ئارایشتگای یارا له‌ سلێمانی داخرا

‌

به‌هۆی پابه‌ند نه‌بون به‌ مه‌رج ورێنماییه‌كانی كاركردن، لیژنه‌ هاوبه‌شه‌كانی قائیمقامیه‌تی سلێمانی ئارایشتگایه‌ك داده‌خات.

شاتو حسێن، سه‌رۆكی لیژنه‌ی ئارایشتگاكانی سه‌ر به‌لیژنه‌ هاوبه‌شه‌كانی قائیمقامیه‌تی سلێمانی رایگه‌یاند" له‌ئه‌نجامی سه‌ردانه‌ به‌رده‌وامه‌كانی لیژنه‌كه‌ بۆ ئارایشتگا و ئه‌و شوێنانه‌ی خانمان بۆ جوانكاری روی تێده‌كه‌ن و پشكنینی بۆ شوێن، ئامێرو ئه‌و كه‌سانه‌ی كاری تێدا ده‌كه‌ن، ده‌ركه‌وتوه‌ ئارایشتگای یارا له‌ گه‌ڕه‌كی چوارچرای شاری سلێمانی، پابه‌ندی مه‌رجه‌كانی كاركردن نابێت".

وتیشی" یه‌كێك له‌ سه‌رپێچیه‌كانی ئارایشتگای یارا جێبه‌جێ نه‌كردنی مه‌رجه‌ ته‌ندروستیه‌كانه‌ له‌ شوێنه‌كه‌یدا، كه‌ ئه‌مه‌ش پێچه‌وانه‌ی رێنماییه‌كانه‌ و مه‌ترسی گواستنه‌وه‌ی نه‌خۆشی له‌سه‌ر ئه‌و خانمانه‌‌ دروست ده‌كات كه‌ سه‌ردانی ئه‌و ئارایشتگایه ده‌كه‌ن‌".

دەشڵێت" مۆڵه‌ت، بنه‌مای كاركردنه‌ بۆهه‌رپیشه‌یه‌ك كه‌له‌شوێنێكدا ئه‌نجام ده‌درێت، بۆیه‌ پێویسته‌ ئه‌و شوێنه‌ی پیشه‌یه‌كی دیاریكراوی تێدا ئه‌نجام ده‌درێت مۆڵه‌تی ‌لایه‌نه‌ په‌یوه‌ندیداره‌‌كان وه‌رگرتبێت، پاشان ده‌توانێت كاری تێدا بكات، به‌پێچه‌وانه‌وه‌ لیژنه‌كانی قائیمقامیه‌ت شوێنه‌كه‌ و خاوه‌نه‌كه‌شی روبه‌روی رێكاریی یاسایی ده‌كرێنه‌وه‌‌".

ئاماژه‌ی بۆ ئه‌وه‌كرد" به‌فه‌رمانی قائیمقامی سلێمانی ئارایشتگای یارا داده‌خرێت تا ئه‌و كاته‌ی مۆڵه‌تی كاركردن له‌ لایه‌نه‌ په‌یوه‌ندیدراه‌كان وه‌رده‌گرێت و خاوه‌نه‌كه‌شی روبه‌روی رێكاری یاسایی ده‌كرێته‌وه‌".

له‌كاتی سه‌ردانی لیژنه‌ هاوبه‌شه‌كان بۆ دوكان و بازاڕ و شوێنه گشتیه‌‌كان، ‌پێشینه‌ی كاره‌كانیان هه‌ڵسه‌نگاندنی شوێنه‌كه‌یه‌ له‌ڕوی ته‌ندروستییه‌وه‌‌، پاشان ئه‌و ئامێر پێداویستیانه‌ی رۆژانه‌ به‌كاری ده‌هێنن و ئه‌و كه‌سانه‌ی له‌شوێنه‌كه‌ كار ده‌كه‌ن، له‌كاتی هه‌بوونی كه‌موكورتی شوێنه‌كه‌ و خاوه‌نه‌كه‌شی روبه‌روی رێكاری یاسایی ده‌كرێته‌وه‌.
 



PM:04:34:29/01/2020






ئەستێرەکان

Spee Media