جێگری سەرۆكی پەرلەمانی كوردستان گلەیی لە سەرۆك‌و سكرتێری پەرلەمانی كوردستان دەكات كە بۆ كۆبوونەوەكەی سەرۆكایەتی پەرلەمان‌و سەرۆك فراكسیۆنەكان ئاگادار نەكراوەتەوە‌و ئەمەش چەند جارێكە دووبارە دەبێتەوە.

لەو روونكردنەوەدا هاتووە : ئەمرۆ پێنچ شەممە ١٤/٥/٢٠١٥ هەواڵی کۆبونەوەی سەرۆک و سکرتێری پەرلەمان لەگەڵ سەرۆک فراکسیۆنەکانی پەرلەمان بڵاوکرایەوە گوایە لەو کۆبونەوەیە بەرێز جێگری سەرۆکی پەرلەمان ئامادەنەبوە

نوسینگەی راگەیاندنی جێگری سەرۆكی پەرلەمانی كوردستان هەروها دەنوسێت: لێرەوە بەتەواوی دەزگاکانی راگەیاندن و رای گشتی رادەگەێنین تاکە هۆکاری ئامادەنەبوونی جێگری سەرۆکی پەرلەمان لەو کۆبونەوەیە ئاگادارنەکردنەوەی بوە لەلایەن بەرێزان سەرۆک و سکرتێر یاخود نووسینگە بەرێزەکانیان کەبەداخەوە ئەمە چەند جارێکە دووبارە دەبێتەوە

ئاماژە بەوەش دەكات: وەک هەموولا دەزانن پەرلەمانی کورستان لەلایەن دەستەی سەرۆکایەتی کارەکانی بەڕێوەدەچێت و ئەم خولەی پەرلەمان و کابینەی حکومەتەکەی لەسەر بنەمای تەوافوقی نێوان پێکهاتەکان و فەرامۆش نەکردنی هیچ کەس و لایەنێکە بۆیە ئاگادار نەکردنەوەی بەرێز جێگری سەرۆکی پەرلەمانی کوردستان لەکۆبونەوەیەکی وا گرنگ و هەستیاردا پتر لەمانایەک هەڵدەگرێ و بەهیچ جۆرێک مایەی قبوڵ کردن نیەو دووپاتی دەکەینەوە ئەنجام دانی ئەو جۆرە کۆبونەوانە بێ ئاگادارکردنەوەی ئەندامێکی دەستەی سەرۆکایەتی پەرلەمان چ لەئێستا و چ لەئایندە ئاکامەکەی نەزۆک دەبێ و هیچ بەرهەمێکی لێ شین نابێ