وه‌زاره‌تی سامانه‌ سروشتییه‌كانی حكومه‌تی هه‌رێمی كوردستان بڕی هه‌نارده‌ی نه‌وتی هه‌رێمی له‌ مانگی ته‌مموزی رابردوودا راگه‌یاند، به‌و جۆره‌ش  له‌ مانگی ته‌مموزدا كۆی نه‌وتی هه‌نارده‌كراوی هه‌رێم 16 ملیۆن و 19 هه‌زار و 90 به‌رمیل نه‌وت بووه‌.

بەپێی راگه‌یه‌ندراوێكی وه‌زاره‌تی سامانه‌ سروشتییه‌كانی حكومه‌تی هه‌رێم، حكومه‌تی هه‌رێمی كوردستان له‌ مانگی رابردوودا 16 ملیۆن و 19 هه‌زار و 90 به‌رمیل نه‌وتی هه‌نارده‌كردووه‌.

لە راگەیەنراوەكەدا هاتووه‌: له‌و بڕه‌ نه‌وته‌ 12 ملیۆن و 20 هه‌زار و 683 به‌رمیلی نه‌وتی كێڵگه‌كانی هه‌رێم بووه‌ و سێ ملیۆن و 988 هه‌زار و 407 به‌رمیلیش له‌ نه‌وتی كه‌ركوكی هه‌نارده‌ كردووه‌.  له‌باره‌ی ئه‌و بڕه‌ نه‌وته‌ی هه‌رێم راده‌ستی سۆمۆی كردووه‌، هاتووه‌، حكومه‌تی هه‌رێم دوو ملیۆن و 201 هه‌زار و 540 به‌رمیل نه‌وتی راده‌ستی كۆمپانیای سۆمۆ كردووه‌.

هه‌ر بەپێی راگه‌یه‌ندراوه‌كه‌: له‌ مانگی رابردوودا 111 كاتژمێر هه‌نارده‌ی نه‌وتی هه‌رێم وستاوه‌، كه‌ زۆربه‌ی ئه‌و كاته‌ كه‌وتووه‌ته‌ كۆتایی مانگی ته‌مموزه‌وه‌.