دکتۆر فەرهاد پیرباڵ، نوسەر و مامۆستای زانکۆ لە میانی وتارێکیدا کە ناونیشانی وتارەکەشی هەر ناوی خۆیەتی دەڵێت تەنیا یەک کورد بڕوای بەپارتی دیموکراتی کوردستان ماوە؛ ئەویش کاک مەسعودە.


فەرهاد پیرباڵ لەو وتارەیدا کە بۆ ڕۆژنامەی ئاوێنەی نوسیوە دەڵێت "من راستییەکەی، لەبەر خاتری کاک شاڵاو عەسکەری، چونکە ئەو، یەکیەتییەکەی جارانی خۆی‌و حزبەکەی (نەوشیروان مستەفای، بەو دو ژنە "لەشفرۆش‌و بێناموسە” شوپهاند کە شەڕ لەسەر "عەیب نەبێ”)ی یەک کەس دەکەن ئەویش) مەلا.. "مەشهور”ە… قسە لێرە ناکەم."
دەقی وتارەکەی فەرهاد پیرباڵ بخوێنەرەوە
فه‌رهاد پیرباڵ

خوێندکارەکانم زۆر جار لێمدەپرسن بۆچی من گوتومە: هەمو حزبە ئیسلامییەکانی کوردستان، -نەک دەبێ، بەڵکو- ناچارن یەکتر بگرن؟ ئەگینا تا موسڵمانێک لەدنیا مابێ؛ دەمێنێتەوە لەژێر رەحمەتی زاڵمین‌و زاڵمترین!
فەیلەسوف، حەزدەکا -یان هیچ نەبێ- دەیەوێت، (سیستەمی بیرکردنەوەی خۆی) واتە فەلسەفەی خۆی فەرزبکاتە سەر ئەوانی تر (کۆمەڵگە). بۆیەش زۆربەی جار گرفتی لەگەڵ (مرۆڤ‌و دەوروبەر) هەیە. یەکێک لەوانە گرفتی شڕۆڤەکردنی فەلسەفەکەیەتی بۆ خەڵک‌و رادەی لێ تێگەیشتنیان. فەرمون کەمێک خۆم (روت) نا: ” رون” دەکەمەوە:

(١)لقد مات الحزب..
بەم زوانە هەر هەمو حزبە ئیسلامییەکانی کوردستان ناچار بەمە دەبن یەکتر بگرن. ئەمەش جەبرییەتی خودای گەورەیە وابزانم! دەڵێم –استغفراللە استغفراللە استغفراللە: وابزانم.
(پاشان رون دەکەمەوە بۆ کافرەکانیش؛ بۆ؟ یان چۆن؟
خۆ کە من حەددم نیە هەرگیز لەغەیب – باوەڕناکەم‌و حەزیش ناکەم کەس لە”غەیب”- نزیک بکەوێتەوە: بەڵام کردنەوەی کڵاوڕۆژنەیەک لەسەر عیلمی غەیب لەکوردستاندا؛ با! من لەگەڵی هەم!).
بەم قسەیەی دەسپێکم ئەگەر باوەڕ بکەن؛ بۆ بەرژەوەندیی ئیسلامییەکان خۆیان، بۆ عیلم‌و میللەتیش زۆر زۆر زۆر باشترە.
حەقتانە بفەرمون بپرسم بۆ؟! یان چۆن؟!
باش. تەماشاکەن:
تەنیا یەک کورد بڕوای بەپارتی دیموکراتی کوردستان ماوە؛ ئەویش کاک مەسعودە.
هیچ کەس باوەڕ ناکەم تازە تاقەتی ئەوەی بێتەوە بەر، بێت بیر لەوە بکاتەوە (برێ.. ) ئەرێ ئەمن بچم بوێرم بێم بیر لەوەی بکەمەوە جارەکی دی دەنگ بدەمەوە "پارتی”؟  پاش ئەو هەمو شاپشاپانێ‌و شەپەشاپەی ناو (پەرلەمانی "پاپا”) "کە لەلەندەن دایانناوە بیکەنە فیلمیش”! دیتمان.
من راستییەکەی، لەبەر خاتری کاک شاڵاو عەسکەری، چونکە ئەو، یەکیەتییەکەی جارانی خۆی‌و حزبەکەی (نەوشیروان مستەفای، بەو دو ژنە "لەشفرۆش‌و بێناموسە” شوپهاند کە شەڕ لەسەر "عەیب نەبێ”)ی یەک کەس دەکەن ئەویش) مەلا.. "مەشهور”ە… قسە لێرە ناکەم.
بەگێڕانەوەی دەقاودەقی قسەکەی کاک شاڵاویش؛ (ویستم هاودەست رون بکەمەوە کە لەزانکۆکاندا نوقتە وەک کورتکراوەی هەر حەرفێک، قانونییەن، تەنیا بەیەک میم دەنوسرێت).
