فراکسیۆنى گۆڕان لە پەرلەمانى کوردستان ڕایگەیاند، كوشتنی خۆپیشانده‌ران و برینداركردنیان پارتی لێیان بەرپرسیارە.

له‌به‌یاننامه‌یه‌كدا فراكسیۆنی‌ گۆڕان له‌په‌رله‌مانی‌ كوردستان، ڕایگه‌یاندوه‌ "له‌كاتێكدا خوشك و برا ئێزیدیه‌كان پێویستیان به‌ پشتیوانی‌ و پاراستن هه‌یه‌، به‌ڵام له‌لایه‌ن هێزه‌كانی‌ سه‌ر به‌پارتی‌ دیموكراتی‌ كوردستانه‌وه‌ ڕێگه‌ی‌ خۆپیشاندانیان پێنادرێت، جگه‌ له‌ ڕێگری لێ‌ كردنیشیان، دوێنێ‌ له‌لایه‌ن چه‌كدارانی‌ پارتیه‌وه‌ به‌فیشه‌ك وه‌لاَمدرانه‌وه‌ كه‌ شه‌هید و برینداری‌ لێكه‌وتۆته‌وه‌"
له‌به‌شێكی‌ تری‌ به‌یاننامه‌كه‌دا ئاماژه‌بۆ ئه‌وه‌كراوه‌، ئه‌و ڕوداوانه‌ مه‌ترسی‌ شه‌ڕی‌ نه‌گریسی‌ ناوخۆی‌ لێ‌ ده‌كرێـت و جه‌ختیشده‌كاته‌وه‌ ناكرێت به‌ هیچ هۆكارێك ڕه‌وایه‌تی‌ به‌په‌لاماردان و پێكدادانی‌ ناوخۆیی‌ بدرێت و پێویسته‌ رێز له‌ڕوانینی سیاسی‌ و داواكاریه‌كانی‌ خوشك برا ئێزیدیه‌كان بگیرێت.لەبەشێکى ترى ڕاگەیەندراوەکەدا هاتووە، ئێمه‌ له‌ فراكسیۆنی گۆڕان له‌ په‌رله‌مانی كوردستان به‌توندی ئیدانه‌ی هه‌موو ئه‌و پێشێلكارییانه‌ی مافی مرۆڤ و مافی ئازادی خۆپیشاندان ده‌كه‌ین و "كوشتنی خۆپیشانده‌ران و برینداركردنیان به‌ته‌واوی دژی پره‌نسیپه‌كانی دیموكراسییه‌ و پارتی لێیان بەرپرسیارە".

هەروەها وتوشیانە "به‌رپرسیارانی ئه‌و ته‌قه‌كردن و پێشێلكارییانه‌ هیچ خه‌م و نیگه‌رانییه‌كیان له‌ئاست دۆخ و خراپی ژیانی خوشك و برا ئێزدییه‌كانماندا نییه‌".