لەبری پارێزگاری سلێمانی سەردار قادر رایگەیاند" حکومەتی هەرێم بۆ چارەسەرکردنی کێشەی کارەبا لە سلێمانی بڕی یەک ملیار دیناری تەرخان کردووە".
سەردار قادر، لەبری پارێزگاری سلێمانی لەكۆنگرەیەكی ڕۆژنامەوانیدا ڕایگەیاند " بڕە پارەیەكیان پێویستبوو بۆ چارەسەری كێشەی محاویلەكانی كارەبای سلێمانی، لەمەخزەنەكان محاویلە نەبوو و زۆری سوتابوو و وەرشەی كارەباش فریای چاككردنی نەدەكەوت، بۆیە بڕی یەك ملیار دینار بۆ كێشەی محاویلە و سیانەی هێڵەكان لەلایەن سەرۆكایەتی ئەنجومەنی وەزیرانەوە دابینكراوە".
ناوبراو " جێگری وەزیری كارەبا بڕیاریداوە لەهەفتەی ئایندەدا كۆبونەوەیەك لەسەر ئاستی پارێزگاكان بكرێت بەمەبەستی پێداچوونەوە بەبڕی دابەشكردنی كارەبای نیشتیمانی بەپێی ڕێژەی بەشداربووان".
سەردار قادر " كارمەندانی كارەبا پێشمەرگە ئاسا لەسەر خەتن و كاردەكەن و پێویستیان بەپشتگیری و هاندان هەیە، بۆیە داوای بڕێك پارەیان كرد بۆ كارمەندان".
هاوكات هۆگر شاڵی جێگری وەزیری كارەبای حكومەتی هەرێم لەو كۆنگرە ڕۆژنامەوانییەدا ڕایگەیاند، هاوكاری هەموو شارەكان دەكەن و لەهەوڵدان بۆ زیادكردنی كارەبای نیشتیمانی، بەڵام قەیرانی دارایی دەستی گرتوون.
هێمای بۆ ئەوەشكرد، وەزارەتی كارەبا بەیەك چاو سەیری هەموو پارێزگاكانی هەرێم دەكات.
ئاشکراشی کرد، هەموو شارەكانی هەرێم كاتژمێری بڕینیان هەیە و جیاوازی نەكراوە.