لەهەولێر، هەولێرییە ئەسڵە قەڵاتییەکان، بەتورکمانی نا، "بەکوردی!”، پەندێکی پێشینانیان هەیە دەڵێ: وەرە سەر ئەم کورسییە بزانە کێندەرت لێ دیارە!
ئەم ئیدیۆمە کوردییە؛ پەیوەندیی بەبارودۆخی "کورسی”یەکەی لەسەربانی ماڵی خۆم دامناوە شەش ساڵە هێشتا، هەس. ئەمەش بەڕەمز بۆئەوەی، پێی، بڵێم: (کورسی، دەبێ تەنیا ئایدیاڵی لەسەر دابنیشێت!). هەر بۆیەشە کاک مەسعود بەخۆی، بەخۆی ناڵێت "من سەرۆکم” دەڵێ "من پێشمەرگەم”)؛ هەروەها پەیوەندیی بەحزبی کۆمەڵی ئیسلامی‌و یەکگرتوی ئیسلامیش هەر هەس:
بۆچی (بیر)یان لەئینشیقاق ئەوانیش؟ کەچی گۆزەیان چو لەگوندێکی دیکە شکا؟
بەلاغەت‌و حیکمەتی هەرە جوانی وجودی ئەم حزبە سەر- نەکەوتوە ئیسلامییانە، دو شتە؛ یەکەم: نەماندیت هەرگیز ئەم حزبە ئیسلامییانە، هیچ نەبێت یەکیان، یان هیچ نەبێ "کاریزمایەکیان” رۆژێک سەربکەون بەسەر ئەو هەمو کۆیلەیەی وەک من‌و بەسەر ئەو هەمو دیل‌و "بەدیل”‌و "بنەماڵە” بێ بەدیل‌و بەڕەڵایانەی بانگەشەیان بۆ کرد سەرکەون!
بەڵێ بەشقەم بماندیبا کە خودا لەپشت ئەوان بوەو بۆیەش خودا سەری خستون!
چونکە بەڕای من؛ هەمو سەرکەوتنێک هەدیەی خودایە بەو سەرۆکە سەرکەوتوە دەدرێت؛ یان وەک دەزانین هەرگیز بەبێ ئیمان هەبونی راستەقینە بەخودا، ناگاتە هیچ، هیچ کەسێک.
من ئەمانەم بەتەلەفۆن بەکاک عەلی باپیریش گوت کەچی ئەویش باوەڕی پێم نەکرد! جگە لەمەش؛ بۆئەوەی میللەت باوەڕ بکات یان هیچ نەبێ "ئوممەتی ئیسلام” بەباوەڕ بهێنن کە خودا لەپشت ئەواندایە!
دەی، خۆشبەختانە بۆ هەمو کورد، ئەگەر خوا حەزبکا، خۆ ئێستاش دەرفەتێکی ئاشتبونەوەو ئازادی ماوە ناوی (داهاتو)ە: بۆ هەر کەس‌و حزبێکی دیکەش، ئەگەر هەر بەخۆی – واتە بەویراسە- خائین، یان هەڵە بوبێت، یانیش هەڵخەڵەتێندراو!
ئەمەش چونکە ئێمەی بەشەر هەمومان بریتین لە(بەرهەمی هەڵەیەک) کە ئی عەلی باپیر نیە، بەڵکو ئی باپیرە هەرە گەورەکەمانەو دەبێ هەر کەس جارێک تێی بکەوێت؛ ئەمەش مەعلومە بۆئەوەی هۆشی بێتەوە سەر خۆ.
گرنگتر لەم قسە زۆر زۆر زۆر بەدیهیانەم –کە خەڵک بەمنداڵی خۆی دەڵێ نەک بە”ژنی پەرلەمانتار”و پیاوی گەورەو سیاسەتمەدار، ئەمەیە: پێویست وایە، پاش هەڵەکردنەکە؛ مرۆڤ؛ ئەگەر یەک تۆزقاڵ کەڕامەتی هەبێت (یان هیچ نەبێ ئیمانی) وەختێ دەگەڕێتەوە؛ پێویستە بێت؛ سەربڵندانە، دان بەهەڵەو "گوناح” و کارە خراپەکانی خۆی لەبەردەم گەلدا بنێت؛
ئینجا داوای لێبوردن‌و خۆشەرمەزارکردن لەبەردەم گەل؛ بەحزوڕی ئەو کەسەی کە خیانەتی نامستەحەققی بەرامبەر پاکی رێگای "ئەم”و رێبازی ئازادیخوازی گەلەکەی کردبو!
