وەزارەتی تەندروستی حکومەتی هەرێم رایگەیاند" ڕێکار و داوای یاسایی لە دادگا بەرامبەر کەسێک دەگرێتە بەر کە خۆی بە پزیشک ناساندووە و هاوڵاتیان تووشی دڵەراوکێ و ترس و تۆقاندن کردوە".
وتەبێژی وەزارەتی تەندروستی حكومەتی هەرێمی كوردستان لە راگەیەندراوێكدا ئاشكرایكردوە" وەزارەتی تەندروستی ڕێكار و داوای یاسایی لە دادگا بەرامبەر كەسێك دەگرێتە بەر كە خۆی بە پزیشك دەناسێنێی و هاوڵاتیان تووشی دڵەراوكێ و ترس و تۆقاندن دەكات بەبێ هیچ بنەمایەك و دوور لە راستی بەبێ ئەوەی كاری ئەو كەسە بێت هەڵدەستێ بە بڵاوكردنەوەی هەواڵ و چەواشەكاری لە گرتەیەكی ڤیدیۆیی دا".
تەندروستی ئاشكرایكردوە: لەهەمان كاتدا شەرعیەت و بڕیار و ڕێنماییەكانی وەزارەتی تەندروستی لەكەدار دەكات و بەپێچەوانەی هۆشیاركردنەوەی هاوڵاتییان رەفتار دەكات.
ئاماژە بەوەشكراوە" بۆیە وەزارەتی تەندروستی داوای یاسایی لەسەر ئەو بەرێزە تۆمار دەكات و ئیجرائاتی یاسایی بەرامبەر هەر كەسێك دەگیرێتە بەر پڕوپاگەندەی نادروست یان ڕیكلامی دۆزینەوەی چارەسەر و قسەی بێ بنەما بڵاوبكاتەوە".
وەزارەتی تەندروستی جەختیشكردوەتەوە: هاوڵاتیانیش دڵنیا دەكەینەوە هیج نەخۆشێك و گومانلێكراوێكی نەخۆشی كۆڕۆنا نیە و دەروونیان شڵەژان نەكەن و ڕێنماییەكانی تەندروستی بە هێمنی لەبەرچاو بگرن.
ئەمەش لەكاتێكدایە، كەسێك كە خۆی بە دكتۆر دەناسێنێت گرتەیەكی ڤیدیۆی لە تۆڕە كۆمەڵایەتییەكان بڵاوكردوەتەوە و تێیدا هۆشداری دەدات بە هاوڵاتیان لە خۆپاراستیان لە ڤایرۆسی كۆرۆناو رایدەگەیەنێت، لە پارێزگاكانی هەرێم توشبوو بە ڤایرۆسی كۆرۆنا تۆماركراوە، ئەم ڤیدیۆیش هەر زوو لە تۆڕە كۆمەڵایەتییەكان دەنگدانەوەی بەدوای خۆیدا هێنا.