گروپە چەكدارەكانی سەر بە توركیا لە شاری باب و منبج هێرشیان كردە سەر شەڕڤانان و زانیاری لەبارەی زیانەكانەوە ئاشكرانەكراون.
ئاژانسی "هاوار نیوز"ی بڵاویكردەوە كە شەوی ڕابردوو لە ناحیەی عەریمەی رۆژهەڵاتی شاری باب، گروپە چەكدارەكانی سەر بە توركیا هێرشیان كردووە و لەلایەن شەڕڤانانی "ئەنجومەنی سەربازیی باب"ەوە بەرپەرچ دراونەتەوە.
ئاژانسەكە ئاماژەشیدا بەوەی شەڕەكە تا درەنگانی شەو بەردەوام بووە، بەڵام هیچ زانیاریەكی لەبارەی زیانەكانەوە ئاشكرانەكردووە.
هاوكات ئەنجومەنی سەربازیی منبج رایگەیاند كە لە شەوی دووشەممەوە تا شەوی سێشەممە، گروپەكانی چەكدارەكانی سەر بە توركیا كە بە هێزەكانی قەڵغانی فورات ناسراون، بە چەكی مامناوەند و قورس، چەند پێگەیەكی شەڕڤانانیان كردووتە ئامانج.