بەڵێ دەنا خراپترو رەشتر دەبێ چارەنوسی هەر کەسێک‌و هەر حزبێک ئەگەر ویستی نەک تەنیا خۆی، یان نەک تەنیا خۆی‌و "بزوتنەوەکەیشی” بەڵکو پەرلەمانە کارتۆنیەکەی هەشیانبو ریسوا بکات‌و بیکاتە "فلیم”؛ بەسەربەخۆیی سیاسیی دەوڵەتی کوردستانیشەوە – کە شەش شوبات زیاترە من قەناعەتیان دەمەوێ پێ بهێنم، کەچی ئاشکرا ئاشکرا بڕیارو ئازادی‌و بیری خۆیان بو مومارەسەیان دەکرد ڕاستە، بەڵام لەسەر حسابی عەقڵ‌و ناموس‌و تەندروستی تێکچونی من‌و ئەولادی من.. نەیاندەزانی خۆ هەر خۆیان بون کە حەزیان بە”کۆیلەیی” دەکردو (تا من خۆم روت نەکردەوە) ئەوان نەهاتن بەبیریان بێتەوە کە ئازادی ئەمەتا لەهەولێر هەیە ئەگەر کەسێک بیەوێت نیشتیمانپەروەرانەو دیموکراسیانە ئۆپۆزیس- وێن؟ بێت! نەهاتن حەیف پێش ئەو ئۆکتۆبەرەی تێیدا مردم‌و هەولێری پێ ئازاد – لەدەست من؛ بێن بیر لەوە بکەنەوە بەخۆشی، بەبێ ئەوەی هێشتا ریسوا ببن؛ بێنە رایێ!

<<< ڕێگای کفریان گرتەبەر ئەوانە! شول لەئاگایان بدەی یا نا، تازە چیتر نایەنە ڕایێ: یەزدان بەسەر دڵ و گوێچکەیاندا مۆرێک، وەبان چاویشیاندا پەردەیەکی هیچ نەدیتن. چ ئازارێکی هەمو هەڵتەکێنە لەبۆیان!

خۆ پێمانگوتن: ئەم سەرزەمینە پیس مەکەن!
گوتیان "ئێمە چاکەکارین”.
خراپەکار هەر ئەوانن بەڵام پەی ناتوانن ببەن پێ.

"بۆ باشەی خۆتانمانە باوەڕ بێنن تەبای ئەو خەڵکەی هاتنە سەر ڕێی حەق”. گوتیان:”..ئێمە!؟ چۆن بێینە رێزی ئەو گەوجانەی ئێوەیان پێ لەسەر حەق؟” کەچی دەرکەوت: گەوجهەر خۆیانن وەلێ پێنەزان! >>>
. سورەتی بەقەرە. ئایەتی ٦- ١٣

نوسیبوم: حەیف کە ئەو حزبە ئیسلامییانە هیچیان سەرنەکەوتن بۆئەوەی میللەت‌و "ئوممەتی ئیسلام” بەباوەڕ بهێنن کە خودا لەپشت ئەواندایە!
مریشک بەهێلکە دەهێندرێت بەزۆر – دەزانم- بەڵام ئوممەت بەزۆر، بەباوەڕ ناهێندرێت. مەبەستم –بەباوەڕکردن بەوان-.
کەواتە دیارە خەتای هەر هەمو سەرکردە ئیسلامییەکان و ئەوانی تریشە کە نەیانتوانی ئەم مریشکانەی پێیانبو؛ هیچیان لێ بتوانن بکەن!
ئەم لۆژیکەی من حەقی وایە لەمەدرەسەکانی شەریعەت‌و رەوانبێژی‌و ئەو کۆلێژی سۆربۆنەی لێمخوێند بچن فێری ببن، یانیش خۆم بچم دەرسی زیاتر لێ فێر ببم، نەوەک ڕۆژێک حەزبکەم وتارێکی درێژتر لەچاو ئەم مەسەلەیە بنوسم، بێم.. بڵێم: ئنجا مریشکێک ئەگەر "کورک”یش بێت، ناتوانیت لێشی نێزیک هەر بخەویت.
من هەندێ لەحزبە ئیسلامییەکانم خۆشدەوێ! چونکە، ئەفزەڵیەت‌و پێوانەکانی شەرەفمەندیی هەر هەمو ئەو حزبە ئیسلامییانەی کوردستان بەمونەوەرو بەگەورە موفەککیرەکانیشیانەوە "لەلای میللەت”، الحمدللە، لەچاو سەرکردەکانی گۆڕان‌و بەڕێز پەرلەمانتارەکانیان ئەوەیە؛ کە ئەمان، بەپێچەوانەی سەرکردە و پەرلەمانتارەکانی حزبی گۆڕان، بەجەنابی عومەری سەید عەلیشەوە؛ لەناو خۆیان "بەسازان” رێک نەکەوتون هەر کەسێك ئەگەر کرا فیلم لەناویان پێویستە بچێ غار بداتە لەندەن‌و بڵێ نەخۆشم!
