شاندی ئیمرالی لە راپۆرتی دیدارەکەیدا لەگەڵ عەبدوڵا ئۆجەلان ئاشکرایدەکات کە سەرۆکی بەندکراوی پەکەکە جەختی لەسەر ئەوە کردوەتەوە کە هاوپەیمانیی مێژوویی کورد و تورک لە ئانوساتی گواستنەوەدایە سەر زەمینەیەکی یاسایی.

شاندی ئیمڕاڵی سەر بە پارتی یەکسانی و دیموکراسیی گەلان (دەم پارتی)، کە پێکهاتوون لە پەروین بوڵدان، ئۆزگور فایق ئەرۆڵ و مەدحەت سنجار، دوای کۆبوونەوەیەکی ٥ کاتژمێری لەگەڵ عەبدوڵا ئۆجەلان، سەرۆکی زیندانیکراوی پارتی کرێکارانی کوردستان، ڕاگەیەندراوێکی هاوبەشیان لەبارەی ناوەرۆکی گفتوگۆکان و پەیامی ئۆجەلان بڵاو کردەوە.

لە دیداریەکەدا پێشهاتە سیاسییەکان، پرۆسەی ئاشتی، بونیاتنانی کۆمەڵگەی دیموکراتیک و بە یاساییکردنی پرۆسەکە تاوتوێ کراون.

عەبدوڵا ئۆجەلان جەختی لەسەر بەردەوامیی پابەندبوون بە بانگەوازی ٢٧ی شوبات کردووەتەوە بۆ چارەسەرکردنی کێشەکان لە چوارچێوەی یاسای خوشک و برایەتیدا.

ئۆجەلان ئاماژەی بەوە کردووە، هاوپەیمانیی مێژوویی کورد و تورک لە ئانوساتی گواستنەوەدایە بۆ سەر زەمینەیەکی یاسایی و جەختی کردووەتەوە، کاتی ئەوە هاتووە بوار بۆ چوارچێوەیەکی یاسایی بڕەخسێنرێت تاوەکو ڕێگە لە هەڵوێستە تەسکەکان بگرێت و زەمینەی ژیانی هاوبەش بونیات بنرێت.

ئۆجەلان بە پێویستی زانیوە پرۆسەی یاسایی لە سەر بنەمای ڕاپۆرتی لێژنەی هاوکاریی نیشتمانی، خوشک و برایەتی و دیموکراسی لە پەرلەمانی تورکیا دەست پێ بکات، تاوەکو چەک و ململانێکان بە تەواوی وەلانێنرێن.

ناوبراو ئاماژەی بەوەش کردووە، دەبێت لە ڕێگەی ڕێکخستنەوەی یاساییەوە دەستەبەری هەمیشەیی بۆ هاوپەیمانیی کورد و تورک دابین بکرێت و یاسای نەرێنی بگۆڕدرێت بۆ یاسای ئەرێنی، بە مەبەستی گەیشتن بە کۆمارێکی دیموکراتیک، کە تێیدا ژیانی یەکسان و ئازاد مسۆگەر بێت.