پارێزگاری‌ سلێمانی‌ داوایكرد هاوڵاتیان به‌ ‌شێوازی‌ شارستانی‌ و ئاهه‌نگ ئامێز خۆشییه‌كانیان ده‌رببڕن و جه‌ختیشی‌ له‌وه‌ كرده‌وه‌ كه‌ هه‌ر كه‌سێك په‌نا به‌رێته‌ به‌ر رێگه‌ی‌ نا شارستانی‌ و به‌ كارهێنانی‌ چه‌ك و ته‌قه‌ی‌ خۆشی‌  رووبه‌ڕووی‌ یاسا ده‌كرێته‌وه.

ئه‌مڕۆ به‌هرۆز محه‌مه‌د ساڵح پارێزگاری‌ سلێمانی‌ په‌یامێكی‌ ئاراسته‌ی‌ دانیشتوان و هاووڵاتیانی‌ سلێمانی‌ كرد و رایگه‌یاند "ئه‌وپه‌ڕی‌ خۆشحاڵی خۆمان ده‌رده‌بڕین، به‌ باش بوونی‌ ته‌ندروستی‌ جه‌نابی‌ مام جه‌لال سه‌رۆك كۆماری‌ عیراق و ده‌ركه‌وتنی‌ به‌ ته‌ندروستیه‌كی‌ باشه‌وه‌و  بڵاوبوونه‌وه‌ی‌ پارچه‌ك ڤیدیۆی‌  له‌كاتی‌ به‌شداریكردنی‌ له‌ پرۆسه‌ی‌ ده‌نگداندا.

پارێزگاری‌ سلێمانی‌ له‌ په‌یامه‌كه‌یدا  تكا له‌سه‌رجه‌م هاووڵاتیانی‌ خۆشه‌ویست ده‌كات "بۆ ئه‌وه‌ی‌ هاووڵاتیان و گه‌شتیاران و میوانی‌ سلێمانی‌ توشی‌ زیانی‌ گیانی‌ و ماددی‌ نه‌بن و هێمنی‌ شار نه‌شێوێت. دوور بكه‌ونه‌وه‌ له‌ رێگه‌ی‌ نامه‌ده‌نی‌ و ته‌قه‌ی‌ خۆشی‌  و به‌شێوازی‌ شارستانی‌ و ئاهه‌نگ ئامێز خۆشییه‌كانیان ده‌رببڕن".

جه‌ختیشی‌ له‌وه‌ ده‌كاته‌وه‌ كه‌ "به‌پێچه‌وانه‌وه‌ هه‌ر كه‌سێك په‌نا به‌رێته‌ به‌ر رێگه‌ی‌ نا شارستانی‌ و به‌ كارهێنانی‌ چه‌ك و ته‌قه‌ی‌ خۆشی‌  رووبه‌ڕووی‌ یاسا ده‌كرێته‌وه‌".