من لەو بەڕێز دکتۆراو ماجستێرنوسانەی زانکۆکانی کوردناسی لە(تەهران) و (سنە)و (بڕیتانیا)و (مۆسکۆ)و (دیمەشق) دەپرسم، و لەو قوتابییانەی لەعیبرەت‌و دەرسی (مێژوی کوردستانی ئەمڕۆو سەرکردەکانیان بەراورد بەسەرکردەکانی رابردوی کورد) دەکۆڵنەوە؛ دەپرسم:
ئەرێ – ئەگەر باوەڕمان بەعیلمی ویراسە هەبێت-؛ هەر ئەم نەوعانەش بون؛ کەواتە؛ سەرکردەی بنەماڵەکانی جاف‌و بابان‌و وەسمان پاشای جاف‌و "عادلەخانم”ی جاف‌و ئەحفادی شێخەکانی (مەلیک مەحمود؟! ها؟!)
من حەزدەکەم مامۆستای گەورە، دکتۆر کەماڵ مەزهەر بەراوردەکانی چونکە زانستی ترن بێتە وەڵام؛ بەڵام بەپێی مەعلوماتی من: هەمو ئەم سەرکردە مەزن و قارەمانانەی مێژوی کورد، لەهەڵەبجەو بازیان‌و قەڵاچواڵان مابونەوە: کەس غاری نەدابوە بەر هەولێریش!
تەنیا یەک جار حەفید شێخ مەحمود بەنامەیەک، لەزیندانەوە، داوای لەمیری کورد، سیاسەتمەداری هەرە حەکیم‌و خوداناسی کورد، "مەلا فەندی”ی هەولێری کردبو بۆئەوەی مەزبەتەی بۆ لەخەڵکی هەولێر بۆ بکەن (بۆئەوەی لەزیندان دەری بهێنن). بابم پیرباڵ قەساب بەبیرم دێ بەفەخرەوە دەیگوت: "ئێمەی هەولێری؛ چوین دەریشمان هێنا”!
بۆ زانیاریتان بابی من، کە ساڵی ١٩١١ هاتبوە هەولێرو ناوەکەی لەمرازی مەرقەدی موبارەک شێخ پیرباڵانی زەردەشتیی تایبەت بەهەولێرو هەولێرییەکانی کۆنەزەردشتی خواستراوەتەوەو پیرێکی زەردەشتیی ئەسڵی کورد کورد کوردەکانم کەواتە ئەمنیش؛ لەسەرێکەوە: مەسیحی بو، لەسەرێکی دیکەی ئیسلام، لەلایەک تورکمان بو، لەباوکیشیەوە کورد.
یەعنی: عومەری بابی پیرباڵ، تۆ تەماشاکە چەند جوان فێری (ئاسیا خانمی تورکمانی) ژنی خۆی کردوە ئەویش کوردانە – زەردەشتییانە بیر بکاتەوە!
حەقی وایە خەڵکی دەوروبەری چیای پیرمام‌و پیرەمەگرون‌و پیرمەسوریش ناوی ئەو پیرە زەردەشتییانە بۆ مرازی کوڕێکی ساڵح، فێری ژنی خۆیان بکەن!
حەزدەکەم ئەوەش بڵێم: منێک کە عادەتمە هەمیشە حەق و حەقیقەت سەر ببڕم تاکو دەرکەوێت‌و بەدەشتان کەوێ؛ لەڕۆژی میز بەمەحکەمەو بەپەرلەمان و بەحکومەت داکردنەکەم؛ میزم تەنیا ئەوەی مابو بچێ بەرەو –خوانەکا- پەیکەرەکەی شێخ مەحمودیش، بەڵام نەمکرد چونکە دەزانم کاک مەسعود بارزانیی باوکی کوردستان، وەک رەمزێکی وەفای هەولێر بۆ سلێمانی، واتە وەک ڕەمزێکی ڕاستگۆیی و هیممەتی مەلا فەندی بۆ (رزگارکردنی شێخ مەحمود لەدەست دوژمنانی خەڵکی سلێمانی) لەو فلکەیەی جادەی پزیشکانی هەولێر دایناوە؛ کە –پێش پەشیمانبونەوەم، لەسیستەمی بیرکردنەوەی مندا دەیکردە: "حەقخوران‌و مەحروم بونی رەسوڵ گەردی لەم شەرەفە!”
لەلایەکی دیکەش؛ دەزانم ئەم پەیکەرە "لای من”  ڕەمزی گەورەیی (مەلا فەندی)یە- خودای گەورە گۆڕی پڕ نور کا!-؛ نەک مەلیک مەحمود کە پاشایەتیی دەویست بۆ کوردو کەچی ئێستا کاتێ من دەچم بەبیر سلێمانییەکان دێنمەوە دەڵێم (کورد نەک هەولێر- بەسلێمانیشەوە شایستەی پاشایەتییە!)؛ دێن دەڵێن: مەسعود بارزانی پارەی لەفەرهاد پیرباڵ وەرگرتوە!
پێکەنینم حەتتا بەئسلوبی نوسینی خۆشم دێت، نەک هەر بەئەخلاقی تەفکیریان.
