ئەمیری کۆمەڵی ئیسلامی عەلی باپیر پێیوایە هەرکەسێک نکوڵی لەوە بکات کە بارودۆخی بێ سەرو بەری هەرێم لە رووی سیاسی و ئابوریەوە هۆکاری سەرەکی کۆچی گەنجان، ئەوا بێخەبەرە، یان ماستاوچییە.
لە پەیامێکدا لەسەر کۆچی گەنجان، ئەمیری کۆمەڵی ئیسلامی دەڵێت" بێ عەدالەتیی و قۆرخكاریی و گەندەڵیی و بێكاریی چەند سیمایەكی زەقن کە هۆكاری سەرەكیی بێزاریی و نائومێدیی گەنجان، سەرەنجام ئەو هۆکارانە گەنجان سەری خۆیان هەڵدەگرن".
دەقی پەیامەكەی:
سەری خۆهەڵگرتنی گەنجەكانمان: هۆكار و چارەسەر
لەم ڕۆژانەدا ژمارەیەك لە گەنجەكانمان سەری خۆیان هەڵدەگرن و بەلێشاو ڕوو لە هەندەران دەكەن، ئنجا لە سۆنگەی ئەوەوە كە ئایندەی هەر خەڵك و وڵاتێك بە گەنجەكانیەوە پەیوەستە وجێی ئومێدنی، ئەو كۆچ و سەری خۆهەڵگرتنەی لاوەكانی هەرێم مایەی نیگەرانیی و جێگای مەترسییە و، لەو بارەوەش دەڵێم:
1. هەركەسێك نكووڵیی لەو ڕاستییە بكات كەبارودۆخی بێسەروبەری هەرێم، بە تایبەت لەڕووی سیاسی و ئابووریی و ژیان و گوزەرانەوە، كە بێ عەدالەتیی و قۆرخكاریی و گەندەڵیی و بێكاریی چەند سیمایەكی زەقنی، هۆكاری سەرەكیی بێزاریی و نائومێدیی گەنجان و، سەرەنجام سەری خۆ هەڵگرتنیانە، یان زۆر لە دنیا بێخەبەرە، یان خۆ لە واقیع گێلكەرە، یان ماستاوچییەكی بێزهێنەرە!
2. بەڵام پێم وایە سەرەڕای ئەو هۆكارانەی باس كران، نەبوونی فێركردن و پەروەردە كردنێكی ئیسلامیی ڕاست و هاوسەنگیش بۆ لاوەكانمان، كە لە ڕووی عەقیدەیی و ڕووحیی و ئاكاریی و كۆمەڵایەتییەوە، دامەزراویان بكات و وایان لێبكات كە تەحەممولی سەختییەكان بكەن، ڕۆڵێكی گرنگی هەیە لە وحاڵەتە نەرێنییەداو، بێگومانیش هەر كام لە حكوومەت و كۆمەڵگان -بە وەزارەتە پەیوەندییدارەكان و، كەناڵە كانی ڕاگەیاندن و، ڕێكخراوەكان و، خێزانەكانیشەوە- بەرپرسیارێتییان لە ئەستۆدایە.
3. هەروەها پشكێكی گەورەی بەرپرسیارێتییش لە ئەستۆی خودی گەنج و لاوەكان دایە، كە دەبووایە بە هۆی خۆ پەروەردە كردنیانەوە لەڕووی ئیمان و عەقیدە و عیبادەت و ئاكارەوە، خاوەنی كەسایەتییەكی بەهێز بن، تاكو:
یەكەم: لەبەردەم فشاری گرفتاریی و ناگوزوورییەكاندا خۆڕاگربن.
دووەم: لە جیاتی ئەوەی بیر لە ڕاكردن لە واقیعی تاڵ و دژوار بكەنەوە، بیر لە چاككردن و گۆڕین و ڕاست كردنەوەی و ، نەهێشتنی كەم و كوڕییەكانی بكەنەوە.
4. چارەسەریش هەر ئەوەیە كە لە هەموو ئاستە كاندا چاو بە خۆماندا بگێڕینەوە و، بڕیاربەدەستانی وڵات دان بە هەڵە و كەم وكوڕیی و بگرە ستەم و لادانەكاندا بنێن و، هیچ كەس شان لە بن باری بەرپرسیارێتی نەهێنێتە دەرێ و، بە هەموومانەوە كاری بە بڕشت بكەین لە بواری پاكسازیی و چاكسازیی تێداكردنی هەرێمەكەماندا، بۆ:
- هێنانەدی سیستمێكی ڕاستی حوكمڕانیی دوور لە هەیمەنەی حیزب و گرووپ و كەس.
- بە دامەزراوەكردنی كارەكان.
- یاسا سەروەر كردن بەسەر هەموو كەس و لایەك دا.
- بە پێوەر كردنی مرۆڤ بوون و هاووڵاتیی بوون، بۆ مامەڵە كردن لەگەڵ خەڵك دا.
- ڕێگرتن لە قۆرخكاریی و گەندەڵیی و دەوڵەمەند بوونی ناڕەوا.
- وە گرنگیی دانی پێویست بە تێگە یاندن و پێگە یاندنی نە وەی نوێمان، لە سەر بناغەی ئیسلام، بەشێوە یەكی هاوسەنگی وا، كە مافی هەركام لە عەقڵ و دڵ و دە روون و جەستە بدرێ و، مرۆڤ بكرێتە خاوەن كەسایەتییەكی بە هێزو پێز و نەلەخشاو.
5. لەكۆتایی دا:
با ئەو گەنج و لاوانەمان كە چوونەتە هەندەران، وریای دین و ئە خلاق و كە سایە تیی خۆیان بن و، وەك مێشەنگوین بن و شیلە و تامی گوڵی شتە باشەكانی ئەو وڵاتانە بمژن لەڕووی وەرگرتنی زانست و ئەزموون و عادەت و كلتووری بە سوود و فێربوونی زمان و.. هتد ەوە و، بە شتە باشە كانی خەڵكی ئەو وڵاتانە، خۆیان دەوڵەمەند بكەن و، بە هەگبەی پڕەوە بگەڕێنەوە نێو خەڵك و وڵاتیان، نەك هیچی باشیان دەستگیرنەبێ و، ئەوەی پێشیانە لە دەستی بدەن و، نەك هەر بە دەستی خاڵیی، بگرە بە قەرزداریی و زیانبارییشەوە بگەڕێنەوە!
هەڵبەتە مرۆڤیش تەنها جارێك لەسەر زەوی دەژی و، پێویستە هۆشیاربێ و بزانێ ئەو تاكە دەرفەتەی چۆن بەكاربینێ، بۆ ڕازی كردنی خوا و خزمەت كردنی خەڵك و سەربەرزیی دنیا و دواڕۆژی!
27 ژی القعدە 1436ك
11 ئەیلوولی 2015ز