مەسعود بارزانی سەرۆکی پارتی دیموکراتی کوردستان ڕایگەیاند هیچ بیانوویەكی یاسایی و تەكنیكی بۆ دواخستنی هەڵبژاردن بوونی نییە.

مەسعود بارزانی لەگەڵ سكرتێر و ئەندامانی مەكتەبی سكرتاریەت و بەرپرسی ئەنجوومەنی پارێزگاكانی یەكێتی ئافرەتان كوردستان كۆبووه‌ته‌وه‌و لەبارەی هەڵبژاردنی پارلەمانی هەرێمی كوردستانەوە ڕایگەیاندووە"هیچ بیانوویەكی یاسایی و تەكنیكی بۆ دواخستنی هەڵبژاردن بوونی نییە و دواخستنی هەڵبژاردن پێشێلكردنی یاسا و دامەزراوەكانی هەرێم و ئیرادەی گەلە و زوڵمێكیشە كە لە خەڵك دەكرێت و بە پێویستی زانی كە هەڵبژاردن لە كاتی دیاریكراوی خۆی ئەنجامبدرێت".

بە گوێرەی ڕاگەیەندراوی کۆبوونەوەکە "لەو كۆبوونەوەیەدا بەرپرسی مەكتەبی ناوەندیی ڕێكخراوە جەماوەری و پیشەییەكانی پارتی و سكرتێری یەكێتی ئافرەتانی كوردستان كورتەیەكیان لە كار و چالاكییەكانی یەكێتی ئافرەتان لە چەند ساڵی ڕابردوو و شەڕی تیرۆریستانی داعش و ڕیفراندۆمی سەربەخۆیی كوردستان و هەروەها یارمەتیدان و پێشخستنی ڕەوشی ئافرەتان لە كوردستان و كێشەكانی ئافرەتان و ئامادەكارییەكان بۆ بەستنی كۆنگرەی یەكێتی ئافرەتانی كوردستان بۆ سەرۆك بارزانی خستەڕوو. سوپاسی ڕۆڵی سەرۆك بارزانیان كرد لە پشتگیریكردنی ڕەوشی ئافرەتان و هەروەها پشتیوانیكردنی یەكێتیی ئافرەتانی كوردستان."