هێمن مه‌لا زاده‌، پێشکه‌شکاری دیاری که‌ناڵی ڕووداو پاش ئه‌وه‌ی هه‌واڵی داواکردنی مافی په‌نابه‌رێتی ئه‌و و هاوسه‌ره‌که‌ی له‌ که‌نه‌دا بڵاوکرایه‌وه‌ ڕوونکردنه‌وه‌یه‌کی بڵاوکردووه‌ته‌وه‌ و ئاشکراشی کردووه‌ وازی له‌ ڕووداو هێنا.

له‌و ڕوونکردنه‌وه‌یه‌دا که‌ له‌ پێگه‌ی تایبه‌تی خۆی له‌ تۆڕی کۆمه‌ڵایه‌تی ئینستاگرام بڵاویکردووه‌ته‌وه‌ هاتووه‌ "ئەوەی لەسەر ژیانی تایبەتی من دەگوترێت، ئەسڵ و ئەساسی نییە، من قۆندەرەی منداڵێکی خۆم بە هەموو ئەو بە ناو سەربەخۆخوازانە نادەم کە درۆ و بوختان لەسەر من بڵاو دەکەنەوە.".

هه‌ر له‌و ڕوونکردنه‌وه‌یه‌دا ده‌ڵێت "دووەم ئەوەی لەسەر ژیانی رۆژنامەنووسیم دەگوترێن بە هەمان شێوە دوورە لە راستیەوە و من ئەسڵەن لە رووداویش نەماوم تا لە وێستگەیەکی دیکە کاریان بۆ بکەم."
هێمن مه‌لا زاده‌ هه‌روه‌ها ده‌ڵێت لە ژیانمدا ئەندامی هیچ حزبێکیش نیمە و بڕوام بەهیچیان نییە، لەو پێناوەشدا دەیان جار هەڕەشەم لێکراوە هەر لە ۱۷ی شوباتەوە تا دەگاتە هەڵوێستەکانم لەسەر شەهیدانی قەڵەم لە کوردستان و سزای ماددی لە شوێنی کارکردنم لەسەر بڵاوکردنەوەی پۆستەکانم و قسە هەقەکانم، بێ منەتیشم لە هەموویان.

له‌ کۆتایی ڕونکردنه‌وه‌که‌دا ده‌ڵێت "دەریا بە دەمی سەگ پیس نابێت".