"گو” چونکە وشەیەکی جوان نیە، بەکورتی دەیبڕێنمەوە و دەڵێم دوەم هۆ و زەرورەتبونی ئەوەی (بۆچی) هەر هەمو حزبە ئیسلامییەکان ناچار بە(یەک گرتن!) ببن باشترە؛ (جگە لەوەی چونکە حزبەکانی دیکەش یەکتر دەگرن لەداهاتوی کوردستانی نوێی پاش ئازادی)؛ ئەمەی خوارەوەیە بەڕای من:
لەناو یەک لیستی پەرلەمانیدا بن، بەشەرەفتر دەبن لای خودا.
من ئەم پڕۆژەی شۆڕشی سپییەم، لەئاخرین کتێبم بەناونیشانی (ههههە .. زەواج)، لەڕۆژنامەکانیش، زۆر بەفراوانی‌و دەیان جار بڵاوکردۆتەوەو نوسخەم بۆ (سەرۆک)و هەمو سەرکردەی حزبەکانیش ناردوە. – من بۆ خۆم لەمەودوا بەفەرمی، تەنیا بۆ مەسعود بارزانی دەنوسم (سەرۆک)، بەوانی دیکە دەڵێم "سەرکردە”). چونکە تۆ لەموسابەقەی مەلەوانی‌و پاسکیل‌و ماراتۆنیش "ناوێک” یان خەڵاتێک هەر دەبێ بدەیتە ئەو سەرگەڤازەی لەهەموان ئازاترەو بەزمانی وەرزش پێی دەڵێن (براوە). هەرچەند بەجەنابی خۆشەویستی خۆشیەوە سەرۆک، خەڵک‌و سەرکردەکان سێ ساڵە هیچیان هەر جوابیشم نادەنەوە!
چ نیگەران و توڕەش نابم ئەگەر ئەسڵەن هەر بەشێت‌و نەخۆشی دەرونیم بزانن؛ چونکە من باوەڕو متمانەم زۆر زۆر زۆر کەم بەهەر رەئیس حزبێک ما: بەخۆم‌و خودام نەبێ!
تاقانە نوسینێکمە لەژیانمدا کەیفم پێی‌و شانازیم بێ ئەم وتارە –ببورن– زۆر درێژەم.
گوتم؛ بەپارتی دیموکراتیشەوە، دەزانم؛ بەم سیستەم‌و تیۆرە تازەیەی من سەغڵەت‌و زیانمەند دەبن. ئەمەش چونکە بەپێی ئەو سیستەمەی کە من بۆ بەرژەوەندیی تاک‌و ژن، بەگشتیش بۆ کوردو بۆ بوژاندنەوەی ئابوری‌و کشتوکاڵی گەل‌و بۆ پەرلەمانم خستۆتە ڕو (ئەم تیۆرەم، کە حکومەتێکی دادپەروەرو نیشتیمانیی گەورەی کوردستانیی تەواوی، یەک خەڵک‌و یەک خاک‌و یەک خودای هاوبەش‌و دیموکراسیشی لەسەر دادەمەزرێت؛ ئەوەیە کە پێویست دەکات (لیستی حزب) لەپەرلەمان بچێتە دەرەوە؛ لیستی کۆمەڵانی خەڵکی کوردستان جێگەی بگرێتەوە.
خۆ منیش دەزانم ئەمە زیان‌و مەترسییە بۆ سەر حزبەکان، چونکە ئەوکاتە دەبێ بچین سیستەمی پەرلەمان – خۆی بگۆڕین، نەک چڕوچاوە ناشیرینەکانیان.
ئەم شۆڕشی سپیە، ئی من نیە، بەڵکو بیرۆکەی قازی محمدو جەلال تاڵەبانی‌و فەیلەسوفی ئەمریکایی (جۆن ڕاوڵس)ە کە لەکتێبی (تیۆری دادپەروەری) لێمکۆڵیوەتەوە: زۆر بەزەبر کاریکردە سەر سیاسەتی گەشانەوەی ئابوریی ئەمریکای ساڵانی ١٩٧٠. – ئەگەر باوەڕ ناکەن، لەئۆباما بپرسن!
ئەم رێگایەی ئەمن پیشانتانی دەدەم، بەئاشکرا پێتاندەڵێم: .. ئەگەر هەموتان ئاشتی‌و یەکسانی‌و دادپەروەری‌و خوداناسیتان دەوێت‌و دەتانەوێت ئیسلام‌و هەمو کوردستانییەکان ئازادو ئاشت‌و یەکسان بژین لەسایەی یەک باوکی باوەڕپێکراوی هەمومان‌و بۆ هەمومان؛ ئەوا دەبێ باوەڕ بەمنیش بکەن کە پێتان دەڵێم من ئەم یەخە دادڕان‌و خۆ- ڕوت – کردنەوەیەی خۆم، کە ئەمە دوەم جارمە؛ تەنیا بۆ رێکخستن‌و یەکخستنی خاک‌و خەڵک‌و خوداتانە! دەنا من سوێندم بەقەبری هومای دایکم خواردوە: نە هیچ موڵکێکم بەناو، نە هیچ بەقسەی کەسیشتان هەڵپەڕم لەمەودوا.
