هەفتەی رابردوو گۆڕان پرۆژەیەک دەدات بە یەکێتی کە لە ئێستادا داوای رێککەوتنێکی سیاسی دەکات و لە دوور مەوداشدا پرۆژەکە تا یەکگرتنەوەی هەردوو حیزبی تیایە.
هەفتەی رابردوو گۆڕان وەک وەڵامێک بۆ پرۆژەکەی یەکێتی کە پێشتر ئاراستەی گۆڕانیان کردبوو دواتر لە میدیاکانیشدا بڵاوکرانەوە، پرۆژەیەکی دوو لاپەڕەیی ئاراستەی یەکێتی دەکات.
پرۆژەکەی گۆڕان داوا لە یەکێتی دەکات سەرەتا رێککەوتنێکی سیاسی ئەنجام بدەن و دواتر پێکەوە کاربکەن و لەیەک نزیکببنەوە تا ئاستی یەکگرتنەوە.
چەند پرەنسیپێک وەک بنەما بۆ پرۆژەکە دانراوە، لەنێو ئەو بنەمایانەدا رێککەوتنی ٢٤-٩-٢٠١٣ دەباشانی نێوان تاڵەبانی و نەوشیروان مستەفا، هەروەها بنەمای پرۆژە چوار قۆڵییەکەی فراکسیۆنەکانی پەرلەمان لەسەر سیسەتەمی سیاسی.
هاوکات پایکێجەکانی چاکسازی و کارکردنە بۆ شەفافیەتی لە بواری نەوت و بوودجە لە هەرێمی کوردستان یەکێکە لە بنەماکانی تری ئەو رێککەوتنە.
ئەو پرۆژەیەی گۆڕان، سەرەتا داوای رێککەوتنێکی سیاسی کردووە کە لەنێوان هەردوولادا واژۆ بکرێت، هاوکات لیژنەیەک پێکبهێنرێت بۆ جێبەبجێکردنی ئامانجی ڕێککەوتنەکە.
لە پرۆژەکەدا بە ئاشکرا باس لە هەماهەنگی و کاردن پێکەوەو لێکنزیکبوونەوە دەکات تا ئاستی یەکگرتنەوەی یەکێتی و گۆڕان لە داهاتوودا.
لە پرۆژەکەدا داوا لەهەردوو لایەن و نوێنەرانی کورد لە بەغدا دەکات هاوڕابن لەسەر پرسەکان و لە ژێر یەک چرتدا کاربکەن و کاریش بکرێت تا ئاستی یەکگرتنەوەی فراکسیۆنەکان.
یەکگرتنەوەی فراکسیۆنە لە پرۆژەکەدا جگە لەپەرلەمانی عێراق لە سەر ئاستی هەرێم و ئەنجومەنی پارێزگاکانیش ئاماژەی بۆ کراوەو جەختی لەسەر کراوەتەوە.
وەک لە پرۆژەکەدا هاتووە ئامانجی ئەو رێککەوتنە سیاسیە، کارکردنی هەردوولایە بۆ ئەوەی سیستەمی سیاسی لەکوردستان بگۆڕدرێت بە سیستەمێکی پەرلەمانی.
ئامانجێکی تری رێککەوتنەکە بریتییە لە داڕشتنی دەستورێکی مەدەنی دیموکراسی لەهەرێمی کوردستاندا.
هاوکات گەڕانەوەی شەرعیەت بۆ دامەزراوەکانی هەرێمی کوردستان یەکێک دەبێت لە ئامانجەکانی تری رێککەوتنەکە.
پرۆژەکە داوا دەکات کە کادیرانی خوارەوەی هەردوولا بە رۆحی تەبایی و هاوکاری ئیش بکەن بە مەبەستی قووڵکردنەوەی ئەو رێککەوتنەوە و نزیکبوونەوەی هەردوولایەن و جێبەجێکردنی رێککەوتنەکە.