وەزیری تەندروستی داوای قەدەغەکردنی هاتوچۆ دەکات

‌


وەزیری تەندروستی حکوومەتی هەرێم، د. سامان بەرزنجی داوا لە وەزارەتی ناوخۆ و حکومەتی هەرێم دەکات بە هۆی تەشەنەکردن و بڵاوبوونەوەی زیاتری ڤایرۆسی کۆرۆنا قەدەغەی هاتوچۆ بۆ کاتێکی دیاریکراو ڕابگەیەندرێت.



لە کۆنفرانسێکی ڕۆژنامەوانی، د. سامان بەرزنجی رایگەیاند " ئێستا ڕۆژانە لە هەرێمی کوردستان ٣٠٠ حاڵەتی تووشبوون بە ڤایرۆسی کۆرۆنا و هەندێک جار زیاتریش تۆمار دەکرێ، بۆیە پێویستە قەدەغەکردنی هاتوچۆ بۆ ماوەیەک رابگەیەندرێت.


وەزیری تەندروستی پێیوایە، هۆکاری ئەو بڵاوبوونەوەی زۆرەی کۆرۆنا و گیانی لەدەستدانی تووشبوان، دەگەرێتەوە بۆ ئەوەی کە پەلە کرا لە هەڵگرتنی هەندێک رێککار لە هەندێ شوێن.


د. سامان بەرزنجی وتیشی" پێشتر ئەوەمان راگەیاندووە ترسناکی ئەو ڤایرۆسە تەواو نەبووە و هۆشداریمان داوە کە هەڵگرتنی رێککارەکان حاڵەتەکانی تووشبوون و گیانلەدەستدان بەهۆی ڤایرۆسی کۆرۆنا زیاتر دەکات".


ڕاشیگەیاند: "زۆر نیگەران بووین کە رێککارەکان زۆر بە خێرایی هەڵگیران بەتایبەت لە هەندێ دەروازەی سنووری کە بووە هۆی زۆربوونی ژمارەکە، بەتایبەت لە سنووری پارێزگای سلێمانی و دەروازەی سنووری باشماخ کە بووە هۆی تەشەنەکردنی زیاتری ڤایرۆسەکە.



وەزیری تەندروستیی حکوومەتی هەرێمی کوردستان راشیگەیاند کە وەک وەزارەتی تەندروستی داوا دەکەن کە قەدەغەی هاتوچۆ بۆ ماوەیەکی دیاریکراو رابگەیەندرێت هەروەها قەدەغەی هاتوچۆی نێوان شار و شارۆچکە و پارێزگاکانی هەرێمی کوردستان و نێوان هەرێمی کوردستان و پارێزگاکانی عێراق توندتۆڵتر بکرێت.



خەختیشیکردەوە کە "دەبێ بگەڕێینەوە سەر رێککارەکانی سەرەتای بڵاوبوونەوەی ڤایرۆسی کۆرۆنا بەمەبەستی کۆنتڕۆڵکردن و رێگەگرتن لە زیاتر بڵاوبوونەوەی".
 



PM:10:41:23/06/2020






ئەستێرەکان

Spee Media