من پێشنیاردەکەم جەنابی سەرۆک ئەگەر ئیزافاتی بخاتە سەر، یان بیەوێ باشتری لەگەڵ خۆمان بگونجێنێت، ببێتە تیۆرو بنەمایەک بۆ هەمو دەوڵەتانی رەشهەڵاتی ناوەڕاستیش. من دەڵێم: حەتمەن بۆ ئەو ئەمریکاو فەرەنساو تورکیا پڕ فوحش‌و فەسادو برسێتیەش؛ رێگاو دەست زۆر زۆر دەدا لەپێناو بەرقەرارکردنی ئاشتی‌و دادپەروەری‌و نەهێشتنی تیرۆریش کە بەئاشکرا دەڵێم "ئیسلام-خۆی دەستی تێدا هەیەو سەرچاوەی ئەسڵ‌و یەکەم یەکەم یەکەمە: هیچ کەسێکی تر نا بەغەیری خودی ئیسلام خۆی بەرپرسی ئەم تیرۆرە گەردونییەیە!
بۆیەشە گوتم: حزبە ئیسلامییەکان ئەگەر لەناو یەک لیستی پەرلەمانیدا بن، بەشەرەفتر دەبن لای خودا. چونکە خودا زۆر زۆر حەزو ئومێدی بەیەکگرتنی هەمو موسڵمانی جیهان هەبو! حەیف نەیدیت!
ئەگەر -باشە هیچ نەبێ- حزبە ئیسلامییەکانی یەک وڵات (کوردستان با ببێتە "ئەزمونێك”و کورد دەسپێشخەرو پێشڕەو بێت؛ وەک سەڵاحەددین!!! – بۆ هەمو دەوڵەتانی ئیسلام!
ئەوکاتە دەرەنجام: خەڵک لێیان ڕازی، لەهەمان کات لەخەڵکیشەوە هەڵدەبژێردرێن وەک نوێنەری موسڵمانانان لەناو پەرلەماندا، نەک وەک ئەندامی سەرکردایەتییەکانی ئێستایان‌و حزبەکانی دیکەش، بچن خەڵکیترو کادیرە ئیماندارە راستەقینەکانیان مەحروم بکەن لەبەشەکانی ناوخۆ بچن بێن، بێن بچن بە”سازان” لەگەڵ ئەو عەلمانییە درۆزن‌و عیفریتانە رێک بکەون!!! (دیتان سازان چیتانی لێکرد؟). هههههە.. ئەویش بەسازانی ناو خۆیان – نەک ئی ئەندام‌و کادیرە قوڕبەسەرەکانیان بەدەست سەرکردایەتییە "گەوجێندراوەکانیان” کە میللەت دەخەنە (هەڵەتە) بونەوە، عەینەن خۆیان:
ئەمەش چونکە بەچاوی خۆتان دیتان: سەرکردەی حزبی وامان لەناویاندا دیت غاری دایە لەندەن؛ شەش شەو و حەفت رۆژ نەیوێرا بێتەوە تەنانەت بۆ سلێمانیش.. مەگەر لەگەڵ پشتمێرەکانیان "حیمایەکانیان” نەبێ!
ئی واشیان تێدابو، لەداخی ئەوەی فڵان سەرکردە ترسنۆک بو، گوتی: باشە، خۆ ئەمن لەوی کەمتر نیم با ئەمنیش لەڕقی ئەو، بەتایبەتی مادام ئەو لێرە نیەو (شار لەدەست خۆمە) بابچم شار وا پارچە پارچە بکەم خەڵک وایان بەسەر بێت کە لە”شار” نەک سەگ بەڵکو محافزیش” نەناسرێتەوە کێییە!؟
کۆڕەک تەلەکۆم تۆمارەکەی ماوە بپرسن کاتی خۆی بەرێبین هەردیم گوت: (رێبین گیان.. بەتۆش‌و بە بەردەکی سەراش دەڵێم: ئەی هاوار "گوناحە” کە ئەم سلێمانییە رۆحەی من! دێ، بەم سیاسەتەی عەلی باپیرو نەوشیروان‌و یەکگرتو، هەڵدەخەڵێت‌و دەسخەڕۆ، دە ببێتە چوار پارچە بەشەرەفم هەپڕون بەهەپڕون دەبێت شار!”.
سوێند بەخودای گەورە، سوێند بەقەبری پڕ نوری (هوما)ی دایکم؛ پێکەنی، گوتی: (ئێ.. کاک نەوشیروانیش ئەمەی ئەوێ! گرنگ ئێمە لەبنەماڵەی بارزانی جودا ببینەوە، تۆ بۆ خۆت جار جار وەرە سەرێکمان لێیە لەسلێمانی.. ههههه .. )!
ئەفسوس: ئاخ!.. چەند گریام من بەم پێکەنینەی.. ئەو هاوڕێ ئازیزەم. ئەو شارەی، لە‌هەڵمەت و قوربانییەوە بەچی گەیاند!
