر برینداربوو.

پاش ئاگادارکردنەوەی هێزەکانی پۆلیس، دەستبەجێ مەفرەزەکانی بەشی پۆلیسی نەهێشتنی تاوان و بەشی پۆلیسی فریاکەوتن گەیشتنە شوێنی ڕووداوەکە، دوای ئەنجامدانی کەشف و هێڵکاریی بۆ شوێنی تاوانەکە، بەبڕیاری بەڕێز دادوەر توانرا چوار تۆمەتبار بەناوەکانی (ع،م،س) لەدایکبووی (١٩٧٤)، (م،م،س) لەدایکبووی (١٩٨٣) بەپێی ماددەی (٤٠٦) لەیاسای سزادان و هەردوو تۆمەتبار (ب،أ،ع) لەدایکبووی (٢٠٠٦)و تۆمەتبار (ع،ع،خ) لەدایکبووی (١٩٧٥) بەپێی مادەی (٣١/٤٠٥/ی.س) لەیاسای سزادان دەستگیربکرێن.

لەئێستادا سەرجەم تۆمەتباران بەبڕیاری بەڕێز دادوەر ڕاگیراون و پەڕاوی لێکۆڵینەوە بۆ ڕووداوەکە کراوەتەوەو لێکۆڵینەوەکان بەردەوامە.