به‌بۆنه‌ی یادی دامه‌زراندنی یه‌کێتیه‌وه به‌رپرسی ده‌زگای زانیاری و پاراستن ده‌ڵێت" ته‌نها ئه‌و که‌سانه له‌یه‌کیتییدا بهێڵنه‌وه که به‌خوێن خزمه‌ت ده‌که‌ن". (به ناراسته‌وخۆ ئاماژه بۆ ئه‌وه ده‌کات ئه‌وه‌ی به‌خوێن له‌گه‌ڵیاندا نین ده‌ریان بکه‌ن له یه‌کێتی).
لاهوری شێخ جه‌نگی له‌و په‌یامه‌دا که به‌بۆنه‌ی ساڵیادی یه‌کێتیه‌وه بڵاویکردۆته‌وه له‌برگه‌یه‌کی تردا باسی یه‌کریزی ده‌کات و ده‌ڵیت" ئەرک و مافی ئەوەی لەسەرشانە، کە خۆی بسازێنێت و بە رێزگرتن لە دەنگی دەنگدەرانی و پاراستنی شکۆی سیاسیی خۆی، جڵەوی مفاوەزاتێکی ناوخۆیی بگرێتە دەست، چونکە یەکڕیزیی نیشتمانی تەنها بە قسە نایەتی دی و تا یەکێتییش دەستپێشخەری نەکات، هیچ هێزێک ئەو یەکێتیی و کۆدەنگییەی بۆ دروست نابێت".
ده‌قی په‌یامه‌که:
تێکۆشەرانی دێرین، کەسوکاری سەربەرز، سەربازانی گومناو و نەوەی نوێی یەکێتیی نیشتمانیی کوردستان
پیرۆزتان بێت سی و نۆیەمین ساڵیادی دامەزراندی حزبە شۆڕشگێڕەکەتان. ئەو یەکێتییەی سەرباری هەمو جۆرە دوژمنکاری و ململانێ و دەستەگەری و تەڵە و داوی ناوخۆیی و ناوچەیی و دەرەکی، بەڵام لە هەورازدا کۆڵی نەدا و بە هیمەتی ئێوە و دەنگدەر و دڵسۆزانی، دوپاتیکردەوە کە "هەڵۆ لە لوتکەدا نەبێ نامرێ". نەمری بۆ شەهیدانی رێگەی رزگاریی و مافی چارەیخۆنوسینی کوردستان و سڵاو و رێز و وەفای ئەمەکداری بۆ جەنابی مام جەلال سکرتێری گشتیی یەکێتییی نیشتمانیی کوردستان، کە لە ژیانی سیاسیی و سەرکردایەتی خۆیدا هیچ کات ورەی بەرنەدا و هیوای خۆی بە ئێوەی دڵسۆزانی کورد و کوردستان لەدەستنەدا.30ی 4 جارێکی تر سەلماندییەوە کە ئێوە ئەهلی وەفا و متمانەن و یەکێتییش قەرزارتانە.
لەکاتێکدا ساڵیادی دامەزراندنی حزبی شەهیدان، ئێستا و داهاتو بەرز رادەگرین کە یەکێتیی نیشتمانیی لەبەردەم چوار ئەرکی مێژوییدایە. لەسەر ئاستی ناوخۆی حزب، یەکێتیی دەبێت کۆنگرەیەکی یەکلاکەرەوەی جدی ببەستێت و گۆڕانکاری ریشەیی لە پەیکەری رێکخراوەیی، و کارەکتەری سەرکردایەتی دا ئەنجام بدات. بە کۆنگرە کۆتایی بە واتەواتی فرە باڵی و فرە جەسمەری بهێنێت و ئەرکی ئێوەیە بە دەنگە رەوان و حەقبَیژەکانتان تەنها ئەو کەسانە لە یەکێتیی دا بهێڵینەوە کە بە خوێن و خزمەت یەکێتیی و کوردستانیین.