کەواتە، دەتوانین بڵێین سێیەم هۆ و هۆکاریشمان بۆ بەدیارکەوت، وەک من شەش ساڵ پێش ئەمڕۆ پێتانم گوت‌و باوەڕتان نەکرد، ئەویش ئەمەیە:
تەنیا یەک پیاو سەرکەوت‌و دەتوانێ زیاتریش سەرکەوێت، تەنیا یەک "سەرکردە” ئەوەندە حەکیم بو بتوانێ لەم جەنگە ناوخۆو دەرەکی‌و گەردونییەدا کۆنتڕۆڵی خۆی‌و خاک‌و خەڵک‌و خاپەرۆکەکان‌و بەکرێگیراوانیش بکات؛ کۆنتڕۆڵی ئەژدادی مەلیکی سعودیەو ئەردۆگان‌و ئاغای خاتەمیشت بۆ بکات، کە ئەویش: مەسعود بارزانییە!-، کە دەشبێ زۆر زۆر زۆر دەرسی لەو ژەهرە پیسەی فارسەکانیش وەرگرتبێت کە کاتی خۆی بۆ جەمشیدو سمکۆو قاسملو بەناوی گفتوگۆ بۆیان خستبوە ناو خواردنەوە لەو سەفەرەی کە خوا بەڵکو حەزبکا بۆ ئێران، بۆ لای ئەو خەنجەر لەپشت دەرانەی کورد؛ دەیکا.
ئەم سێ حەقیقەش، بەتایبەتی ئی یەکەم؛ نەک کەر، منیش دەیزانم!
بۆیەشە هەر کەسێک رقی لەدەوڵەتی کوردستان‌و مەسعود بارزانی بێت دەچێ "سازان” لەگەڵ جمهوریی ئیسلامیی ئێران دەکا!
باشترین کەس کە بیەوێ پڕ پارەو پڕ چەکت بکات لەدنیا بۆئەوەی کوردی پێ لەناو ببەیت، بەڕای من: ئێرانە!
بۆیە بەڕای من: ئێران، واتە کەسێک، کە پشتی، سەد لەسەد، پێ ببەستە: ئەگەر ویستت خەنجەری پێ لەخەونی هەر کوردێکی حەزت کرد بدەی!
حەزدەکەی بڕۆ بزنێکی کوردیش بکوژە؛ ئێران پێی خۆشە!
لەم یەکترگرتنەوەیەی حزبە ئیسلامییەکان؛ هەر کامەیان سەرکردەکەیان ژیرترو زوتر لەم قسانەم تێ بگەن: ئەوان دەیبەنەوە!

(٢)
لقد مات اللە… !
فرێدریک نیتشە، فەیلەسوفی ئەڵمانی، لەساڵی (١٩٠٠) نوسی: (خودا مرد). من دەڵێم لەو ساڵەوەی ئەو فەیلەسوفە بلیمەتە ئەم کفرو هەڵەیەی کرد کە بۆ فیکری ئەمڕۆی من بەخێر کەوتەوە، تا رۆژی ئەمڕۆ – راستە؛ ئێمە، هەمومان، هەمو بەشەرییەت، بێ خودا دەژیاین؛ مەبەستم: بەبێ ئیستیعانەکردن بەخودا دەژیاین؛ هەمو بەشەرییەت.
داعش لەڕێگەی گرتنی موسڵەوە، بەپێی سیستەمی فیکری نیتشە ئەگەر بیربکەینەوە –استغفراللە– خودای هەر بەیەکجاری سەربڕی.. بەتایبەتیش خودا لەدیدی عارەب‌و ئیسلامانەوە.. مەعنای نەما. من راست‌و حەق دەڵێم، رادیکاڵانە.
کەواتە لەمەودوا، بەڕای من؛ ئەرکی یوئێن‌و تەل ئەبیب‌و ئۆبامایە، ئەرکی رۆشنبیرو حزبە ئیسلامی‌و مەسیحی‌و مەلا بەڕێزەکان‌و سەرکردەکانی کوردستانە، ئەرکی دکتاتۆرەکانی ئێران‌و سعودیەو بەتایبەتیش (سەرۆک)ی هەرێمی خۆمان ئەمەیە کە: خودامان یەک بخەین!
.. خۆ هیچ نەبێ، لەڕۆژهەڵات، لەڕێگاو بەهۆی بارزانییەوە دەتوانین ئەمە بکەین! ئەمەش بەمەرجێک ئەگەر کورد خۆی بڕیاری دا سەرمەشق بێت لەجیهاندا! من شەخسی خۆم رازیم خودای خۆم لەگەڵ خودای هەر مەسیحی‌و جولەکەیەکیش یەک بخەم: بەبێ هیچ مەرجێک!
ساڵی ٢٠١٧ کوردستان دەبێ تەنیا یەک خودای هەبێ، نەک (تەعەدودیەتی حزبی! وەک بەمەلا بەختیارو دیموکراسەکانی تر پێ فریو دران!).
