وەزارەتی ئاوەدانکردنەوە و نیشتەجێکردنی هەرێمی کوردستان راگەیاندراوێکی بڵاوکردوەتەوە سەبارەت بە تەواوکردنی رێگای نێوان ناحیەی سەنگاو لە قەزای چەمچەماڵ بۆ قەزای دەربەندیخان لە پارێزگای سلێمانی و ئاماژە بەوە دەکەن کە " پڕۆژەی قیرتاوکردنی رێگەی سەنگاو بۆ دەربەندیخان لە تەواوبووندایە".
شەممە، ٢٥ تەمووز ٢٠٢٦، لە راگەیاندراوەکەی وەزارەتدا هاتووە "پڕۆژەکە بە درێژایی ١٨ کیلۆمەترە و بە چوار قۆناخ بەشێوەی راستەوخۆ لەلایەن بەڕێوەبەرایەتیی چاککردن و پاراستنی رێگەوبانی چەمچەماڵەوە جێبەجێ دەکرێت، لە دوو مانگی داهاتوودا رێگەکە بە فەرمی دەکەینەوە".
سەبارەت بە هەمان بابەت هەڵگورد محەممەد، بەڕێوەبەری بەڕێوەبەرایەتیی پاراستن و چاککردنەوەی رێگەوبانی چەمچەماڵ رایگەیاند "ئەو رێگایە ساڵی ١٩٧٥ دروستکرابوو ٢٥ کیلۆمەتری دەکەوێتە سنووری قەزای چەمچەماڵ و ١٨ کیلۆمەتری بە تەوای تێکچووبو، ئێستا ١٨ کیلۆمەترەکە قیرتاوکراوەتەوە".
رێگاکە یەک ئاراستەیە، لە سنووری قەزای چەمچەماڵەوە دانیشتووانی نزیکەی ٥٠ گوند سوود لە رێگاکە وەردەگرن، جگە لە دانیشتووانی ناحیەی سەنگاو، قەزای دەربەندیخان و گوندەکانی دەوروبەری.