پەرلەمانتارێكی پارتی وەك رێگەچارەیەك بۆ دەربازبوون لە قەیرانی هەرێم داوا دەكات ئاوی بەنداوەكانی هەرێمی كوردستان بەڕوی بەغدا بگیرێتەوە.

عەباس غەزالی میرخان، ئەندامی لیژنەی كشتوكاڵ و ئاودێری لە پەرلەمانی كوردستان سەبارەت بە دەربازیوون لەم قەیرانەی هەرێم بە ماڵپەڕی فەرمی حیزبەكەی وتووە "بۆ ناچاركردنی بەغدا، پێویستە هەرێمی كوردستانیش گوشار بخاتە سەری بە ڕێگەی گرتنەوەی ئاویی بەنداوەكانی (دەربەندیخان) و (دووكان) لە مانگی (٤) بەولاوە و لێدانی خەندەق بۆ گۆڕینی ڕێڕەوی ئاوی ڕووبارەكان بۆ ئەوەی ئاو نەگاتە ناوەڕاست و باشوور، تا ئەوكاتەی بەغدا داوا لە هەرێم دەكات بەپێی دەستوور بوودجە و مووچەمان بۆ دابین دەكات، ئینجا ئاویان بۆ بەر بدەینەوە".

بەوتەی میرخان "چونكە لە ڕووی تێگەییشتن و پێكەوەژیان و كاركردن بە دەستوور و برایەتی و پێڕۆكردنی دیموكراسییەوە، بەغدا بە زمانی زبر نەبێ تێناگات، لە رووی ناچارییەوە ئێمەیش ئەوە دەكەین و تا بەغدا پارەی گەنمی (٢٠١٤) و (٢٠١٥ ) و بوودجە و مووچەی پێشمەرگەی هەرێمی كوردستانمان بۆ ڕەوانە نه‌كات، ئێمەیش ئاویان پێ نادەین".