لە هەفتەی داهاتوودا، پارتی دیموکراتی کوردستان و یەکێتیی نیشتمانیی کوردستان، کۆدەبنەوە و بڕیارە لەسەر چۆنیەتی چاکسازییەکانی حکومەت و پرسی بزووتنەوەی گۆڕان و پڕکردنەوەی وەزارەتەکانیان لە حکومەتدا تاوتوێ بکەن.

لەمبارەیەوە عەلی عەونی، ئەندامی سەرکردایەتیی پارتی دیموکراتی کوردستان، بە باسنیوزی نزیک مەسرور بارزانی ڕاگەیاندووە "کۆبوونەوەی یەکێتی و پارتی بەردەوام دەبێت و دەبێت هەردوولامان لەسەر کۆمەلێک پرس گفتوگۆ بکەین، بەتایبەتی ئەوەی پەیوەندی بە حکومەتەوە هەیە”.

ئەو بەرپرسەی پارتی جەختی لەوە کردۆتەوە کە بەشێک لە تەوەری کۆبوونەوەکەیان، پرسەکانی ئێستای هەرێمی کوردستان و دۆخی سیاسیی کوردستان و گۆڕانکارییەکانی ناوچەکە دەبێت.

بەپێی زانیاریەکانی ئەو ماڵپەڕە، سەرۆکی شاندی پارتی دیموکراتی کوردستان لە کۆبوونەوەکەدا، "فازڵ میرانی"، سکرتێری مەکتەبی سیاسیی پارتی دەبێت و "کۆسرەت ڕەسوڵ عەلی”، جێگری سکرتێری گشتیی یەکێتیی نیشتمانیی کوردستان، سەرۆکی شاندی یەکێتی دەبێت.