ئەرکی دوەمی یەکێتیی ئەوەیە کە سازانێکی سیاسی ناوخۆیی لە هەرێمی کوردستان دا سەرکردایەتی بکات. یەکێتیی هێزی یەکەمی ناوچە دابڕێنراوەکان و پارێزگای هەڵەبجە و هێزی دوەمە لەسەر ئاستی هەرێمی کوردستان، بە پارێزگای سلێمانی و هەولێریشەوە. بۆیە ئەرک و مافی ئەوەی لەسەرشانە، کە خۆی بسازێنێت و بە رێزگرتن لە دەنگی دەنگدەرانی و پاراستنی شکۆی سیاسیی خۆی، جڵەوی مفاوەزاتێکی ناوخۆیی بگرێتە دەست، چونکە یەکڕیزیی نیشتمانی تەنها بە قسە نایەتی دی و تا یەکێتییش دەستپێشخەری نەکات، هیچ هێزێک ئەو یەکێتیی و کۆدەنگییەی بۆ دروست نابێت.
ئەرکی دواتری یەکێتیی، کارکردنی چوست و چالاکی دڵسۆزانەیە بۆ گەڕاندنەوەی ناوچە کوردستانیە کێشەلەسەرەکان. هیمەتی بەڕێز مام جەلال لە داڕشتنی دەستوری نوێی عێراق و بردنەوەی یەکێتییش لەو ناوچانە، سەرخستنی کورد و کوردستانیبونی ناوچە دابڕێنراوەکانی سەلماندوە. ئەوەی ماوە، کارکردنێکی هەمەلایەنی سیاسی و کارگێڕی و تەناهییە بۆ زامنکردنی ئەو ناوچانە بە کردار و گەڕاندنەوەی بۆ سەر هەرێمی کوردستان. هەرچەندە هاتنەوەی ئەم ناوچانە بۆ سەر جوگرافیای هەرێم، باڵانسی هێز دەگۆڕێت و یەکێتیی نیشتمانی دەکات بە براوەی سەرەکی هەر هەڵبژاردنێک لە داهاتودا، و پێگەیەکی نمونەیی بەم حزبە دەبەخشێت، و هەندێک هێز و لایەنی ناوخۆیی دەتۆقێنێت بەڵام یەکێتیی لەپێناو کوردستانێکی ئارامی یەکگرتوودا، ئامادەیە پشت بکاتە مەبدەئی زۆرینە و کەمینە و بە رێکەوتن و سازانی سیاسی، و بە بەشداریپێکردنی هەمو لایەنەکان، کوردستان بەڕێوەبەرێت. چونکە تا ئەو کاتەی جوگرافیا دابڕێنراوەکانی کوردستان نەخرێنەوە سەر هەرێم، سنوری ئێستای هەرێمی کوردستان تەعبیر لە کوردستانی باشور ناکات و هەر بانگەشەیەک بۆ سەربەخۆیی، بەتاڵ دەبێتەوە.
لێرەشەوە ئەرکی گەورەترمان ئەوەیە بە رێکەوتنی ناوخۆیی و یەکخستنی توانا مرۆیی و مادی و مەعنەویەکانی کوردستان، و نیشاندانی وێنەیەکی بەرز لە حوکمڕانی و حکومەتێکی خزمەتگوزاری مەدەنی، خۆمان بۆ گۆڕانکارییە گەورە و دەرفەتە زێڕینەکانی خۆرهەڵاتی ناوەڕاست ئامادە بکەین. ئەگەر لەگەڵ عێراق دەمێنیتەوە، بە ناوچە کێشەلەسەرکانەوە هەرێم بین و بمێنینەوە و ئەگەریش بیر لە کۆنفدراڵی دەکەینەوە، کۆدەنگیی کوردستانیی بۆ ئامادەبکەین. لە هەردو سیناریۆکەشدا، ئاگاداری ئەوە بین کە سەربەخۆیی کوردستان وەکو رێگەی سێهەم بپارێزین و ئیرادەی ستراتیجیی خۆمان تەسلیمی هیچ پایتەخت و بۆندێکی نارون نەکەین.
جارێکی تر پیرۆزباییتان لێدەکەم و بیرتاندەخەمەوە کە یەکێتیی نیشتمانیی، ساڵێکی گرنگ و پڕ گۆڕانکاریی لەبەردەمە و ئەمەش بە بەشداریپێکردنی وزەی نوێ و بیری نوێ نەوەی نوێ دەکرێت