سه‌رۆكی ئیئتیلافی نیشتمانیی عێراقییه‌ ڕایده‌گه‌یه‌نێت: ڕاسپاردنی حه‌یده‌ر عه‌بادی بۆ پێكهێنانی‌ حكومه‌تی‌ نوێی‌ عێراق، ئاماژه‌یه‌ بۆ هه‌بوونی‌ هه‌ژموونی‌ ئێران به‌سه‌ر پرۆسه‌ی‌ سیاسیی‌ عێراقه‌وه‌.

له‌ دیدارێكدا له‌گه‌ڵ كه‌ناڵی ئاسمانیی موسته‌قبه‌لی لوبنانی-ئه‌یاد عه‌لاوی سه‌رۆكی ئیئتیلافی نیشتمانیی عێراقییه‌، ڕایگه‌یاند: به‌ره‌و پێشچوونی عێراق، پێویستی به‌ نه‌خشه‌ڕێگه‌یه‌كی روون و ئاشكرا هه‌یه‌ و له‌گه‌ڵ ئه‌وه‌شدا هێشتا زوه‌ قسه‌ له‌سه‌ر ئاراسته‌ی سیاسیی وڵات بكرێت.

عه‌لاوی ڕاشیگه‌یاندوه‌: ڕاسپاردنی حه‌یده‌ر عه‌بادی وه‌ك سه‌رۆك وه‌زیرانی نوێی وڵات، ئاماژه‌یه‌ بۆ هه‌بوونی‌ هه‌ژموونی‌ ئێران له‌ناوچه‌كه‌و دۆسیه‌ی عێراقدا.
له‌درێژه‌ی دیداره‌كه‌یدا، عه‌لاوی ئاماژه‌ی به‌وه‌كردوه‌: ئه‌وه‌ی ئێستا عێراق پێویستیه‌تی، یه‌كڕیزیی و جۆشدانی كۆمه‌ڵگه‌یه‌ له‌ دژی داعش، له‌گه‌ڵ دوورخستنه‌وه‌ی‌ سیاسه‌تی تایه‌فه‌گه‌رایی.

وتیشی‌: پشتگوێخستنی داواكاریی ئاشتییانه‌ی خه‌ڵك و بۆردومانكردنی هاوڵاتییان به‌ چه‌كی قورس، كاردانه‌وه‌یان هه‌یه‌و ئه‌وه‌ش له‌ خزمه‌تی داعشدایه‌.