بارینى بەفر لە کوردستان بە تایبەتى لە هەرێمى سەرحەد کاریگەرییەکى زۆر لەسەر هاتووچۆی هاووڵاتییان دروستکردووە. بەهۆی بارینى بەفرەوە سەدان ڕێگا داخراوە.
ئاژانسی هەواڵی فیرات نیوز بڵاویکردووەتەوە "بەفر و تەرزە لە زۆرێک لە شارەکانى کوردستان دەبارێ و زۆری بارینى بەفر و تەرزە جوڵەى هاووڵاتییانى پەکخستووە. ماوەى ٢ رۆژە بە بەردەوامى لە زۆربەى ناوچەکانى باکووری کوردستان بەفر و تەرزە دەبارێت. ئەوەش بووەتە هۆی ئەوەى رێگاى سەدان دێ و لادێ بگیرێت و بەهۆی خزانى ئۆتۆمبێلیشەوە چەندین کەس بریندار بوون"
ڕوونیشی کردووەتەوە "بەفرێکی زۆر لە شارەکانى وان، جۆلەمێرگ، موش، بەدلیس، قەرس، ئەردەخان و ئاگری و چەندین شار و شارۆچکەى تری باکووری کوردستان باریوە. لە گوندەکانى ئەو سنوورانەدا مەترێک بەفر زەویى داپۆشیوە. رێگاى سەدان دێ و لادێ گیراون. لەبەر ئەوەش هاووڵاتییانى ئەو سنوورانە بە تایبەتى هاووڵاتییانى دێ و لادێکان لە گوندەکانیاندا گیریان خواردوە و ناتوانن جموجوڵی ئاسایى و رۆژانەیان ئەنجام بدەن و تەنانەت ناتوانن نەخۆشەکانیش بۆ نەخۆشخانە بگوێزنەوە".
هەر بە گوێرەی هەواڵی ئەو میدیایە "بەهۆی بەفر و سەهۆڵبەندانەوە لە رێگای نێوان وان – ئەردیش دا رووداوى هاتووچۆش ڕوویداوە و . بەهۆی رووداوەکانى هاتووچۆەوە ١٦ کەس بریندار بوون. شایەتحاڵەکانى ئەو روودانەوە رایانگەیاندووە، لەو رووداوانەى هاتووچۆدا ٦ ئۆتۆمبێل وەرگەڕاون.
ماوەى ٢ رۆژە بە بەردەوامى بەفر دەبارێت و هەموو رێگاکان بە بەفر داپۆشراون، بەڵام تیمەکانی شارەوانی و رێگاوبان هیچ یەک لە رێگاکانیان پاک نەکردووەتەوە و خوێ بە رێگاکاندا ناکەن.