لقی سلێمانیی سەندیکای ڕۆژنامەنووسانی کوردستان کۆمەڵێک ڕێنمایی بەپەلە و توندی بۆ دەزگاکانی ڕاگەیاندن، میدیاکاران و بەکارهێنەرانی تۆڕە کۆمەڵایەتییەکان بڵاوکردەوە و تێیدا جەختی کردەوە کە نابێت ڕێگە بدرێت کەناڵەکان ببنە سەکۆیەک بۆ هەڕەشە لەسەر ئاسایشی نیشتمانی و سنووری پارێزگای سلێمانی.

ئەم بڕیارە دوای دەستپێکردنەوەی گەڕی سێیەمی جەنگی نێوان ویلایەتە یەکگرتووەکانی ئەمریکا و ئێران دێت، کە بەهۆی هەستیاریی پێگەی جوگرافیی هەرێمی کوردستانەوە، سەندیکاکە پاراستنی سەقامگیریی کۆمەڵگە و ژیانی هاووڵاتییانی وەک هێڵی سوور دیاریکرد و سەرپێچیکردنی لە پرۆتۆکۆڵە ئەمنییەکان بە شکاندنی بەرپرسیارێتیی یاسایی لەقەڵەمدا.

سەندیکاکە لە ڕێنماییەکانیدا قەدەغەی تەواوی خستووەتە سەر ڕووماڵکردنی ڕاستەوخۆی شوێنی بۆردومان، تەقینەوە و کەوتنەخوارەوەی درۆن یان مووشەکەکان، تا ئەو کاتەی لایەنە بەرپرسەکان پشکنینی تەواوی بۆ دەکەن، بەو پێیەی بڵاوکردنەوەی خێرای وێنە و ڤیدیۆی شوێنە زیانلێکەوتووەکان یان دیاریکردنی جوگرافیای ڕووداوەکە دەبێتە چاوساغیی سەربازی بۆ لایەنە شەڕکەرەکان.

هاوکات داوا کراوە میدیاکان لە دروستکردنی کۆبوونەوە، قەرەباڵغی و سازدانی چاوپێکەوتن لەو شوێنانەدا دووربکەونەوە کە دەبنە ناوچەی جەنگ و مەترسی لەسەر ژیانی تیمەکان و هاووڵاتییان دروست دەکەن.

لەسەر ئاستی بڵاوکردنەوەی زانیاریش، لقی سلێمانیی سەندیکای ڕۆژنامەنووسان ئاماژەی بەوە کردووە کە پێویستە وتاری میدیایی هاوتەریب بێت لەگەڵ ستراتیژی پاراستنی وڵاتدا و تەنیا پشت بە زانیارییە فەرمییەکان و لێدوانی وتەبێژانی دامەزراوە ئەمنییەکان ببەسترێت.

ڕێنماییەکان داوا لە سەرجەم میدیاکاران دەکەن کە بە توندی خۆیان لە بڵاوکردنەوەی دەنگۆ، هەواڵی چەواشەکارانەی بێبنەما و هەر زانیارییەکی سەربازی و ئەمنی بپارێزن، چونکە بڵاوکردنەوەی ئەو جۆرە بابەتانە لەم بارودۆخە نائاساییەدا ڕاستەوخۆ ئاسایشی نیشتمانی و ناوخۆیی فەراهەمکراو دەخاتە ژێر هەڕەشەیەکی جدییەوە.