ساڵی ٢٠١٧ کە ساڵی سەربەخۆیی‌و شۆڕشی سپیی کوردان دەبێ، ساڵی هاتنەوەی خودایە ئینشاڵڵا بۆ ناو ئەو پەرلەمان‌و مەحکەمەیەی ئەمن میزم پێدا کرد. ئەمەش لەمانگی هەمان ئەو ئۆکتۆبەرەی سێ ساڵ بەخۆتان تاریک‌و تاخیرتان کرد هاتنی بەڕاستگەڕانی ئەو بەڵێنەی خۆم پێتانم دابو– ئەگەر بەبیرتان بێ "چونکە من زاکیرەم لاواز بوەو نەخۆشم”.
بەکورتی: رۆژنامەی "کوردستانی نوێ” پێویستی چۆن بەتەنیا مام جەلالێک هەبو هەیە، ئاوهاش کۆمەڵگەی "کوردستانی نوێ” پێویستی بەتاکە خودایەک هەیە؛ کە لەدیدێکی هاوبەشی هەمو کوردستانییەکەوە تێگەیەندرابن، نەک تەنیا لەدیدی هاوبەشی حزبە ئیسلامییەکانەوە؛ بەڵکو لەیەک دیدی کوردستانییەوە، بەمەسیحی‌و ئاینەکانی دیکەشەوە: یەک خودا؛ خودای دلانڤان‌و دلۆڤانی هەمبەر هەمومان!
بێگومان بەجیا لەئێزیدییەکان، کە من لەم بارەوە بۆچونی دیکەم هەیە.
من دانی پێدادەنێم: پێش قۆناغی ئەو ژیانەم کە هێشتا میزم بەدادگاکانتان‌و بەپەرلەمانەکەتان دانەکردبو جارێ، بۆتانم شەڕح دەکرد کەچی تێم نەدەگەیشتن، یان باوەڕتان پێم نەدەکرد کە بەقەدەر هەر هەموتان عەقڵی خۆم، لەسیاسەتی بەتایبەتی رەشهەڵاتی ناوەڕاست‌و داڕشتنەوەی، ئاگادارم ئەمن.
لەشرٶڤەکردنی ” دۆزەکان” و "دۆخەکان” و دەوڵەتەکان دەرسم دەدایەوە پێتان ئەگەر بەمەرجێک هەموتان حەزتان بکردایە پێش ئەوەی لەبەردەرکی سەرا بێن بوتڵەئاوم تێ بگرن!
دان پیانانەکەم ئەوە بو بڵێم: ئەوکاتە نەدەهاتم بێم بەدیل (ئەڵتەرنەتیڤ)‌و چارەسەرەکانتانیشتان هەر بۆ بخەمە پێش چاو! بەڵام ئێستا سەد بەدیلم بۆ هەر هەموتان هەیە!
من لێتانی ناشارمەوە ساڵی پێرار بو چومە پاریس بۆ لای دکتۆر کەنداڵ نەزان‌و بەفەرمی دانم نا بە(بلیمەتی)ی خۆم!
داواشم لێکرد –چونکە کورد لەم شتانە تێناگەن- داوا لەبێرنارد کوشنەری هاوڕێم‌و لەمسیۆ هۆڵاندی سەرکردەی فەرەنسای وڵاتی دوەمم بکات لیژنەیەکی پسپۆڕ بەزوترین کات پێکبهێنن‌و ساغ ببێتەوە بۆ گەڕەکی جولەکانی هەولێرو بۆ هەندێ لە”گردە” سەرشۆڕەکانی سلێمانی: (ئایا بەڕاستی من شێتم؟!) یان لەڕوی دەرونییەوە تەواو نیم؟
بمبورن کە ئەم وتارەم وەک شیعرەکانی هەندێ ئەم دواییەم ناونیشانەکەی: لەکۆتاییدایە؛ کە بریتیە لەزۆر زۆر زۆر بەگەورەیی ناوی خۆم، واتە وتارەکەم ناونیشانی، لەخوارەوەیە!
کە ئەمەش جۆرە هونەرێکی جیاوازە بۆئەوەی بەهەمو بەڕێزانی ئەندام‌و کادیرو سەرکردەی حزبە ئۆپۆزیسیۆنەکانی هاوڕێم بڵێم:
بەقسەمتان ئەگەر بکردایە لەبەردەرکی سەرا، تەرازوی بەختی لالەنگی ئاخری عومرم نەدەگەیشتە ئەو رۆژەی خۆزگە بخوازێت گەورەترین حەکیمیشتان هەر بەمردن؛ بەڵام ئاخ ئەمڕۆ نەکەوتایەتە ژێر رەحمەت‌و حوکمی لەسەر حەق‌و لەسەر حەق هەمیشە بەجوابهاتوی قەڵەمی
"فەرهاد پیرباڵ”!