هەروەها لای خۆشییەوە بەرهەم ساڵح سەرۆک کۆماری عێراق ڕایگەیاند" ناکۆکی لایەنەکان نەهامەتی عێراقییەکان زیاتر دەکات، بۆیە دەبێت چارەسەرێکی بەپەلە بۆ ئەم دۆخە نائاسایی و ناهەموارە بدۆزرێتەوە".
سەرۆک کۆماری لە بەشێکی تری پەیامەکەیدا داواشی لە لایەنەکان کرد، سازش بۆ یەکتری بکەن بۆ تێپەڕاندنی قەیرانی سیاسی و دەستپێکی چاکسازی راستەقینە.
هاوکات مستەفا کازمی سەرۆک وەزیرانی عێراق لە میانی بەشداریکردنی کۆنگرە ئیسلامییەکەدا ئاماژەی بەوەکرد، هاوڵاتییانمان هەست بە نیگەرانییەکی زۆر دەکەن، ئەوە گونجاو نییە ئەو قەیرانە سیاسیە بەردەوامبێت بەبێ هیچ چارەسەرێکی سیاسی، لەکاتێکدا هەڕەشە لە دەستکەوتە ئەمنییەکان و ئاسایشی وڵات دەکات.
باسی لەوەشکرد، هەمووان بەرپرسیارێتی دۆزینەوەی چارەسەریان بۆ قەیرانەکان لە ئەستۆدایە و کلیلی چارەسەر ئەوەیە هەمووان لەسەر مێزی دیالۆگی نیشتمانی دابنیشن.
دوای زیاتر لە (١٠) مانگ لە هەڵبژاردنی پەرلەمانی عێراق، تا ئێستا نەتوانراوە حکومەت پێکبهێنرێت و رەوتی سەدریش لە پەرلەمان کشایەوە و دەستی بە خۆپیشاندان و مانگرتنی کراوە کردووە.