بەرپرسی كۆمیتەی یەكێتیی لە ناحیەی گوێڕ رایدەگەیەنێت، لە دوو بیرە نەوتی سنووری ناحییەكە ڕۆژانە 10 بۆ 12 تانكەری 36 هەزار لیتری نەوت دەردەهێندرێت و دەبرێتە پاڵاوگەیەكی هەولێر ئاشكراشدەكات، ئەو نەوتە لە لایەن مەنسوور بارزانییەوە دەردەهێندرێت.״

ئەحمەد زاگە، بەرپرسی كۆمیتەی یەكێتیی لە ناحیەی گوێڕی سنووری قەزای مەخمووری سەر بە موسڵ  بە رۆژنامەی ئاژانسی راگەیاندووە " لە گوندی تەراشی سەر بە ناحیەی گوێڕ، دوو بیرە نەوتی لێیە كە یەكێكیان چوار كیلۆمەتر لەوی ترەوە دوورە ‌و بۆرییان لە بیری یەكەمەوە بۆ بیری دووەم ڕاكێشاوە ‌و ڕۆژانە 10 بۆ 12 تانكەری 36 هەزار لیتری نەوتی لێ دەردەكرێت ‌و مەنسوور بارزانی كوڕی مەسعود بارزانی سەرپەرشتی دەكات".

ئاماژەی بەوەشكردووە: " هەم لای بیرەكان ‌و هەم لەگەڵ تانكەرەكانیشدا هێزی چەكداریان لەگەڵدایە ‌و پاش ‌و پێشیان دەكەون و بە شەو و ڕۆژ نەوت لەو بیرانە دەردەهێندرێت".

ئەحمەد زاگە ئەوەشی ئاشكراكرد ، "دوای باركردنی نەوتەكە دەبرێتە پاڵاوگەی لازان لە نزیك گوندی تەرزان هەر لە ناحیەی گوێڕ كە پاڵاوگەكەش هی مەنسوور بارزانییە".